ಕಳವು; ಮೂರು ವರ್ಷ ಜೈಲು

ಹೊಸಪೇಟೆ: ಕಳವು ಪ್ರಕರಣಕ್ಕೆ ಸಂಬಂಧಿಸಿದಂತೆ ಇಲ್ಲಿನ ಹೆಚ್ಚುವರಿ ಸಿಜೆ ಮತ್ತು ಜೆಎಂಎಫ್‌ಸಿ ನ್ಯಾಯಾಲಯವು ವ್ಯಕ್ತಿಗೆ ಮೂರು ವರ್ಷ ಜೈಲು ಶಿಕ್ಷೆ ಹಾಗೂ ₹3,000 ದಂಡ ವಿಧಿಸಿ ಸೋಮವಾರ ಆದೇಶ ಹೊರಡಿಸಿದೆ.

ನಗರದ ಹಾರೂನ್‌ ರಶೀದ್‌ಗೆ ಶಿಕ್ಷೆ ವಿಧಿಸಿ ನ್ಯಾಯಾಧೀಶೆ ತೃಪ್ತಿ ಧರಣಿ ಆದೇಶ ಹೊರಡಿಸಿದ್ದಾರೆ. ನಗರದ ಗಾಂಧಿ ಕಾಲೊನಿಯ ಗೋವಿಂದರಾಜ ಶೇಲಟ್‌ ಎಂಬುವರ ಮನೆಯಲ್ಲಿ 2014ರ ಫೆಬ್ರುವರಿ 8ರಂದು ರಶೀದ್‌ ₹4.68 ಲಕ್ಷ ಮೌಲ್ಯದ ಚಿನ್ನಾಭರಣ ಕಳವು ಮಾಡಿದ್ದ. ಪ್ರಕರಣ ದಾಖಲಿಸಿಕೊಂಡು ತನಿಖೆ ನಡೆಸಿದ ಟಿ.ಬಿ. ಡ್ಯಾಂ ಠಾಣೆಯ ಸಿಪಿಐ ಎಸ್‌.ಕೆ. ಪ್ರಹ್ಲಾದ್‌, ದೋಷಾರೋಪ ಪಟ್ಟಿ ಸಲ್ಲಿಸಿದ್ದರು. ಸರ್ಕಾರಿ ಅಭಿಯೋಜಕರಾಗಿ ಗೀತಾ ಎಸ್‌. ಮಿರಜಕರ್‌ ವಾದ ಮಂಡಿಸಿದ್ದಾರೆ.