ಬಾಗಲಕೋಟೆ| ಲೋಕಾಪುರಕ್ಕೂ ರೈಲು ವಿಸ್ತರಿಸಲು ಆಗ್ರಹ: ಪ್ರತಿಭಟನೆ

ಬಾಗಲಕೋಟೆ: ಬಾಗಲಕೋಟೆ–ಮೈಸೂರು (ಬಸವ ಎಕ್ಸ್‌ಪ್ರೆಸ್) ರೈಲನ್ನು ಲೋಕಾಪುರ ರೈಲು ನಿಲ್ದಾಣದಿಂದಲೇ ಪ್ರಾರಂಭಿಸಬೇಕು ಎಂದು ಆಗ್ರಹಿಸಿ ಬಾಗಲಕೋಟೆ ರೈಲ್ವೆ ನಿಲ್ದಾಣದ ಮುಂದೆ ಕರ್ನಾಟಕ ರಾಜ್ಯ ರೈಲ್ವೆ ಅಭಿವೃದ್ಧಿ ಹೋರಾಟ ಸಮಿತಿ ಹಾಗೂ ಲೋಕಾಪುರ ಹಿರಿಯ ನಾಗರಿಕರ ಸೇವಾ ಸಂಘದ ಸಹಯೋಗದಲ್ಲಿ ಶುಕ್ರವಾರ ಪ್ರತಿಭಟನೆ ಮಾಡಲಾಯಿತು.

ಲೋಕಾಪುರದಿಂದ ರೈಲು ಆರಂಭಿಸುವುದರಿಂದ ಲೋಕಾಪುರ ಸೇರಿದಂತೆ ಸುತ್ತಲಿನ ಹಳ್ಳಿಗಳ ಜನರಿಗೆ ಅನುಕೂಲವಾಗುತ್ತದೆ ಎಂದ ಪ್ರತಿಭಟನಾಕಾರರು ಹುಬ್ಬಳ್ಳಿ ನೈರುತ್ಯ ರೈಲ್ವೆಯ ಮಹಾವ್ಯವಸ್ಥಾಪಕರಿಗೆ ಬಾಗಲಕೋಟೆ ರೈಲ್ವೆ ಅಧೀಕ್ಷಕರ ಮೂಲಕ ಸಲ್ಲಿಸಲಾಯಿತು. ಕೂಡಲೇ ರೈಲು ಆರಂಭಿಸಬೇಕು ಎಂದು ಘೋಷಣೆಗಳನ್ನು ಕೂಗಿದರು.

ಕರ್ನಾಟಕ ರಾಜ್ಯ ರೈಲ್ವೆ ಅಭಿವೃದ್ಧಿ ಹೋರಾಟ ಸಮಿತಿ ರಾಜ್ಯಾಧ್ಯಕ್ಷ ಕುತ್ಬುದಿನ್ ಖಾಜಿ  ಮಾತನಾಡಿ,  ಬಾಗಲಕೋಟೆ–ಲೋಕಾಪುರ ರೈಲು ಮಾರ್ಗ ಈಗಾಗಲೇ ಪೂರ್ಣಗೊಂಡಿದ್ದು, ಸರಕು ರೈಲುಗಳಷ್ಟೇ ಚಲಿಸುತ್ತಿವೆ. ಪ್ರಯಾಣಿಕರ ರೈಲನ್ನು ಆರಂಭಿಸಬೇಕು ಎಂದು ಆಗ್ರಹಿಸಿದರು.

ಬೆಂಗಳೂರು ಆಸ್ಪತ್ರೆ, ವಿವಿಧ ಪುಣ್ಯಕ್ಷೇತ್ರ, ಉದ್ಯೋಗ ಹಾಗೂ ಸ್ಪರ್ಧಾತ್ಮಕ ಪರೀಕ್ಷೆಗಳಿಗಾಗಿ ತೆರಳುವವರಿಗೆ ಅನುಕೂಲ ಆಗುತ್ತದೆ. ಮೈಸೂರಿನಿಂದ ಬಾಗಲಕೋಟೆಗೆ ಬೆಳಿಗ್ಗೆ 11.15ಕ್ಕೆ ಬರುತ್ತದೆ. ಮಧ್ಯಾಹ್ನ 2.20ಕ್ಕೆ ಮರಳಿ ಹೋಗುತ್ತದೆ. ಆ ನಡುವೆ ಮೂರು ಗಂಟೆ ಸಮಯವಿರುವುದರಿಂದ ಲೋಕಾಪುರದವರೆಗೆ ವಿಸ್ತರಿಸಬಹುದು ಎಂದರು.

ರೈಲು ಆರಂಭಿಸುವ ಬಗ್ಗೆ ಹಲವಾರು ಬಾರಿ ಮನವಿ ಸಲ್ಲಿಸಿದರೂ ಸ್ಪಂದಿಸಿಲ್ಲ. ಶೀಘ್ರ ನಿರ್ಧಾರ ಕೈಗೊಳ್ಳದಿದ್ದರೆ ರೈಲ್ ರೋಕೊ ಚಳವಳಿ ಕೈಗೊಳ್ಳಲಾಗುವುದು ಎಂದು ಹೋರಾಟಗಾರರು ಎಚ್ಚರಿಸಿದರು. 

ಕರವೇ ಬಸವರಾಜ ಧರ್ಮಂತಿ, ಮುಖಂಡ ರಾಜು ಮನ್ನಿಕೇರಿ, ಶ್ರೀನಿವಾಸ್ ಬಳ್ಳಾರಿ, ವಿ.ಬಿ.ಮಾಳಿ, ಎಸ್.ಎಂ.ಹಗ್ಗದ, ಬಿ.ಎಂ.ಪಾಟೀಲ, ಎಸ್.ಎನ್ ಹಿರೇಮಠ, ಹೊಳಬಸಪ್ಪ ದಂಡಿನ, ಲೋಕಣ್ಣ ಉಳ್ಳಾಗಡ್ಡಿ, ವಿಠ್ಠಲ ಮೇಟಿ, ಪ್ರಶಾಂತ ತೆಗ್ಗಿ, ಲೋಕಣ್ಣ ಪೂಜಾರಿ, ರಾಮಣ್ಣ ಪೊಲೀಸ್ ಪಾಟೀಲ ಮತ್ತಿತರರು ಪಾಲ್ಗೊಂಡಿದ್ದರು.