ಹುಕ್ಕೇರಿ ವಿದ್ಯುತ್‌ ಸಹಕಾರ ಸಂಘದ ಚುನಾವಣೆ | ಸೋಲಾಗಿದೆ, ಮುಖಭಂಗವಾಗಿಲ್ಲ: ಸತೀಶ

ಬೆಳಗಾವಿ: ‘ಸೋಲು– ಗೆಲುವು ಬದುಕಿನಲ್ಲಿ ಸಾಮಾನ್ಯ. ಹುಕ್ಕೇರಿ ಗ್ರಾಮೀಣ ವಿದ್ಯುತ್‌ ಸಹಕಾರ ಸಂಘದಲ್ಲಿ ನಮಗೆ ಸೋಲಾಗಿದೆ. ಆದರೆ, ಇದನ್ನೇ ಮುಖಂಭಂಗ ಎಂದು ಪರಿಗಣಿಸಬೇಕಿಲ್ಲ. ನಾನು ಜಿಲ್ಲಾ ಉಸ್ತುವಾರಿ ಸಚಿವನಾಗಿದ್ದರಿಂದಲೇ ಈ ಚುನಾವಣೆಗೆ ಹೆಚ್ಚು ಮಹತ್ವ ಬಂದಿದೆ. ಚುನಾವಣೆಯಲ್ಲಿ ಸೋತರೂ ತಳಮಟ್ಟದಲ್ಲಿ ಜನರೊಂದಿಗೆ ಸಂಪರ್ಕ ಬೆಳೆಸಿಕೊಂಡಿದ್ದೇವೆ. ಅಲ್ಲಿ ಭವಿಷ್ಯ ಚೆನ್ನಾಗಿರುತ್ತದೆ’ ಎಂದು ಜಿಲ್ಲಾ ಉಸ್ತುವಾರಿ ಸಚಿವ ಸತೀಶ ಜಾರಕಿಹೊಳಿ ಹೇಳಿದರು.

ನಗರದಲ್ಲಿ ಮಂಗಳವಾರ ಮಾಧ್ಯಮದವರೊಂದಿಗೆ ಮಾತನಾಡಿದ ಅವರು, ‘ಕೆಟಗರಿ ಪ್ರಕಾರ ಏಳೆಂಟು ಸಾವಿರ ಮತ ಹಾಳಾಗಿವೆ. ಸಹಕಾರ ರಂಗ ನಮಗೆ ಹೊಸದು. ಆದರೂ ಕೂಡ ಹೆಚ್ಚು ಪ್ರಯತ್ನ ಹಾಕಿದ್ದೇವೆ. ನಾವು 12 ಸಾವಿರ ಮತ ಪಡೆದಿದ್ದೆವೆ. ಅವರು 20 ಸಾವಿರ ಪಡೆದಿದ್ದಾರೆ. ನಮ್ಮ ಕಾರ್ಯಕರ್ತರು ಮತ್ತು ಅಭ್ಯರ್ಥಿಗಳು ಇನ್ನೂ ಹೆಚ್ಚು ಸಕ್ರಿಯವಾಗಿ ಚುನಾವಣೆ ಮಾಡಬೇಕಿತ್ತು. ಮತದಾರರ ಮನವೊಲಿಸಲು ನಮಗೆ ಆಗಲಿಲ್ಲ’ ಎಂದರು.

‘ಜಾರಕಿಹೊಳಿ ಸಹೋದರರು ಲಿಂಗಾಯತ ವಿರೋಧಿಗಳು ಎಂಬುದು ಸುಳ್ಳು. ಇದು ತಾಲ್ಲೂಕಿಗೆ ಸೀಮಿತವಾದ ಚುನಾವಣೆ. ಜಿಲ್ಲೆ, ರಾಜ್ಯಕ್ಕೆ ಸಂಬಂಧಿಸಿದ್ದಲ್ಲ. ವಿರೋಧಿಗಳು ಹುಕ್ಕೇರಿಯಲ್ಲಿ ಮಾತ್ರ ಯಶಸ್ವಿಯಾಗಿದ್ದಾರೆ. ಬೇರೆ ತಾಲ್ಲೂಕಿಗೆ ಅದು ಅನ್ವಯಿಸುವುದಿಲ್ಲ’ ಎಂದರು.

‘ರಮೇಶ ಕತ್ತಿ ನಮ್ಮ ಕುಟುಂಬದ ಬಗ್ಗೆ ತೀರ ವೈಯಕ್ತಿಕ ನಿಂದನೆ ಮಾಡಿದ್ದಾರೆ. ಅವರು ತಮ್ಮ ಘನತೆ, ವ್ಯಕ್ತಿತ್ವಕ್ಕೆ ತಕ್ಕಂತೆ ಮಾತಾಡಬೇಕು. ಅವರ ಇಡೀ ಕುಟುಂಬ ರಾಜಕಾರಣದಲ್ಲಿದೆ. ಬಾಯಿ ಇದೆ ಎಂಬ ಕಾರಣಕ್ಕೆ ಏನೇನೋ ಮಾತಾಡಬಾರದು’ ಎಂದೂ ಕಿಡಿ ಕಾರಿದರು.

ಗೋಕಾಕ, ಅರಭಾವಿ ಕ್ಷೇತ್ರಗಳಿಗೆ ನುಗ್ಗುತ್ತೇನೆ ಎಂಬ ರಮೇಶ ಕತ್ತಿ ಮಾತಿಗೆ ಪ್ರತಿಕ್ರಿಯಿಸಿದ ಸಚಿವ, ‘ರಮೇಶ ಕತ್ತಿ ‘ಡೆಡ್‌ಹಾರ್ಸ್’. ಅವರ ರಾಜಕಾರಣ, ವಿಚಾರಗಳು ಹುಕ್ಕೇರಿ ತಾಲ್ಲೂಕಿಗೆ ಮಾತ್ರ ಸಿಮೀತ. ಯಾರು, ಎಲ್ಲಿಗೆ ಬೇಕಾದರೂ ಪ್ರವೇಶ ಮಾಡಬಹುದು’ ಎಂದರು.

ಹುಕ್ಕೇರಿ ಫಲಿತಾಂಶ ಡಿಸಿಸಿ ಬ್ಯಾಂಕ್ ಚುನಾವಣೆ ಮೇಲೆ ಪ್ರಭಾವ ಬೀಡುವುದೇ? ಎಂಬ ಪ್ರಶ್ನೆಗೆ ಉತ್ತರಿಸಿದ ಅವರು, ‘ಸಾರ್ವತ್ರಿಕ ಚುನಾವಣೆ ಆಗಿದ್ದರೆ ಹಾಗೆ ಅಂದುಕೊಳ್ಳಬಹುದಿತ್ತು’ ಎಂದರು.

ಶಾಸಕರಾದ ಆಸಿಫ್‌ ಸೇಠ್‌, ಬಾಬಾಸಾಹೇಬ್‌ ಪಾಟೀಲ, ಕೆಪಿಸಿಸಿ ಕಾರ್ಯದರ್ಶಿ ಸುನೀಲ್‌ ಹಣಮನ್ನವರ ಇತರರು ಇದ್ದರು.