ಮಗುಚಿದ ಬಸ್‌: ಮಹಿಳೆ ಸಾವು

ಮಮದಾಪುರ: ಗೋಕಾಕ ತಾಲ್ಲೂಕಿನ ಬೆನಚಿನಮರಡಿ (ಕೊಳವಿ) ಬಳಿ ಮಂಗಳವಾರ ಸಾರಿಗೆ ಸಂಸ್ಥೆಯ ಬಸ್‌ ಮಗುಚಿದ ಕಾರಣ ಮಹಿಳಾ ಪ್ರಯಾಣಿಕರೊಬ್ಬರು ಸ್ಥಳದಲ್ಲೇ ಮೃತಪ‍ಟ್ಟಿದ್ದಾರೆ. 15ಕ್ಕೂ ಅಧಿಕ ಪ್ರಯಾಣಿಕರು ಗಾಯಗೊಂಡಿದ್ದಾರೆ.

ಬೆನಚಿನಮರಡಿ (ಕೊಳವಿ) ಗ್ರಾಮದ ಯಲ್ಲವ್ವ ಸಿದ್ದರಾಮ ಬಿರನಗಡ್ಡಿ(70) ಮೃತರು.

ಲಾರಿಯೊಂದು ಡಿಕ್ಕಿ ಹೊಡೆದಿದ್ದರಿಂದ ಗೋಕಾಕ- ಬೈಲಹೊಂಗಲ ಮಾರ್ಗವಾಗಿ ಕಾರ್ಯಾಚರಣೆ ನಡೆಸುತ್ತಿದ್ದ ಬಸ್‌ ರಸ್ತೆ ಪಕ್ಕದಲ್ಲಿ ಮಗುಚಿದೆ. ಸ್ಥಳೀಯರು ಕಿಟಕಿಯ ಗಾಜುಗಳನ್ನು ಒಡೆದು, ಗಾಯಗೊಂಡ ಪ್ರಯಾಣಿಕರನ್ನು ಹೊರತೆಗೆದರು. ಗಾಯಗೊಂಡವರನ್ನು ಆಸ್ಪತ್ರೆಗಳಿಗೆ ರವಾನಿಸಲಾಯಿತು.

ಘಟನಾ ಸ್ಥಳಕ್ಕೆ ಪೊಲೀಸರು ಭೇಟಿ ನೀಡಿ ಪರಿಶೀಲಿಸಿದರು. ಗೋಕಾಕ ಗ್ರಾಮೀಣ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.