ಚನ್ನಮ್ಮನ ಕಿತ್ತೂರು | ಬಿಎಸ್‌ಎಫ್ ಯೋಧ ಸಾವು

ಚನ್ನಮ್ಮನ ಕಿತ್ತೂರು: ಗಡಿ ಭದ್ರತಾ ಪಡೆಯಲ್ಲಿ ಯೋಧನಾಗಿ ಸೇವೆ ಸಲ್ಲಿಸುತ್ತಿದ್ದ ತಾಲ್ಲೂಕಿನ ಗಿರಿಯಾಲ ಕೆ.ಎ ಗ್ರಾಮದ ಉದಯ ಪುಂಡಲೀಕಪ್ಪ ಗಾಳಿ (40) ಅನಾರೋಗ್ಯ ಕಾರಣದಿಂದ ತ್ರಿಪುರಾದಲ್ಲಿ ಬುಧವಾರ ಬೆಳಿಗ್ಗೆ ನಿಧನರಾದರು.

ಅವರಿಗೆ ತಂದೆ, ತಾಯಿ, ಪತ್ನಿ, ಪುತ್ರ, ಇಬ್ಬರು ಪುತ್ರಿಯರು ಇದ್ದಾರೆ. 17 ವರ್ಷಗಳಿಂದ ಅವರು ಬಿಎಸ್ಎಫ್‌ನಲ್ಲಿ ಸೇವೆ ಸಲ್ಲಿಸಿದ್ದಾರೆ. ಆರು ತಿಂಗಳ ಹಿಂದಷ್ಟೆ ಕಾಶ್ಮೀರದಿಂದ ತ್ರಿಪುರಾಕ್ಕೆ ಅವರ ವರ್ಗಾವಣೆ ಆಗಿತ್ತು.

‘ಅವರು ಜ್ವರದಿಂದ ಬಳಲುತ್ತಿದ್ದರು ಎಂದು ಹಿರಿಯ ಅಧಿಕಾರಿಗಳಿಂದ ಮಾಹಿತಿ ಲಭ್ಯವಾಗಿದೆ. ತ್ರಿಪುರಾ ಆಸ್ಪತ್ರೆಯಲ್ಲಿ ಮರಣೋತ್ತರ ಪರೀಕ್ಷೆ ನಡೆಸಲಾಗಿದೆ. ವಿಮಾನದ ಮೂಲಕ ಬೆಂಗಳೂರಿಗೆ ಪಾರ್ಥಿವ ಶರೀರ ಬುಧವಾರ ತಡರಾತ್ರಿ ಬರಲಿದ್ದು, ಗುರುವಾರ ಗಿರಿಯಾಲ ಕೆಎ ಗ್ರಾಮಕ್ಕೆ ಬರಲಿದೆ’ ಎಂದು ಕುಟುಂಬದ ಮೂಲಗಳು ತಿಳಿಸಿವೆ.