ಹೊಸಕೋಟೆ: ಗುಂಡಿಗಳ ಸಾಮ್ರಾಜ್ಯಕ್ಕೆ ಸಿಗವುದೇ ಮುಕ್ತಿ?

ಹೊಸಕೋಟೆ: ನಗರ ಮತ್ತು ನಗರಕ್ಕೆ ಹೊಂದಿಕೊಂಡ ಹೊರವಲಯದ ರಸ್ತೆಗಳಲ್ಲಿ ವಾಹನ ಸಂಚಾರ ಮತ್ತು ಪಾದಚಾರಿಗಳ ಓಟಾಟ ಸ್ವಲ್ಪವೂ ಸುರಕ್ಷಿತವಲ್ಲ. ಯಾವುದೇ ಅಪಘಾತ ಸಂಭವಿಸಿದರೆ ಆಸ್ಪತ್ರೆ ಸೇರುವುದು ಖಚಿತ ಎನ್ನುವಂತಿದೆ ಇಲ್ಲಿನ ಪರಿಸ್ಥಿತಿ. ಎಲ್ಲಿ ನೋಡಿದರೂ ಗುಂಡಿಗಳದ್ದೆ ಸಾಮ್ರಾಜ್ಯ. ಚರಂಡಿ ನೀರು ತುಂಬಿ ಇದು ರಸ್ತೆಯೋ ಅಥವಾ ಚರಂಡಿಯೋ ಎನ್ನುವಂತಹ ದುಸ್ಥಿತಿ ಇಲ್ಲಿದೆ.

ಇಂತಹ ರಸ್ತೆಗಳಲ್ಲಿ ಪ್ರತಿದಿನ ದ್ವಿಚಕ್ರ ವಾಹನಗಳಲ್ಲಿ ಕಚೇರಿಗೆ ಹೋಗುವವರ ಸ್ಥಿತಿ ನರಕತಯಾತನೆ. ಶಾಲಾ–ಕಾಲೇಜುಗಳಿಗೆ ತೆರಳುವ ಮಕ್ಕಳು ಮತ್ತು ಹಿರಿಯರು ಪ್ರತಿದಿನವೂ ಪರದಾಡಬೇಕಾಗಿದೆ.

ಎಲ್ಲೆಲ್ಲಿ ಕಚ್ಚಾ ರಸ್ತೆಗಳಿವೆ: ನಗರಸಭೆ ಮತ್ತು ಪಂಚಾಯಿತಿ ವ್ಯಾಪ್ತಿಗೆ ಬರುವ ಸಂಗೊಳ್ಳಿ ರಾಯಣ್ಣ ಸರ್ಕಲ್ ಬಳಿಯ ಕೆಲವು ಓಣಿಗಳು. 29 ಮತ್ತು 31ನೇ ವಾರ್ಡ್‌ನ ಕೆಲ ಓಣಿ. ಮುನಿಯಪ್ಪ ಬಡಾವಣೆ, ಮಲ್ಲಣ್ಣ ಬಡಾವಣೆ, ಭಜಂತ್ರಿ ಬಡಾವಣೆ, ಪಾರ್ವತಿ ನಗರ, ಅನ್ನಪೂರ್ಣೇಶ್ವರಿ ನಗರ, ಕಮ್ಮವಾರಿ ನಗರದ ಚೌಡೇಶ್ವರಿ ದೇವಾಲಯದ ರಸ್ತೆ ಮತ್ತು ಕೆಲವು ಓಣಿ.

23ನೇ ವಾರ್ಡ್‌ನ ಕೆಲ ಓಣಿ. ಗಣಗಲು ರಸ್ತೆ, ರಾಘವೇಂದ್ರ ಟಾಕೀಸ್ ಸರ್ಕಲ್ ಬಳಿ ಕೆಲ ಓಣಿಯಲ್ಲಿ ಕಚ್ಚಾ ರಸ್ತೆಗಳು ಇವೆ. ನಗರಕ್ಕೆ ಹೊಂದಿಕೊಂಡ ಪಂಚಾಯಿತಿ ವ್ಯಾಪ್ತಿಯ ಕೆಲವು ಬಡಾವಣೆಗಳ ಓಣಿಗಳ ಸ್ಥಿತಿಯೂ ಇದೇ ರೀತಿ ಇದೆ.  

ಕಮ್ಮವಾರಿ ನಗರದ 29ನೇ ವಾರ್ಡ್‌ನ ಚೌಡೇಶ್ವರಿ ದೇವಸ್ಥಾನಕ್ಕೆ ಹೋಗುವ ರಸ್ತೆ ಡಾಂಬರಿಕರಣ ಕಂಡು ಎಷ್ಟೋ ವರ್ಷಗಳಾಗಿವೆ ಎನ್ನುತ್ತಾರೆ ಸ್ಥಳೀಯರು. ಇದೇ ರಸ್ತೆಯಲ್ಲೇ ಕಾಲ್ಡ್ ವೆಲ್ ಅಕಾಡೆಮಿ ಮತ್ತು ಮೇಧಶ್ರೀ ಎಂಬ ಎರಡು ಪ್ರಾಥಮಿಕ ಮತ್ತು ಪ್ರೌಢ ಶಾಲೆಗಳಲ್ಲಿ ಸುಮಾರು 1000ಕ್ಕೂ ಹೆಚ್ಚು ವಿದ್ಯಾರ್ಥಿಗಳು ವಿದ್ಯಾಭ್ಯಾಸ ಮಾಡುತ್ತಿದ್ದಾರೆ. ಪ್ರತಿದಿನ ಬೆಳಿಗ್ಗೆ ಈ ಹದಗೆಟ್ಟ ರಸ್ತೆಯಲ್ಲಿಯೇ ದ್ವಿಚಕ್ರ ವಾಹನಗಳಲ್ಲಿ ತಮ್ಮ ಮಕ್ಕಳನ್ನು ಬಿಡಲು ಬರುವ ಪಾಲಕರ ಪರಿಸ್ಥಿತಿಯಂತೂ ಹೇಳತೀರದು ಎನ್ನುತ್ತಾರೆ ಸ್ಥಳೀಯರು.

ಶಾಸಕರು, ನಗರಸಭೆ, ತಹಶೀಲ್ದಾರ್‌ ಅವರಿಗೆ ಮನವಿ ಸಲ್ಲಿಸಿದರೂ ಯಾವುದೇ ಪರಿಣಾಮವಾಗಿಲ್ಲ. ಚುನಾವಣೆ ಸಮಯದಲ್ಲಿ ಮಾತ್ರ ಚುನಾಯಿತ ಪ್ರತಿನಿಧಿಗಳು ‘ಒಂದು ತಿಂಗಳಲ್ಲೇ ಎಲ್ಲವೂ ಸರಿಹೋಗುತ್ತೆ’ ಎಂದು ದಶಕಗಳ ಕಾಲ ಭರವಸೆ ನೀಡುತ್ತಾ ಬಂದಿದ್ದಾರೆ. ಆದರೆ, ಯಾವುದೂ ಈಡೇರಿಲ್ಲ ಎಂದು ಸ್ಥಳೀಯರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಸ್ವಂತ ಹಣದಲ್ಲಿ ಮಣ್ಣು ಹಾಕಿಸಿಕೊಳ್ಳುವ, ಹದಗೆಟ್ಟ ಜಾಗಕ್ಕೆ ಸಿಮೆಂಟ್‌ನಿಂದ ತೇಪೆ ಹಾಕಿಸಿಕೊಳ್ಳುವ ಪರಿಸ್ಥಿತಿ ಇದೆ. ಮಳೆನೀರು ನಿಂತು ಕೆಸರು ರಾಡಿಯಾಗುವುದು, ಅಧ್ವಾನಗೊಂಡ ಚರಂಡಿಗಳಿಂದ ಕಲುಷಿತ ನೀರು ಮಣ್ಣಿನ ರಸ್ತೆಗೆ ಸೇರುವುದು ಮಾಮೂಲಿ ಆಗಿದೆ ಎನ್ನುತ್ತಾರೆ ಸ್ಥಳೀಯರು.