‘ನಂದಿನಿ’ ಹಾಲು ಸರಬರಾಜಿಗೆ ಕ್ರಮ

ಬೆಳಗಾವಿ: ‘ಜಿಲ್ಲೆಯಾದ್ಯಂತ ಕೊರೊನಾ ವೈರಾಣು ಸೋಂಕು ಹರಡದಂತೆ ತಡೆಯಲು ಜಾರಿಗೊಳಿಸಲಾಗಿರುವ ಕರ್ಫ್ಯೂ ನಡುವೆಯೂ ಗ್ರಾಹಕರಿಗೆ ‘ನಂದಿನಿ’ ಹಾಲು ಸರಬರಾಜಿನಲ್ಲಿ ತೊಂದರೆಯಾಗದಂತೆ ನೋಡಿಕೊಳ್ಳಲಾಗುತ್ತಿದೆ’ ಎಂದು ಜಿಲ್ಲಾ ಸಹಕಾರಿ ಹಾಲು ಉತ್ಪಾದಕರ ಸಂಘಗಳ ಒಕ್ಕೂಟದ ವ್ಯವಸ್ಥಾಪಕ ನಿರ್ದೇಶಕ ಉಬೇದುಲ್ಲಾ ಖಾನ್‌ ತಿಳಿಸಿದ್ದಾರೆ.

‘ಅಗತ್ಯ ಸೇವಾ ವಸ್ತುಗಳಲ್ಲಿ ಹಾಲು ಸಹ ಸೇರಿದೆ. ಗ್ರಾಕಕರು, ಎಂದಿನಂತೆ ‘ನಂದಿನಿ’ ಹಾಲನ್ನು ನಿಗದಿತ ಸಮಯಕ್ಕೆ ಯಾವುದೇ ಆತಂಕವಿಲ್ಲದೆ ಖರೀದಿಸಲು ಅನುಕೂಲ ಮಾಡಿಕೊಡಲು ವ್ಯವಸ್ಥೆ ಕೈಗೊಳ್ಳಲಾಗಿದೆ. ಅಧಿಕೃತ ಡೀಲರ್‌ಗಳು, ಕ್ಷೀರ ಕೇಂದ್ರಗಳು, ಫ್ರಾಂಚೈಸಿಗಳ ಮೂಲಕ ಜನರು ಎಂದಿನಂತೆ ಗರಿಷ್ಠ ಮಾರಾಟ ದರದಲ್ಲಿ (ಎಂಆರ್‌ಪಿ) ಹಾಲು ಖರೀದಿಸಬಹುದಾಗಿದೆ. ಬೇಡಿಕೆಗೆ ತಕ್ಕಂತೆ ಪೂರೈಕೆ ಮಾಡಲಾಗುತ್ತಿದೆ’ ಎಂದು ಮಾಹಿತಿ ನೀಡಿದ್ದಾರೆ.