ಅಥಣಿಯಲ್ಲಿ ಪುನುಗು ಬೆಕ್ಕು ಪತ್ತೆ

ಅಥಣಿ (ಬೆಳಗಾವಿ ಜಿಲ್ಲೆ): ಅಥಣಿ ಪಟ್ಟಣದ ಹೊರವಲಯದಲ್ಲಿನ ಕೃಷ್ಣಾ ಬಡಾವಣೆಯಲ್ಲಿ ಭಾನುವಾರ ರಾತ್ರಿ ಪುನುಗು ಬೆಕ್ಕು (ಸಿವೆಟ್‌ ಕ್ಯಾಟ್‌) ಪತ್ತೆಯಾಗಿದೆ. ಸೋಮವಾರ ಸ್ಥಳಕ್ಕೆ ಬಂದ ಅರಣ್ಯ ಇಲಾಖೆ ಸಿಬ್ಬಂದಿ ಬೆಕ್ಕನ್ನು ರಕ್ಷಿಸಿ ಅರಣ್ಯಕ್ಕೆ ಬಿಟ್ಟರು.

ಭಾನುವಾರ ರಾತ್ರಿ ಅಥಣಿ ಪಟ್ಟಣದಲ್ಲಿ ಓಡಾಡಿದ ಈ ವಿಶೇಷ ಬೆಕ್ಕನ್ನು ಕಂಡು ಜನ ಬೆರಗಾದರು. ಚಿರತೆಯ ಮರಿಯ ಮೈಮಾಟ ಹೊಂದಿದ್ದರಿಂದ ಅದರ ‍ಫೋಟೊ ತೆಗೆಯಲು ಮುಗಿಬಿದ್ದರು.

ಮತ್ತೆ ಕೆಲ ಯುವಕರು ಸೇರಿಕೊಂಡು ಕೋಳಿ ಸಾಕಣೆ ಮಾಡುವ ಪಂಜರದಲ್ಲಿ ಬೆಕ್ಕನ್ನು ಹಿಡಿದಿಟ್ಟರು. ಬೆಳಿಗ್ಗೆ ಅರಣ್ಯ ಇಲಾಖೆ ಅಧಿಕಾರಿಗಳಿಗೆ ಒಪ್ಪಿಸಿದರು.

‘ಇಂಥ ಕಾಡುಬೆಕ್ಕು ಈ ಪ್ರದೇಶದಲ್ಲಿ ಬಹಳ ಅಪರೂಪ. ಎಲ್ಲಿಂದಲೋ ತಪ್ಪಿಸಿಕೊಂಡು ಇಲ್ಲಿಗೆ ಬಂದಿದೆ. ಬೆಕ್ಕನ್ನು ಮತ್ತೆ ಕಾಡಿನಲ್ಲಿ ಬಿಡಲಾಗುವುದು’ ಎಂದು ಅರಣ್ಯಾಧಿಕಾರಿ ಪ್ರಶಾಂತ ಗಾಣಿಗೇರ ಮಾಹಿತಿ ನೀಡಿದರು.