ಬಳ್ಳಾರಿ: ವಿಡಿಯೊ ಮಾಡಿಕೊಳ್ಳುತ್ತ ಮಹಿಳೆ ಆತ್ಮಹತ್ಯೆ

ಬಳ್ಳಾರಿ: ಬಳ್ಳಾರಿ ನಗರದ ಹುಸೇನ್ ನಗರದ ಮಹಿಳೆಯೊಬ್ಬರು ಪರಪುರುಷನೊಬ್ಬನಿಂದ ತನಾಗದ ಅನ್ಯಾಯವನ್ನು ವಿಡಿಯೊದಲ್ಲಿ ಹೇಳಿಕೊಳ್ಳುತ್ತಾ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ.

ಮುನ್ನಿ (23) ಮೃತರು. ವಿಚ್ಛೇದಿತೆ ಮುನ್ನಿ ಪ್ರತ್ಯೇಕವಾಗಿ ವಾಸಿಸುತ್ತಿದ್ದರು. ಈ ಅವಧಿಯಲ್ಲಿ ಸಂಬಂಧಿ ಮೊಹಮ್ಮದ್ ಶೇಖ್‌ ಎಂಬಾತನೊಂದಿಗೆ ಸಲುಗೆ ಹೊಂದಿದ್ದರು. ಇತ್ತೀಚೆಗೆ ಮೊಹಮ್ಮದ್ ಶೇಖ್ ಹಾಗೂ ಮುನ್ನಿ ನಡುವೆ ವೈಮನಸ್ಸು ಉಂಟಾಗಿತ್ತು. ಇದರಿಂದ ಮಾನಸಿಕವಾಗಿ ನೊಂದ ಮುನ್ನಿ ಭಾನುವಾರ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ.

ಮುನ್ನಿ ಸಾವಿಗೆ ಮೊಹಮ್ಮದ್‌ ಶೇಖನೇ ಕಾರಣ ಎಂದು ಕುಟುಂಬಸ್ಥರು ಆರೋಪಿಸಿದ್ದಾರೆ. ಈ ಕುರಿತು ಗಾಂಧಿನಗರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಸೋಮವಾರ ಪೊಲೀಸ್‌ ಠಾಣೆಗೆ ಭೇಟಿ ನೀಡಿದ್ದ ನಗರ ಶಾಸಕ ನಾರಾ ಭರತ್‌ ರೆಡ್ಡಿ, ಪ್ರಕರಣದ ಸ್ಥಿತಿಗತಿ ಮಾಹಿತಿಪಡೆದರು.

ಏನಿದೆ ವಿಡಿಯೊದಲ್ಲಿ: ಎಲ್ಲಾ ಅವನಿಂದಲೇ ಆಗುತ್ತಿರುವುದು. ಅವನು ನನ್ನನ್ನು ಬದುಕಲು ಬಿಡುತ್ತಿಲ್ಲ. ನಾನು ಸತ್ತರೆ ಆತ ಖುಷಿಯಾಗಿರುತ್ತಾನೆ. ಅವನನ್ನು, ಆವನ ಹೆಂಡತಿ, ತಾಯಿಯನ್ನು ಬಿಡಬಾರದು. ಮೂರು ಜನ ಸೇರಿ ನನಗೆ ಕಿರುಕುಳ ನೀಡಿದ್ದಾರೆ. ಮನೆಗೆ ಬಂದು ಹೊಡೆದಿದ್ದಾರೆ ಎಂದು ಮುನ್ನಿ ಆರೋಪಿಸಿದ್ದಾರೆ.