ಸಗಟು ಹಣದುಬ್ಬರ ಏರಿಕೆ

ನವದೆಹಲಿ: ಸಗಟು ಹಣದುಬ್ಬರ ಸೆಪ್ಟೆಂಬರ್‌ನಲ್ಲಿ ಶೇ 5.13ಕ್ಕೆ ಏರಿಕೆಯಾಗಿದೆ. ಇದು ಎರಡು ತಿಂಗಳ ಗರಿಷ್ಠ ಮಟ್ಟವಾಗಿದೆ.

ಆಹಾರ ಪದಾರ್ಥಗಳ ಬೆಲೆ ಹಾಗೂ ಇಂಧನ ದರಗಳಲ್ಲಿ ಹೆಚ್ಚಳವಾಗಿರುವುದರಿಂದ ಸಗಟು ಹಣದುಬ್ಬರದಲ್ಲಿ ಏರಿಕೆಯಾಗಿದೆ ಎಂದು ಕೇಂದ್ರ ಸರ್ಕಾರ ಹೇಳಿದೆ.

ಸಗಟು ದರ ಸೂಚ್ಯಂಕ (ಡಬ್ಲ್ಯುಪಿಐ) ಆಧರಿಸಿದ ಹಣದುಬ್ಬರ ಆಗಸ್ಟ್‌ನಲ್ಲಿ ಶೇ 4.53ರಷ್ಟಿತ್ತು. 2017ರ ಸೆಪ್ಟೆಂಬರ್‌ನಲ್ಲಿ ಶೇ 3.14ರಷ್ಟಿತ್ತು.

ಇಂಧನ ಮತ್ತು ವಿದ್ಯುತ್‌ ದರಗಳು ಶೇ 16.65ರಷ್ಟಾಗಿವೆ. ಪೆಟ್ರೋಲ್‌ ಮತ್ತು ಡೀಸೆಲ್‌ ದರಗಳು ಕ್ರಮವಾಗಿಶೇ 17.21 ಮತ್ತು ಶೇ 22.18ರಷ್ಟಾಗಿವೆ.

‘ಕೆಲ ದಿನಗಳಿಂದ ಕಚ್ಚಾ ತೈಲ ದರ ಇಳಿಕೆಯಾಗುತ್ತಿದೆ. ಕೇಂದ್ರದಿಂದ ಎಕ್ಸೈಸ್‌ ಮತ್ತು ರಾಜ್ಯಗಳಿಂದ ವ್ಯಾಟ್‌ ತಗ್ಗಿಸಿರುವುದರಿಂದ ಇಂಧನ ದರಗಳೂ ಕಡಿಮೆಯಾಗಲಿವೆ. ರೂಪಾಯಿ ಮೌಲ್ಯ ಇಳಿಮುಖವಾಗಿರುವುದು ಈ ತಿಂಗಳಿನಲ್ಲಿ ಸಗಟು ಹಣದುಬ್ಬರದ ಮೇಲೆ ಒತ್ತಡ ತರಲಿದೆ’ ಎಂದು ಇಕ್ರಾ ಸಂಸ್ಥೆಯ ಮುಖ್ಯ ಆರ್ಥಿಕ ತಜ್ಞೆ ಅದಿತಿ ನಾಯರ್‌ ಹೇಳಿದ್ದಾರೆ.

‘ಪ್ರಮುಖ ಮಂಡಿಗಳಲ್ಲಿ ಮುಂಗಾರು ಬೆಳೆಗಳ ದರಗಳು ‘ಎಂಎಸ್‌ಪಿ’ ಗಿಂತಲೂ ಕಡಿಮೆ ಇವೆ. ಆಹಾರಧಾನ್ಯಗಳ ಸಂಗ್ರಹ ಪ್ರಕ್ರಿಯೆಯೂ ಚುರುಕು ಪಡೆದಿಲ್ಲ’ ಎಂದು ಇಂಡಿಯಾ ರೇಟಿಂಗ್ಸ್‌ ಆ್ಯಂಡ್‌ ರೀಸರ್ಚ್‌ನ ಮುಖ್ಯ ಆರ್ಥಿಕ ತಜ್ಞ ಡಿ.ಕೆ. ಪಂತ್‌ ತಿಳಿಸಿದ್ದಾರೆ.