ಆಂಬುಲೆನ್ಸ್ ಡಿಕ್ಕಿ: ಬೈಕ್ ಸವಾರ ಸಾವು

ಬೆಂಗಳೂರು: ಮಿನರ್ವ ವೃತ್ತ ಸಮೀಪದ ಭಾರತ್‌ ಜಂಕ್ಷನ್‌ ಬಳಿ ಸೋಮವಾರ ರಾತ್ರಿ ‘108’ ಆಂಬುಲೆನ್ಸ್‌ ಮತ್ತು ಬೈಕ್‌ ನಡುವೆ ಸಂಭವಿಸಿದ ಅಪಘಾತದಲ್ಲಿ ಅಮ್ಜದ್‌ ಪಾಷಾ (26) ಎಂಬುವರು ಮೃತ­ಪಟ್ಟಿದ್ದು, ಅವರ ಸ್ನೇಹಿತ ಇಮ್ರಾನ್‌ ಗಾಯಗೊಂಡಿದ್ದಾರೆ.

ಸುಧಾಮನಗರ ನಿವಾಸಿಗಳಾದ ಅಮ್ಜದ್‌ ಮತ್ತು ಇಮ್ರಾನ್‌, ಮನೆ ಸಮೀಪದ ಮಾಂಸದ ಅಂಗಡಿ ಇಟ್ಟು­ಕೊಂಡಿದ್ದರು. ಮೂರು ತಿಂಗಳ ಹಿಂದಷ್ಟೇ ಅಮ್ಜದ್‌ ಅವರಿಗೆ ವಿವಾಹ­ವಾಗಿತ್ತು. ಸಂಬಂಧಿಕರ ಮನೆಯ ಸಮಾರಂಭವೊಂದರಲ್ಲಿ ಪಾಲ್ಗೊ­ಳ್ಳಲು ಇಮ್ರಾನ್‌ನನ್ನು ಕರೆದುಕೊಂಡು ಬೈಕ್‌ನಲ್ಲಿ ಸಾರಕ್ಕಿಗೆ ಹೋಗಿದ್ದ ಅವರು, ರಾತ್ರಿ  12.30ರ  ಸುಮಾರಿಗೆ  ಸಿದ್ದಯ್ಯ ರಸ್ತೆ  ಮಾರ್ಗವಾಗಿ  ವಾಪಸಾಗುತ್ತಿ  ದ್ದಾಗ ಈ  ದುರ್ಘಟನೆ  ನಡೆದಿದೆ.

ಸಿದ್ದಯ್ಯ ರಸ್ತೆಯಲ್ಲಿ ಏಕಮುಖ ಸಂಚಾರ ವ್ಯವಸ್ಥೆ ಇದ್ದರೂ ಅಮ್ಜದ್‌ ಅದೇ ಮಾರ್ಗವಾಗಿ ಬೈಕ್‌ ಓಡಿಸಿ­ಕೊಂಡು ಬಂದಿದ್ದಾರೆ. ಇದೇ ವೇಳೆ ಆಂಬುಲೆನ್ಸ್‌, ರೋಗಿಯನ್ನು ಕರೆದು­ಕೊಂಡು ಪುರಭವನದಿಂದ ಮಿನರ್ವ ವೃತ್ತದ ಕಡೆಗೆ ಬಂದಿದೆ. ಭಾರತ್‌ ಜಂಕ್ಷನ್‌ ತಿರುವಿನಲ್ಲಿ ಎರಡೂ ವಾಹನ­ಗಳಿಗೂ ಡಿಕ್ಕಿ­ಯಾ­ಗಿದ್ದು, ಅಮ್ಜದ್ ತಲೆಗೆ ಗಂಭೀರ ಪೆಟ್ಟು ಬಿದ್ದಿದೆ. ಕೂಡಲೇ ಸ್ಥಳೀಯರು ಸಮೀಪದ ಆಸ್ಪತ್ರೆಗೆ ಕೊಂಡೊ­ಯ್ದರಾದರೂ ಅವರು ಬದುಕುಳಿ­ಯ­­ಲಿಲ್ಲ ಎಂದು ಪೊಲೀಸರು ಹೇಳಿದ್ದಾರೆ.

ಟ್ಯಾಂಕರ್‌ ಡಿಕ್ಕಿ: ಸಾವು ಪೀಣ್ಯ ಎರಡನೇ ಹಂತದ ತಿಗಳರಪಾಳ್ಯ ಮುಖ್ಯ­ರಸ್ತೆಯಲ್ಲಿ ಮಂಗಳವಾರ ಬೆಳಿಗ್ಗೆ ಟ್ಯಾಂಕರ್‌ ಡಿಕ್ಕಿ ಹೊಡೆದು ಸುನೀಲ್ ಕುಮಾರ್ (28) ಎಂಬು­ವರು ಸಾವನ್ನಪ್ಪಿದ್ದಾರೆ.

ಬಿಹಾರ ಮೂಲದ ಸುನೀಲ್‌, ಕಡಬಗೆರೆ ಕೈಗಾರಿಕಾ ಪ್ರದೇಶದ ಕಾರ್ಖಾ­ನೆಯೊಂದರಲ್ಲಿ ಕೆಲಸ ಮಾಡು­­ತ್ತಿದ್ದರು. ರಾಜ­ಗೋಪಾಲ­ನಗರದ ವಾಸವಾ­ಗಿದ್ದ ಅವರು ಬೆಳಿಗ್ಗೆ 7.45ರ ಸುಮಾರಿಗೆ ಬೈಕ್‌ನಲ್ಲಿ ಕೆಲ­ಸಕ್ಕೆ ಹೋಗುತ್ತಿದ್ದಾಗ ಟ್ಯಾಂಕರ್‌ ಡಿಕ್ಕಿ ಹೊಡೆದಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.