ಸ್ಥಳಾಂತರ ಬಳಿಕ ಬದುಕು ದುರ್ಭರ: ಮೂಲಸೌಕರ್ಯ ಇಲ್ಲದೆ ಪರದಾಡುತ್ತಿರುವ ಕುಟುಂಬಗಳು

ಕಂಪ್ಲಿ: ‘ಪಟ್ಟಣದ ಹೃದಯ ಭಾಗದ ಐತಿಹಾಸಿಕ ಸೋಮಪ್ಪ ಕೆರೆ ಅಂಗಳದಲ್ಲಿ ತಲೆಮಾರುಗಳಿಂದ ವಾಸವಾಗಿದ್ದ ಸುಮಾರು 300ಕುಟುಂಬಗಳನ್ನು ಪಟ್ಟಣದ ಚಿಕ್ಕಜಾಯಿಗನೂರು ರಸ್ತೆ ಪಕ್ಕದ ಖಾಲಿ ನಿವೇಶನಕ್ಕೆ ಪುರಸಭೆ ದಶಕಗಳ ಹಿಂದೆ ಸ್ಥಳಾಂತರಿಸಿ 23ನೇ ವಾರ್ಡ್ ಸೋಮೇಶ್ವರ ಬಡವಾಣೆ ಎಂದು ನಾಮಕರಣ ಮಾಡಿದೆ. ಆದರೆ, ಅಲ್ಲಿ ನೆಲೆಸಿದ ಕುಟುಂಬಗಳಿಗೆ ಮೂಲ ಸೌಕರ್ಯಗಳನ್ನು ಕಲ್ಪಿಸದೆ ಕಡೆಗಣಿಸಲಾಗಿದ್ದು ಇಂದು ಕುಟುಂಬಗಳ ಬದುಕು ‘ಬಾಣಲೆಯಿಂದ ಬೆಂಕಿಗೆ ಬಿದ್ದಂತಾಗಿದೆ’ ಎಂಬ ಆರೋಪ ಕೇಳಿ ಬಂದಿದೆ. 

ಪ್ರಮುಖವಾಗಿ, ಮಹಿಳೆಯರ ಶೌಚಾಲಯ ದುರಸ್ತಿ ಇಲ್ಲದೆ ಹಾಳಾಗಿದ್ದು, ಸೂರ್ಯೋದಯಕ್ಕೆ ಮುನ್ನ ಮತ್ತು ಸೂರ್ಯಸ್ತದ ನಂತರ ಬಯಲು ಪ್ರದೇಶವನ್ನೇ ಆಶ್ರಯಿಸಬೇಕಾದ ‍ಪರಿಸ್ಥಿತಿ ಎದುರಾಗಿದೆ. 

ಹಾಳಾಗಿರುವ ಮಹಿಳಾ ಶೌಚಾಲಯ ಪಕ್ಕದಲ್ಲಿಯೇ ಅಂಗನವಾಡಿ ಕೇಂದ್ರವಿದ್ದು, ಅದರ ಮುಂಭಾಗದ ಬಯಲಿನಲ್ಲಿಯೇ ಕೆಲವರು ಶೌಚಾ ಮಾಡಿ ಮಲಿನ ಮಾಡುತ್ತಿದ್ದಾರೆ.

ಶುದ್ಧ ಕುಡಿಯುವ ನೀರಿನ ಘಟಕ ಹಾಳಾಗಿ ಮೂರು ವರ್ಷಗಳೇ ಕಳೆದಿವೆ. ಹಲವು ತಿಂಗಳಿಂದ ಚರಂಡಿ ತುಂಬಿ ದುರ್ವಾಸನೆ ಬೀರುತ್ತಿದೆ. ಸೊಳ್ಳೆಗಳ ಹಾವಳಿ ವಿಪರೀತವಾಗಿರುವುದರಿಂದ ಸಂಜೆಯಾಗುತ್ತಿದ್ದಂತೆ ಯಾರು ಮನೆಯಿಂದ ಹೊರಗಡೆ ಬಾರದಂತಾಗಿದೆ. ವಾಸದ ಮನೆಗಳ ಸುತ್ತಲು ಭತ್ತದ ಗದ್ದೆಗಳಿರುವುದರಿಂದ ಬಡಾವಣೆ ದ್ವೀಪ ಪ್ರದೇಶದಂತೆ ಇದ್ದು, ವಿಷಜಂತುಗಳ ಹಾವಳಿ ಮೇರೆ ಮೇರುತ್ತಿದೆ. ಅಂಗನವಾಡಿ ಕೇಂದ್ರದ ಮುಂದೆ ಉದ್ಯಾನವಿದೆಯಾದರೂ ಅಭಿವೃದ್ಧಿಯಾಗಿಲ್ಲ. ಮುಳ್ಳು ಗಂಟಿ ಬೆಳೆದಿದೆ. ಅಂಗನವಾಡಿ ಬಳಿಯ ಝಂಡಾ ಕಟ್ಟೆ ಬಳಿ ಕಿರು ನೀರು ಪೂರೈಕೆ ಟ್ಯಾಂಕ್ ಇದ್ದು, ದುರಸ್ತಿ ಇಲ್ಲದೆ ಪಾಳು ಬಿದ್ದಿದೆ.

ಇಲ್ಲಿ ನೆಲೆಸಿರುವ ಎಲ್ಲ ಕುಟುಂಬಗಳು ಕೂಲಿ ಮಾಡಿ ದೈನಂದಿನ ಜೀವನ ನಡೆಸುತ್ತಿದ್ದಾರೆ.

ವೈಯಕ್ತಿಕ ಶೌಚಾಲಯ ನಿರ್ಮಾಣಕ್ಕೆ,  ಇನ್ನು ಕೆಲವರು ಮನೆ, ನಿವೇಶನಕ್ಕೆ ಅರ್ಜಿ ಸಲ್ಲಿಸಿ ರೋಸಿ ಹೋಗಿದ್ದಾರೆ. ಶುದ್ಧ ಕುಡಿಯುವ ನೀರಿಗಾಗಿ ಒಂದೂವರೆ ಕಿ.ಮೀ ದೂರದ ಸಕ್ಕರೆ ಕಾರ್ಖಾನೆ ಬಳಿಗೆ ಹೋಗಬೇಕಾಗಿದೆ. ಅದೇ ರೀತಿ ಪ್ರಾಥಮಿಕ, ಪ್ರೌಢ ಶಾಲಾ ಮಕ್ಕಳು ನಿತ್ಯ ಒಂದೂವರೆ ಕಿ.ಮೀ ಕ್ರಮಿಸಬೇಕು. ಅಂಗನವಾಡಿ ಕೇಂದ್ರಕ್ಕೆ ಆವರಣ ಗೋಡೆ ಇಲ್ಲದ ಕಾರಣ ಸುತ್ತಲು ಕೊಳಕು ವಾತಾವರಣವಿದೆ.

ಸ್ಥಳೀಯ ಚುನಾವಣೆ ಬಂದಾಗ ಅಭ್ಯರ್ಥಿಗಳು ಕೈಮುಗಿದು ಕಾಲಿಗೆ ಬಿದ್ದು, ಮತ ಪಡೆದು ಗೆದ್ದ ಬಳಿಕ ನಮ್ಮನ್ನು ಮರೆತು ಬಿಡುತ್ತಾರೆ ಎಂದು ನಿವಾಸಿಗಳು ಆರೋಪಿಸಿದರು.

ಸ್ಥಳಾಂತರ ನಂತರ 234ಜನರಿಗೆ ನಿವೇಶನ ಹಕ್ಕು ಪತ್ರ ಪುರಸಭೆ ನೀಡಿದೆ. ಬಾಕಿ 16ಹಕ್ಕುಪತ್ರ ಇನ್ನು ಅತಂತ್ರ ಸ್ಥಿತಿಯಲ್ಲಿವೆ.

ನಮ್ಮ ದೈನಂದಿನ ಜೀವನಕ್ಕೆ ಕನಿಷ್ಠ ಮೂಲ ಸೌಕರ್ಯಗಳನ್ನು ಕಲ್ಪಿಸುವಂತೆ ಪುರಸಭೆ ಆಡಳಿತ ಮಂಡಳಿಗೆ ಅನೇಕ ಬಾರಿ ಮನವಿ ಮಾಡಿದರು ‘ನರಿ ಕೂಗು ಗಿರಿ ಮುಟ್ಟಿತೇ’ ಎನ್ನುವಂತಾಗಿದೆ ನಮ್ಮ ಸ್ಥಿತಿ ಎಂದು ಅಲ್ಲಿಯ ನಿವಾಸಿಗಳು ಬೇಸರದಿಂದ ತಿಳಿಸುತ್ತಾರೆ.

ಸ್ಥಳೀಯರು ಏನಂತಾರೆ?

ಜನಪ್ರತಿನಿಧಿಗಳು ಹೇಳುವುದೇನು?