ನಕಲಿ ಬಿತ್ತನೆ ಬೀಜದ ಶಂಕೆ; ಮೊಳಕೆ ಒಡೆಯದ ಮೆಕ್ಕೇಜೋಳ: ಆತಂಕ

ಹಗರಿಬೊಮ್ಮನಹಳ್ಳಿ: ರೈತ ಮಹಿಳೆಯೊಬ್ಬರ ಜಮೀನಿನಲ್ಲಿ ಮೆಕ್ಕೇಜೋಳ ಬಿತ್ತನೆ ಮಾಡಿ ವಾರದ ಮೇಲಾಗಿದ್ದರೂ ಸರಿಯಾಗಿ ಮೊಳಕೆ ಒಡೆದಿಲ್ಲ. ಇದರಿಂದಾಗಿ ರೈತರು ತೀವ್ರ ಆತಂಕಗೊಂಡಿದ್ದಾರೆ.

ತಾಲ್ಲೂಕಿನ ತಂಬ್ರಹಳ್ಳಿಯ ಗಡ್ಡಿ ವೀರಬಸಮ್ಮ ಅವರು ಗ್ರಾಮದ ಅಂಗಡಿಯೊಂದರಲ್ಲಿ ಮೆಕ್ಕೇಜೋಳ ಬಿತ್ತನೆ ಬೀಜ ಖರೀದಿಸಿ 2.85 ಎಕರೆ ಜಮೀನಿನಲ್ಲಿ ಬಿತ್ತನೆ ಮಾಡಿದ್ದರು.

ಆದರೆ, ಒಂದು ವಾರ ಮೇಲಾಗಿದ್ದರೂ ಸರಿಯಾಗಿ ಮೊಳಕೆ ಒಡೆಯದಿರುವುದು ರೈತರಲ್ಲಿ ಆತಂಕ ಮೂಡಿಸಿದೆ. ಭೂಮಿಯನ್ನು ಉತ್ತಮವಾಗಿ ಹಸನು ಮಾಡಿ, ರಸಗೊಬ್ಬರದ ಜತೆಯಲ್ಲಿ ಬಿತ್ತನೆ ಮಾಡಲಾಗಿತ್ತು. ಆದರೂ ಸರಿಯಾಗಿ ಮೊಳಕೆ ಒಡೆದಿಲ್ಲ. ಅಲ್ಲಲ್ಲಿ ಮೂಡಿದೆಯಾದರೂ ನಷ್ಟದ ದಾರಿ ತುಳಿಯಬೇಕಾದ ಸಂದರ್ಭ ಬರುತ್ತದೆ ಎಂದು ನೋವಿನಿಂದ ನುಡಿಯುತ್ತಾರೆ ರೈತ ಮಹಿಳೆಯ ಪುತ್ರ ಯುವರಾಜ ಗಡ್ಡಿ.

ವ್ಯವಸಾಯದ ಚುಟುವಟಿಕೆಗಳಿಗಾಗಿ ಗ್ರಾಮದ ಕೃಷಿ ಪತ್ತಿನ ಸಹಕಾರ ಸಂಘದಲ್ಲಿ ಹಿಂದೆ ₹1.42ಲಕ್ಷ ರೂಪಾಯಿ ಸಾಲ ಮಾಡಿದ್ದಾರೆ. ಈ ವರ್ಷದ ಮುಂಗಾರು ಹಂಗಾಮಿನಲ್ಲಿ ಮೆಕ್ಕೇಜೋಳ ಬಿತ್ತನೆ ಮಾಡಿ ಉತ್ತಮ ಫಸಲು ಬರುತ್ತದೆ. ಬಂದ ಲಾಭದಲ್ಲಿ ಸಾಲವನ್ನು ಮರುಪಾವತಿ ಮಾಡುವ ಆಸೆ ಹೊತ್ತಿದ್ದ ರೈತರಿಗೆ ಈಗ ನಿರಾಶೆ ಮೂಡಿದೆ.

ಮತ್ತೆ ಸಾಲ ಮಾಡಿ ಸಾವಿರಾರು ರೂಪಾಯಿಗಳಲ್ಲಿ ಬಿತ್ತನೆ ಬೀಜ ಮತ್ತು ರಸಗೊಬ್ಬರ ಖರೀದಿಸಿ ಈ ವರ್ಷದ ಕೃಷಿ ಚಟುವಟಿಕೆಯಲ್ಲಿ ತೊಡಗಿಸಿಕೊಂಡಿದ್ದ ರೈತರಿಗೆ ಈಗ ಸಾಲದ ಹೊರೆಯಾಗುವ ಆತಂಕಗೊಂಡಿದ್ದಾರೆ.

ವಾರದಲ್ಲಿ ಬಿತ್ತನೆ ಮಾಡಿದ ಪ್ರದೇಶದಲ್ಲೆಲ್ಲಾ ಮೊಳಕೆ ಒಡೆಯಬೇಕಿತ್ತು, ಆದರೆ ಅಲ್ಲಲ್ಲಿ ಕೆಲ ಸಂಖ್ಯೆಯಲ್ಲಿ ಕಾಣಿಸಿಕೊಂಡಿದೆ. ಈ ಬಿತ್ತನೆ ಬೀಜದ ಗುಣಮಟ್ಟದ ಕುರಿತು ಅನುಮಾನ ಮೂಡಿದೆ ಎಂದು ರೈತ ಮಹಿಳೆಯ ಪುತ್ರ ಯುವರಾಜ ಗಡ್ಡಿ ತಿಳಿಸಿದ್ದಾರೆ.