ಕುಡತಿನಿಯಲ್ಲಿ ಹೆಚ್ಚಾದ ಬೀದಿ ನಾಯಿಗಳ ದಾಳಿ: ಕ್ರಮಕೈಗೊಳ್ಳಲು ಜನರ ಆಗ್ರಹ

ಕುಡತಿನಿ (ಸಂಡೂರು): ಪಟ್ಟಣದಲ್ಲಿನ ಬೀದಿ ನಾಯಿಗಳು ಸಾರ್ವಜನಿಕರ ಮೇಲೆ ನಿರಂತರವಾಗಿ ದಾಳಿ ನಡೆಸಿ ಕಚ್ಚುವುದರಿಂದ ಪಟ್ಟಣದಲ್ಲಿನ ಮಕ್ಕಳು, ಮಹಿಳೆಯರು, ವೃದ್ಧರು ಹೆಚ್ಚಿನ ಆತಂಕಕ್ಕೆ ಒಳಗಾಗಿ ಪ್ರಾಣಭಯದಲ್ಲೆ ಸಂಚರಿಸುವಂತಾಗಿದೆ.

ಹತ್ತು ದಿನಗಳಲ್ಲಿ ಶಾಲಾ ಮಕ್ಕಳು, ಆಶಾಕಾರ್ಯಕರ್ತೆ ಸೇರಿ ಒಟ್ಟು ಏಳು ಜನರ ಮೇಲೆ ಬೀದಿ ನಾಯಿಗಳು ಸಾರ್ವಜನಿಕ ಸ್ಥಳಗಳಲ್ಲಿ ದಾಳಿ ನಡೆಸಿ, ಕಚ್ಚಿದ್ದರಿಂದ ಎಲ್ಲರು ಸರ್ಕಾರಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆದು ಮನೆಗೆ ತೆರಳಿದ್ದಾರೆ.

ಆ.8ರಂದು ಪಟ್ಟಣದ ರಾಘವೇಂದ್ರ ಕಾಲೊನಿಯಲ್ಲಿ ಶಾಲಾ ಬಾಲಕ ಸೇರಿ ಮೂರು ಜನರ ಮೇಲೆ ಬೀದಿ ನಾಯಿಯು ದಾಳಿ ನಡೆಸಿ ಕಚ್ಚಿತ್ತು. ನಂತರ ಆ.17ರಂದು ಪಟ್ಟಣದ ಎಸ್‍ಬಿಐ ಬ್ಯಾಂಕ್, ನಾಲ್ಕನೇ ವಾರ್ಡ್‍ನ ಅಂಗನವಾಡಿ ಕೇಂದ್ರ, 17ನೇ ವಾರ್ಡ್‍ನ ಅಂಬೇಡ್ಕರ್ ವೃತ್ತ ಸೇರಿದಂತೆ ಇತರೆ ಕಡೆಗಳಲ್ಲಿ ಬೀದಿ ನಾಯಿಗಳು ದಾಳಿ ನಡೆಸಿ ಶಾಲಾ ಮಕ್ಕಳು, ಒಬ್ಬ ಆಶಾಕಾರ್ಯಕರ್ತೆ ಸೇರಿ ಒಟ್ಟು ನಾಲ್ಕು ಜನರಿಗೆ ಏಕಕಾಲಕ್ಕೆ ಕಚ್ಚಿದ್ದರಿಂದ ಜನರು ಭಯಬೀತರಾಗಿದ್ದಾರೆ.

ಪಟ್ಟಣದಲ್ಲಿನ ಚಿಕನ್, ಮಟನ್, ಮೀನು, ಇತರೆ ಮಾಂಸ ಮಾರಾಟದ ಅಂಗಡಿಗಳಲ್ಲಿ, ಬೀದಿ ಬದಿಯ ಫಾಸ್ಟ್‌ಪುಡ್‍ಗಳ ಬಳಿಯಲ್ಲಿ ಬಿದ್ದಿರುವ ಆಹಾರಕ್ಕಾಗಿ ಬೀದಿ ನಾಯಿಗಳು ಗುಂಪು ಗುಂಪಾಗಿ ಸೇರಿ ಆಹಾರಕ್ಕಾಗಿ ಕಚ್ಚಾಡುವುದು, ಜನರ ಮೇಲೆ ದಾಳಿ ನಡೆಸುವುದು ಸಾಮಾನ್ಯವಾಗಿದೆ.

ಮಾಂಸದ ರುಚಿ ಕಂಡಿರುವ ನಾಯಿಗಳು ರಸ್ತೆಯಲ್ಲಿ ಸಂಚರಿಸುವ ಜನರ ಮೇಲೆ ಏಕಾಏಕಿ ದಾಳಿ ನಡೆಸಿ ಕಚ್ಚುವುದು, ಮಾಂಸದ ಅಂಗಡಿ, ಬೀದಿ ಬದಿಯ ಹೋಟೆಲ್ ಮಾಲಿಕರು ವ್ಯರ್ಥವಾದ ಆಹಾರವನ್ನು ಸರಿಯಾಗಿ, ವ್ಯವಸ್ಥಿತವಾಗಿ ದೂರದ ಸ್ಥಳಗಳಿಗೆ ವಿಲೆವಾರಿ ಮಾಡದೇ ಅಲ್ಲೆ ಬಿಸಾಡುವುದರಿಂದ ಪಟ್ಟಣದಲ್ಲಿ ಬೀದಿ ನಾಯಿಗಳು ಸಂಖ್ಯೆಯು ಹೆಚ್ಚಳವಾಗುವುದಕ್ಕೆ ಪ್ರಮುಖ ಕಾರಣವಾಗಿದೆ.

ಪಟ್ಟಣದಲ್ಲಿನ ಬೀದಿ ನಾಯಿಗಳು ಸಾರ್ವಜನಿಕ ವಾಸದ ಮನೆಗಳ ಬಳಿ, ಓಣಿಗಳಲ್ಲಿ ಹೆಚ್ಚಾಗಿ ಸಂಚಾರ ಮಾಡುವುದು, ಕಸ, ಇತರೆ ತ್ಯಾಜ್ಯದ ಸಂಗ್ರಹದ ಸ್ಥಳಗಳಲ್ಲಿ ವಾಸಮಾಡುವುದರಿಂದ ಮಕ್ಕಳು, ಮಹಿಳೆಯರು, ವೃದ್ಧರು ಪ್ರಾಣ ಭಯದಿಂದ ಸಂಚರಿಸಬೇಕಾಗಿದೆ.

ನಾಯಿಗಳ ಹಾವಳಿಯ ನಿಯಂತ್ರಣಕ್ಕಾಗಿ ಪಟ್ಟಣ ಪಂಚಾಯಿತಿಯವರು ಹೆಣ್ಣು ನಾಯಿಗಳಿಗೆ ಸಂತಾನಹರಣ ಚಿಕಿತ್ಸೆ ಮಾಡಿಸಬೇಕು. ಜನರ ಸಂರಕ್ಷಣೆಯ ದೃಷ್ಠಿಯಿಂದ ಬೀದಿ ನಾಯಿಗಳಿಗೆ ರೇಬಿಸ್ ವ್ಯಾಕ್ಸಿನ್ ಕಡ್ಡಾಯವಾಗಿ ಹಾಕಬೇಕು ಎಂದು ಪಟ್ಟಣದ ಜನರ ಒತ್ತಾಯವಾಗಿದೆ.