ADVERTISEMENT

ನಷ್ಟದಲ್ಲಿದ್ದರೂ 8 ಕಾರು ಖರೀದಿಸಿದ ಬಿಡಿಎ

ಒಟ್ಟು ₹95.77 ಲಕ್ಷ ವೆಚ್ಚ; ಮಾಹಿತಿ ಹಕ್ಕು ಕಾಯ್ದೆ ಅಡಿ ವಿವರ

​ಪ್ರಜಾವಾಣಿ ವಾರ್ತೆ
Published 3 ಆಗಸ್ಟ್ 2016, 19:30 IST
Last Updated 3 ಆಗಸ್ಟ್ 2016, 19:30 IST
ನಷ್ಟದಲ್ಲಿದ್ದರೂ 8 ಕಾರು ಖರೀದಿಸಿದ ಬಿಡಿಎ
ನಷ್ಟದಲ್ಲಿದ್ದರೂ 8 ಕಾರು ಖರೀದಿಸಿದ ಬಿಡಿಎ   

ಬೆಂಗಳೂರು: ಈಗಾಗಲೇ ಆರ್ಥಿಕ ನಷ್ಟ ಎದುರಿಸುತ್ತಿರುವ ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರ (ಬಿಡಿಎ) ಎರಡು ವರ್ಷಗಳಲ್ಲಿ  ಒಟ್ಟು 8 ಕಾರುಗಳನ್ನು ಖರೀದಿಸಿದೆ. ಇದಕ್ಕಾಗಿ ಬಿಡಿಎ ಮಾಡಿರುವ ಒಟ್ಟು ವೆಚ್ಚ ₹ 95.77 ಲಕ್ಷ!

ಸಾಯಿದತ್ತ ಎಂಬವರು 2014ರಿಂದ 2016 ಜುಲೈವರೆಗೆ  ಬಿಡಿಎ ಎಷ್ಟು ಕಾರುಗಳನ್ನು ಖರೀದಿಸಿದೆ ಎಂಬ ಬಗ್ಗೆ ಮಾಹಿತಿ ಹಕ್ಕಿನಡಿ ವಿವರಗಳನ್ನು ಕೇಳಿದ್ದರು. ಇದಕ್ಕೆ ಉತ್ತರಿಸಿರುವ ಬಿಡಿಎ, ಎರಡು ವರ್ಷಗಳಲ್ಲಿ  ₹ 24.44 ಲಕ್ಷ ಬೆಲೆಯ ಇನೋವಾ ಕ್ರಿಸ್ಟ ಕಾರು ಸಹಿತ ಒಟ್ಟು 8 ಹೊಸ ಕಾರುಗಳನ್ನು ಖರೀದಿಸಲಾಗಿದೆ ಎಂದು ತಿಳಿಸಿದೆ.

ಬಿಡಿಎಗೆ ನಗರಾಭಿವೃದ್ಧಿ ಇಲಾಖೆಯ ಹೆಚ್ಚುವರಿ ಮುಖ್ಯ ಕಾರ್ಯದರ್ಶಿಯವರೇ ಅಧ್ಯಕ್ಷರಾಗಿರುತ್ತಾರೆ. ಅವರು ಬಿಡಿಎ ಕಚೇರಿಗೆ ಭೇಟಿ ನೀಡುವುದು ಅಪರೂಪಕ್ಕೊಮ್ಮೆ. ಅವರ ಬಳಿ  ಸರ್ಕಾರಿ ಕಾರು ಇರುತ್ತದೆ. ಆದರೂ, ಬಿಡಿಎ ವತಿಯಿಂದ ₹ 24.44 ಲಕ್ಷ ಮೌಲ್ಯದ ಇನೊವ ಕ್ರಿಸ್ಟ ಕಾರನ್ನು ಖರೀದಿಸಲಾಗಿದೆ.

ಜಿ–ಕೆಟಗರಿ ನಿವೇಶನದ ಹಂಚಿಕೆ ಹಗರಣದ ವಿಚಾರಣೆ ನಡೆಸುತ್ತಿರುವ ನ್ಯಾಯಮೂರ್ತಿ ಫಾರೂಕ್‌ ಸಮಿತಿ ಸಲುವಾಗಿ ಮೂರು ಟೊಯೋಟಾ ಇಟಿಯೋಸ್‌ ಕಾರುಗಳನ್ನು ಖರೀದಿಸಲಾಗಿದೆ. ಈ ಮೂರು ಕಾರುಗಳ  ಒಟ್ಟು ಬೆಲೆ ₹ 26.82.

‘ಬೆಂಗಳೂರು ನಗರಾಭಿವೃದ್ಧಿ ಸಚಿವರ ಸಚಿವಾಲಯಕ್ಕಾಗಿ ₹ 18.93 ಲಕ್ಷ ಮೌಲ್ಯದ ಇನೊವಾ ಕಾರನ್ನು ಖರೀದಿಸಲಾಗಿದೆ.   ಸಚಿವರಿಗೆ ಪ್ರತ್ಯೇಕ ಸರ್ಕಾರಿ ಕಾರನ್ನು ಒದಗಿಸಲಾಗಿರುತ್ತದೆ. ಅಧಿಕಾರಿಗಳಿಗೆ ಈಗಾಗಲೇ ಕಾರುಗಳನ್ನು ಒದಗಿಸಲಾಗಿದೆ. ಹಾಗಿರುವಾಗ ಈ ಕಾರಿನ ಅವಶ್ಯಕತೆ ಇತ್ತೇ’ ಎಂದು  ಪ್ರಶ್ನಿಸುತ್ತಾರೆ ಅವರು.

‘ಮುಖ್ಯಮಂತ್ರಿ ಕಚೇರಿಗೆ ಓಡಾಟ ಮಾಡುವ ಸಲುವಾಗಿ ₹ 7.23 ಲಕ್ಷ ಮೌಲ್ಯದ ಸ್ವಿಫ್ಟ್‌ ಡಿಸೈರ್‌ ಕಾರನ್ನು ಖರೀದಿಸಲಾಗಿದೆ. ಇದನ್ನು ಯಾವುದಕ್ಕೆ ಬಳಸಲಾಗುತ್ತದೆ ಎಂದು ಗೊತ್ತಾಗುತ್ತಿಲ್ಲ’ ಎಂದರು.  ‘ಇಷ್ಟೊಂದು ಕಾರು ಖರೀದಿಸಿದ ಬಳಿಕವಾದರೂ ಸಾರ್ವಜನಿಕರಿಗೆ ಆಗಿರುವ ಪ್ರಯೋಜನವಾದರೂ ಏನು’ ಎಂದು ಅವರು ಪ್ರಶ್ನಿಸಿದರು.

ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.