ಅನಗೊಂಡನಹಳ್ಳಿ | ಇಚ್ಛಾಸಕ್ತಿ ಕೊರತೆ: ಅವಸಾನದತ್ತ ಮಲ್ಲಸಂದ್ರ ಕೆರೆ

ಅನಗೊಂಡನಹಳ್ಳಿ(ಹೊಸಕೋಟೆ): ಒತ್ತುವರಿ ಕಾಟ, ಕೆರೆ ಅಂಗಳದಲ್ಲೇ ಕಸ ವಿಲೇವಾರಿ, ಜನಪ್ರತಿನಿಧಿ ಹಾಗೂ ಅಧಿಕಾರಿಗಳ ನಿರ್ಲಕ್ಷ್ಯ...

–ಇವುಗಳಿಂದ ಹೊಸಕೋಟೆ ತಾಲ್ಲೂಕಿನ ಅನಗೊಂಡನಹಳ್ಳಿ ಹೋಬಳಿಯ ಸಮೇತನಹಳ್ಳಿ ಪಂಚಾಯಿತಿ ವ್ಯಾಪ್ತಿ ವ್ಯಾಪ್ತಿಯ ಕೆ.ಮಲ್ಲಸಂದ್ರದ ಕೆರೆ ನಲುಗಿ ಹೋಗಿದ್ದು, ಜೀವನಾಡಿಯ ಅಸ್ತಿತ್ವಕ್ಕೆ ಕುತ್ತು ಬಂದಿದೆ.

ಒತ್ತುವರಿ ಹಾವಳಿ ಒಂದೆಡೆಯಾದರೆ ಕೆರೆ ಅಂಗಳದಲ್ಲಿ ಗಿಡಗೆಂಟಿ ಬೆಳೆದು ಕೆರೆ ಸ್ವರೂಪವೇ ಹಾಳಾಗಿದೆ. ಕೆರೆ ನೀರು ಹಸಿರು ಬಣ್ಣಕ್ಕೆ ತಿರುಗಿ ದುರ್ನಾತ ಬೀರುತ್ತಿದೆ. ಕೆರೆ ಏರಿ ಮೇಲೆ ಕಸ ಸುರಿಯುವುದರಿಂದ ಆ ಕಸವೆಲ್ಲ ಕೆರೆ ನೀರಿಗೆ ಸೇರು ಕೊಳೆಯುತ್ತಿದ್ದು, ಸಂಪೂರ್ಣವಾಗಿ ಕುಲುಷಿತವಾಗಿದೆ. ಒಂದು ಕಾಲದಲ್ಲಿ ಈ ಭಾಗದ ಜೀವನಾಡಿಯಾಗಿದ್ದ ಕೆರೆ ಈಗ ಅವಸಾನದತ್ತ ಮುಖ ಮಾಡಿದೆ.

ಭಕ್ತರಹಳ್ಳಿ ರಸ್ತೆಗೆ ಹೊಂದಿಕೊಂಡ ಮತ್ತು ಕೆರೆ ಕೊಡಿಯ ಭಾಗ ಒತ್ತುವರಿಯಾಗಿತ್ತಿದೆ. ಬಿಲ್ಡರ್, ರಿಯಲ್ ಎಸ್ಟೇಟ್ ದಂಧೆಕೋರರ ಹಾವಳಿಗೆ ತುತ್ತಾಗಿ ವಿಲ್ಲಾ, ಅಪಾರ್ಟ್‌ಮೆಂಟ್‌, ಖಾಸಗಿ ಕಂಪನಿಗಳು ತಲೆ ಎತ್ತುತ್ತಿದ್ದರು. ನೋಡಿಯೂ ನೋಡದಂತೆ ಅಧಿಕಾರಿಗಳು ಜಾನ ಕುರುಡತನ ಪ್ರದರ್ಶಿಸುತ್ತಿದ್ದಾರೆ. 

ಕೆರೆ ಅಂಗಳದಲ್ಲೇ ಕಸ: 

ಮಲ್ಲಸಂದ್ರ ಗ್ರಾಮದ ಪ್ಲಾಸ್ಟಿಕ್, ಕಸ ಮತ್ತು ಚರಂಡಿ ನೀರು ಕೆರೆ ಸೇರುತ್ತಿದೆ. ಇದರಿಂದ ಇಡೀ ಕೆರೆಯೇ ಗಬ್ಬು ನಾರುತ್ತಿದೆ. ಕೆರೆಯ ದಂಡೆ, ಅಂಗಳ, ಕೊಡಿ ಹೀಗೆ ಎಲ್ಲಿ ನೋಡಿದರೂ ಗಲೀಜು ಆವರಿಸಿದೆ. ಇದರಿಂದ ಕೆರೆ ನೀರು ಮಾಲಿನ್ಯವಾಗಿ, ಅಂತರ್ಜಲವು ಕಲುಷಿತಗೊಂಡಿದೆ.

ಕೆರೆ ಹೂಳು ತೆಗೆದು ದಶಕಗಳೇ ಕಳೆದಿದೆ. ಇದರಿಂದ ಹೂಳು ತುಂಬಿಕೊಂಡು, ಗಿಡಗೆಂಟಿ ಬೆಳೆದು ಕೆರೆ ಒಳಗೆ ಪಾಚಿ ಬೆಳೆದಿದೆ. ಇದರಿಂದ ಕೆರೆ ಅಸ್ತಿತ್ವಕ್ಕೆ ಧಕ್ಕೆಯಾಗಿದೆ.