ಗುಳೇದಗುಡ್ಡ: ಶಿಥಿಲಾವಸ್ಥೆಯಲ್ಲಿ ಜಲಸಂಪನ್ಮೂಲ ಇಲಾಖೆ ವಸತಿ ಗೃಹಗಳು

ಗುಳೇದಗುಡ್ಡ: ಪಟ್ಟಣದ ಕೋಟೆಕಲ್ ಗ್ರಾಮದ ಹತ್ತಿರ, ಬಾದಾಮಿ ನಾಕಾಕ್ಕೆ ಹೊಂದಿಕೊಂಡಿರುವ ಜಲಸಂಪನ್ಮೂಲ ಇಲಾಖೆಯ ಮಲಪ್ರಭಾ ಎಡದಂಡೆ ಕಾಲುವೆ ಯೋಜನೆಯ ಮತ್ತು ಅಲ್ಲಿನ ಸಿಬ್ಬಂದಿಗಾಗಿ 35 ವರ್ಷಗಳ ಹಿಂದೆ ನಿರ್ಮಿಸಿರುವ ವಸತಿ ಗೃಹಗಳು ಮತ್ತು ಕಚೇರಿಗಳು ಶಿಥಿಲಾವಸ್ಥೆ ಸ್ಥಿತಿಯಲ್ಲಿದ್ದು ಅನುಪಯುಕ್ತವಾಗಿವೆ.

37 ವಸತಿ ಗೃಹಗಳು, ಎರಡು ಕಚೇರಿಗಳಿವೆ. ಅದರಲ್ಲಿ 7 ವಸತಿ ಗೃಹಗಳನ್ನು ಕಂದಾಯ ಇಲಾಖೆ ತಹಶೀಲ್ದಾರ್ ಕಚೇರಿಗೆ ನೀಡಲಾಗಿದೆ. ಇನ್ನುಳಿದವು ಪಾಳು ಬಿದ್ದಿವೆ. ಪ್ರಸ್ತುತ ಕಚೇರಿ ಇದ್ದು, ಒಬ್ಬರು ಪ್ರಥಮ ದರ್ಜೆ ಸಹಾಯಕರು, ಇಬ್ಬರು ದ್ವಿತೀಯ ದರ್ಜೆ ಸಹಾಯಕರಿದ್ದಾರೆ. ಕೆಲಸ ಮಾಡುತ್ತಿರುವ ಎರಡು ಕಟುಂಬಗಳು ವಾಸವಾಗಿದ್ದನ್ನು ಬಿಟ್ಟರೆ, ಎಲ್ಲವೂ ಖಾಲಿ ಇದ್ದು ನಿರ್ವಹಣೆ ಇಲ್ಲದ್ದಕ್ಕೆ ಹಾಳಾಗಿವೆ.

ತಹಶೀಲ್ದಾರ್ ಕಚೇರಿಗೆ ಬಾಡಿಗೆ: 2018-19 ನೇ ಸಾಲಿನಿಂದ 7 ವಸತಿ ಗೃಹಗಳ ಕಟ್ಟಡಗಳನ್ನು ಕಂದಾಯ ಇಲಾಖೆಗೆ ಬಾಡಿಗೆ ನೀಡಲಾಗಿದೆ. ತಹಶೀಲ್ದಾರ್ ಕಚೇರಿ ಅದಕ್ಕೆ ಸಂಬಂಧಿಸಿದ ಎಲ್ಲ ಕಚೇರಿಗಳಿವೆ. ಇವುಗಳಿಗಾಗಿ ತಿಂಗಳಿಗೆ ₹26 ಸಾವಿರ ಬಾಡಿಗೆ ನಿಗದಿ ಮಾಡಲಾಗಿದೆ.

ಪೂರ್ಣಗೊಳ್ಳದ ಕಾಲುವೆ : 30 ವರ್ಷಗಳ ಹಿಂದೆಯೇ ಬಾದಾಮಿ ತಾಲ್ಲೂಕಿನ ಕುಟಕನಕೇರಿಯಿಂದ ಕಾಲುವೆ ಆರಂಭವಾಗಿ ಗುಳೇದಗುಡ್ಡ ತಾಲ್ಲೂಕನ್ನು ಪ್ರವೇಶಿಸಿ ರಾಘಾಪುರ, ಹಂಸನೂರ, ಮುರುಡಿ, ಕೋಟೆಕಲ್ ನಂತರ ಪರ್ವತಿಯವರೆಗೆ ಕಾಲುವೆ ತೋಡಿ, ನೀರನ್ನು ಹರಿಸುವ ಉದ್ದೇಶ ಸರ್ಕಾರದ್ದಾಗಿತ್ತು. ಆದರೆ ಕಾಲುವೆ ಪೂರ್ಣಗೊಳ್ಳದೆ, ಅರ್ಧಕ್ಕೆ ನಿಂತಿದೆ. ಉದ್ದೇಶ ಈಡೇರದಿರುವುದರಿಂದ ನಿರ್ಮಾಣ ಮಾಡಿದ್ದ ಕಾಲುವೆ ಸಂಪೂರ್ಣ ಹಾಳಾಗಿದೆ.

ಅನುದಾನಕ್ಕೆ ಬೇಡಿಕೆ: ಬಾದಾಮಿ, ಗುಳೇದಗುಡ್ಡ ತಾಲ್ಲೂಕಿಗೆ ನೀರಾವರಿಗೆ ನೀರು ಪೂರೈಕೆ ಉದ್ದೇಶದಿಂದ ಮಲಪ್ರಭಾ ಎಡದಂಡೆ ಮೂಲಕ ಹರಿಸಲು ಮತ್ತು ಹೊಸದಾಗಿ ಕಾಲುವೆ ತೋಡಲು, ಕಚೇರಿ ಮತ್ತು ವಸತಿ ಗೃಹ ನಿರ್ಮಾಣಕ್ಕೆ ಶಾಸಕರ ಮೂಲಕ ಸರ್ಕಾರಕ್ಕೆ ₹421 ಕೋಟಿ ಮಂಜೂರಾತಿ ನೀಡಲು ಮನವಿ ಮಾಡಲಾಗಿದೆ.

ಪ್ರಸ್ತುತ ಅದರಲ್ಲಿ ₹50 ಕೋಟಿ ಅನುದಾನ ಮಂಜೂರಾಗಿದ್ದು, ಬಾದಾಮಿಯಲ್ಲಿ ಕಚೇರಿ ಮತ್ತು ಸಿಬ್ಬಂದಿ ವಸತಿ ಗೃಹ ನಿರ್ಮಾಣ ಮಾಡಲಾಗುತ್ತಿದೆ. ಮುಂದಿನ ದಿನಗಳಲ್ಲಿ ಗುಳೇದಗುಡ್ಡದಲ್ಲಿರುವ ವಸತಿಗೃಹ ಮತ್ತು ಕಚೇರಿಯನ್ನು ಲೋಕೋಪಯೋಗಿ ಇಲಾಖೆ ನಿರ್ದೆಶನದ ಮೇರೆಗೆ ಕೆಡವಿ,  ಹೊಸ ಕಟ್ಟಡ ನಿರ್ಮಾಣ ಮಾಡಲಾಗುದು ಎಂದು ಸಹಾಯಕ ಎಂಜಿನಿಯರ್ ಪ್ರಭಾಕರ ಹೇಳುತ್ತಾರೆ.