ಬೆಳಗಾವಿ: ₹25 ಲಕ್ಷ ನಗದು ಕಳವು

ಬೆಳಗಾವಿ: ಇಲ್ಲಿನ ಶಾಹೂ ನಗರದ ಡಾಲರ್ಸ್‌ ಕಾಲೊನಿಯಲ್ಲಿ ಶನಿವಾರ ಹಿಂಬಾಗಿಲಿನ ಚಿಲಕ ಮುರಿದು ಮನೆಗೆ ನುಗ್ಗಿದ ಕಳ್ಳರು, ₹25 ಲಕ್ಷ ನಗದು ಇರಿಸಿದ್ದ ಬ್ಯಾಗ್‌ ಕದ್ದು ಪರಾರಿಯಾಗಿದ್ದಾರೆ.

‘ರಿಯಲ್‌ ಎಸ್ಟೇಟ್‌ ಉದ್ಯಮಿ ಮನೋಹರ ಯಳ್ಳೂರಕರ ಅವರು, ಆಸ್ತಿ ಮಾರಾಟದಿಂದ ಬಂದ ₹25 ಲಕ್ಷ ಹಣವನ್ನು ಮನೆಯ ಕಪಾಟಿನಲ್ಲಿ ತಂದಿಟ್ಟಿದ್ದರು. ಅದಕ್ಕೆ ಬೀಗ ಹಾಕಿರಲಿಲ್ಲ. ಕುಟುಂಬಸ್ಥರು ಮನೆಯಿಂದ ಹೊರಹೋದ ಹತ್ತೇ ನಿಮಿಷದಲ್ಲಿ ಕಳ್ಳತನವಾಗಿದೆ. ಪರಿಚಿತರೇ ಈ ಕೃತ್ಯ ಎಸಗಿರುವ ಶಂಕೆಯಿದೆ. ತನಿಖೆ ಮುಂದುವರಿಸಿದ್ದೇವೆ’ ಎಂದು ಪೊಲೀಸರು ತಿಳಿಸಿದ್ದಾರೆ. ಎಪಿಎಂಸಿ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.