ಮಾರ್ಚ್ 31ರ ವರೆಗೂ ಕಾಲುವೆಗೆ ನೀರು

ಗಂಗಾವತಿ: ಎಡದಂಡೆ ಮುಖ್ಯನಾಲೆಯ 17ನೇ ವಿತರಣಾ ಕಾಲುವೆಗೆ ಸಮರ್ಪಕ ನೀರು ಹರಿಸುವಂತೆ ಒತ್ತಾಯಿಸಿ ದಾಸನಾಳದಲ್ಲಿ ಮಂಗಳವಾರ ರೈತರು ಧರಣಿ ನಡೆಸಿದರು. ರೈತರ ಹೋರಾಟಕ್ಕೆ ಮಾಜಿ ಎಂಎಲ್‌ಸಿ ಎಚ್.ಆರ್. ಶ್ರೀನಾಥ್ ಬೆಂಬಲ ಸೂಚಿಸಿ ಧರಣಿಯಲ್ಲಿ ಪಾಲ್ಗೊಂಡಿದ್ದರು.

ರೈತರು ಹಮ್ಮಿಕೊಂಡ ಧರಣಿ ಸ್ಥಳಕ್ಕೆ ವಡ್ಡರಹಟ್ಟಿ ವಿಭಾಗದ ನೀರಾವರಿ ಇಲಾಖೆಯ ಕಾರ್ಯಪಾಲಕ ಎಂಜಿನಿಯರ್ ವೆಂಕಟೇಶ ಅವರೊಂದಿಗೆ ಆಗಮಿಸಿದ ಶಾಸಕ ಪರಣ್ಣ ಮುನವಳ್ಳಿ ರೈತರ ಸಮಸ್ಯೆ ಆಲಿಸಿದರು. ಬಳಿಕ ಮಾತನಾಡಿದ ಶಾಸಕ, 31ರವರೆಗೂ ನೀರು ತಲುಪಿಸುತ್ತೇವೆ ಎಂದು ಭರವಸೆ ನೀಡಿದರು.

ರೈತರ ಪರವಾಗಿ ಉದ್ಯಮಿ ಕಲ್ಯಾಣಂ ನಾಗೇಶ್ವರರಾವ್ ಮಾತನಾಡಿದರು. ಜ.1ರಿಂದ ಮುಖ್ಯ ಕಾಲುವೆಗೆ 3 ಸಾವಿರ ಕ್ಯೂಸೆಕ್ ನೀರು ಮಾತ್ರ ಹರಿಸಲಾಗುತ್ತಿದೆ. 17ನೇ ವಿತರಣಾ ಕಾಲುವೆಗೆ 40ರಿಂದ 45 ಕ್ಯೂಸೆಕ್ ನೀರು ಹರಿಸಲು ಸಾಧ್ಯ ಎಂದು ಇ.ಇ ವೆಂಕಟೇಶ ಹೇಳಿದರು.