ಸುಂಕ ಹೇರಿಕೆಯಿಂದ ವಹಿವಾಟು ಕುಸಿತ; ಅಮೆರಿಕಕ್ಕೆ ರಫ್ತು ಶೇ 28ರಷ್ಟು ಇಳಿಕೆ: ವರದಿ

ನವದೆಹಲಿ: ಭಾರತದ ಸರಕುಗಳ ಆಮದಿನ ಮೇಲೆ ಅಮೆರಿಕ ಹೇರಿರುವ ಹೆಚ್ಚುವರಿ ಸುಂಕದಿಂದ ದೇಶದ ರಫ್ತು ಕಳೆದ ಐದು ತಿಂಗಳಿನಲ್ಲಿ ಶೇ 28.5ರಷ್ಟು ಇಳಿಕೆಯಾಗಿದೆ ಎಂದು ಗ್ಲೋಬಲ್ ಟ್ರೇಡ್ ರಿಸರ್ಚ್‌ ಇನಿಷಿಯೇಟಿವ್ (ಜಿಟಿಆರ್‌ಐ) ವರದಿ ಶನಿವಾರ ತಿಳಿಸಿದೆ.

ಭಾರತಕ್ಕೆ ಅಮೆರಿಕವು ಅತಿದೊಡ್ಡ ಮಾರುಕಟ್ಟೆಯಾಗಿದ್ದು, ಹೆಚ್ಚಿನ ಪ್ರಮಾಣದಲ್ಲಿ ರಫ್ತು ಮಾಡುತ್ತದೆ. ಆದರೆ, ಸುಂಕ ಹೆಚ್ಚಳವು ರಫ್ತು ಇಳಿಕೆಗೆ ಪ್ರಮುಖ ಕಾರಣವಾಗಿದೆ ಎಂದು ತಿಳಿಸಿದೆ.

ಪ್ರಸಕ್ತ ವರ್ಷದ ಮೇ ತಿಂಗಳಿನಿಂದ ಅಕ್ಟೋಬರ್‌ವರೆಗೆ ರಫ್ತಾದ ಸರಕುಗಳು ಹಣಕಾಸಿನ ಮೌಲ್ಯದಲ್ಲಿ ₹78,894 ಕೋಟಿಯಿಂದ ₹56,378 ಕೋಟಿಗೆ ಇಳಿದಿದೆ ಎಂದು ಜಿಟಿಆರ್‌ಐ ತಿಳಿಸಿದೆ. 

ಏಪ್ರಿಲ್‌ನಲ್ಲಿ ಅಮೆರಿಕವು, ಭಾರತದಿಂದ ಆಮದು ಮಾಡಿಕೊಳ್ಳುವ ಸರಕುಗಳ ಮೇಲೆ ಶೇ 10ರಷ್ಟು ಸುಂಕ ವಿಧಿಸಿತ್ತು. ಈ ಸುಂಕವನ್ನು ಆಗಸ್ಟ್‌ ತಿಂಗಳ ಅಂತ್ಯದ ವೇಳೆಗೆ ಶೇ 50ಕ್ಕೆ ಹೆಚ್ಚಿಸಿತು. 

ಅಕ್ಟೋಬರ್ ತಿಂಗಳಿನಲ್ಲಿನ ಒಟ್ಟು ರಫ್ತಿನ ಪೈಕಿ ಸ್ಮಾರ್ಟ್‌ಫೋನ್‌, ಔಷಧಗಳು ಮತ್ತು ಪೆಟ್ರೋಲಿಯಂ ಉತ್ಪನ್ನಗಳ ರಫ್ತು ಪಾಲು ಶೇ 40.3ರಷ್ಟಿದೆ. ಮೇ ತಿಂಗಳಿನಲ್ಲಿ ಈ ವಸ್ತುಗಳ ರಫ್ತು ಹಣಕಾಸಿನ ಮೌಲ್ಯದಲ್ಲಿ ₹30,556 ಕೋಟಿಯಷ್ಟಿತ್ತು. ಆದರೆ, ಅಕ್ಟೋಬರ್‌ ವೇಳೆಗೆ ₹22,694 ಕೋಟಿಗೆ ಇಳಿದಿದೆ. ಒಟ್ಟಾರೆ ರಫ್ತು ಮೌಲ್ಯ ಶೇ 25.8ರಷ್ಟು ಕಡಿಮೆಯಾಗಿದೆ.

ಕಬ್ಬಿಣ, ಉಕ್ಕು, ಅಲ್ಯೂಮಿನಿಯಂ, ತಾಮ್ರ ಮತ್ತು ವಾಹನದ ಬಿಡಿ ಭಾಗಗಳ ರಫ್ತು ಕಳೆದ ಐದು ತಿಂಗಳಿನಲ್ಲಿ ಶೇ 23.8ರಷ್ಟು ಇಳಿಕೆಯಾಗಿದೆ. ಮೇ ತಿಂಗಳಿನಲ್ಲಿ ₹5,619 ಕೋಟಿ ಮೊತ್ತದ ಸರಕುಗಳು ರಫ್ತಾಗಿತ್ತು. ಅಕ್ಟೋಬರ್ ವೇಳೆಗೆ ಇದು ₹4,288 ಕೋಟಿಗೆ ಇಳಿದಿದೆ. 

ಕಾರ್ಮಿಕ ಕೇಂದ್ರಿತ ವಲಯದ ಸರಕುಗಳ ರಫ್ತು ಮೌಲ್ಯವು ₹42,708 ಕೋಟಿಯಿಂದ ₹29,395 ಕೋಟಿಗೆ ಇಳಿದಿದೆ.

ಸ್ಮಾರ್ಟ್‌ಫೋನ್‌ಗಳ ರಫ್ತು ಶೇ 36ರಷ್ಟು ಕುಸಿತ ಕಂಡಿದೆ. ಮೇ ತಿಂಗಳಿನಲ್ಲಿ ₹20,460 ಕೋಟಿಯಷ್ಟಿತ್ತು. ಅಕ್ಟೋಬರ್‌ ವೇಳೆಗೆ ₹13,402 ಕೋಟಿಗೆ ಇಳಿದಿದೆ ಎಂದು ಜಿಟಿಆರ್‌ಐ ಸಂಸ್ಥಾಪಕ ಅಜಯ್ ಶ್ರೀವಾಸ್ತವ ಹೇಳಿದ್ದಾರೆ.

ಅಮೆರಿಕಕ್ಕೆ ಜೂನ್‌ ತಿಂಗಳಿನಲ್ಲಿ ದೇಶದ ರಫ್ತು ಹಣಕಾಸಿನ ಮೌಲ್ಯದಲ್ಲಿ ₹17,869 ಕೋಟಿಯಷ್ಟಾಗಿತ್ತು. ಜುಲೈನಲ್ಲಿ ₹13,580 ಕೋಟಿ, ಆಗಸ್ಟ್‌ನಲ್ಲಿ ₹8,620 ಕೋಟಿ, ಸೆಪ್ಟೆಂಬರ್‌ನಲ್ಲಿ ₹7,903 ಕೋಟಿಗೆ ಇಳಿಕೆಯಾಗಿತ್ತು. ಆದರೆ, ಅಕ್ಟೋಬರ್‌ನಲ್ಲಿ ₹13,402 ಕೋಟಿಗೆ ಏರಿಕೆ ಆಗಿದೆ. 

ದೇಶದ ಔಷಧ ಸರಕುಗಳ ರಫ್ತು ₹6,661 ಕೋಟಿಯಿಂದ ₹6,554 ಕೋಟಿಗೆ ಇಳಿಕೆಯಾಗಿದೆ. ಪೆಟ್ರೋಲಿಯಂ ಉತ್ಪನ್ನಗಳ ರಫ್ತು ಶೇ 15.5ರಷ್ಟು ಕಡಿಮೆಯಾಗಿದ್ದು,₹2,197 ಕೋಟಿಯಾಗಿದೆ. ಮೇ ತಿಂಗಳಿನಲ್ಲಿ ₹2,600 ಕೋಟಿಯಷ್ಟಾಗಿತ್ತು. 

ರಾಸಾಯನಿಕಗಳ ರಫ್ತು ಶೇ 38ರಷ್ಟು ಕುಸಿದು, ₹4,797 ಕೋಟಿಯಿಂದ ₹2,975 ಕೋಟಿಗೆ ಇಳಿದಿದೆ ಎಂದು ತಿಳಿಸಿದೆ.

ತಿಂಗಳು; ಇಳಿಕೆ (₹ಕೋಟಿಗಳಲ್ಲಿ)

• ಜೂನ್‌; ₹17,869

• ಜುಲೈ; ₹13,580

• ಆಗಸ್ಟ್‌; ₹8,620

• ಸೆಪ್ಟೆಂಬರ್‌; ₹7,903

• ಅಕ್ಟೋಬರ್‌; ₹13,402