ಬೆಂಗಳೂರು ವಿ.ವಿ: ಕುಲಪತಿ, ಕುಲಸಚಿವರಿಗೆ ಹೊಸ ಕಾರು

ಬೆಂಗಳೂರು: ಬೆಂಗಳೂರು ದಕ್ಷಿಣ ವಿಶ್ವವಿದ್ಯಾಲಯದ ಕುಲಪತಿ ಹಾಗೂ ಕುಲಸಚಿವರ ಕಾರು ಖರೀದಿಗೆ ಸಿಂಡಿಕೇಟ್‌ ಸಭೆಯಲ್ಲಿ ಒಪ್ಪಿಗೆ ದೊರೆತಿದೆ.

‘ಈಗಿರುವ ಕಾರುಗಳು 15 ವರ್ಷಗಳ ಹಿಂದೆ ಖರೀದಿಸಿದ್ದು, ಅವುಗಳ ಇಂಧನ ಮತ್ತು ದುರಸ್ತಿ ವೆಚ್ಚವೇ ಜಾಸ್ತಿಯಾಗುತ್ತಿದೆ. ಹಾಗಾಗಿ ಎರಡು ಹೊಸ ಕಾರುಗಳನ್ನು ಖರೀದಿಸುತ್ತೇವೆ’ ಎಂದು ಸಭೆಗೆ ನೀಡಿದ್ದ ಕಾರ್ಯಸೂಚಿಯಲ್ಲಿ ವಿಶ್ವವಿದ್ಯಾಲಯ ತಿಳಿಸಿತ್ತು.

‘2016ರಲ್ಲಿಯೇ ಸಿಂಡಿಕೇಟ್‌ ಸಭೆಯಲ್ಲಿ ಮೂರು ಕಾರು ಖರೀದಿಗೆ ಒಪ್ಪಿಗೆ ಪಡೆಯಲಾಗಿತ್ತು. ಆದರೆ, ಆಗ ಕೇವಲ ಒಂದು ಕಾರಿಗೆ ಒಪ್ಪಿಗೆ ಸಿಕ್ಕಿತ್ತು. ಹಾಗಾಗಿ ಈಗ ಮತ್ತೊಮ್ಮೆ ಅದನ್ನು ಪ್ರಸ್ತಾಪಿಸಿದ್ದಾರೆ. ಅಲ್ಲದೆ, ಈಗಿರುವ ಕಾರುಗಳು ಹಳೆಯದಾಗಿರುವುದರಿಂದ ಯಾರೂ ಅದನ್ನು ವಿರೋಧಿಸಲಿಲ್ಲ’ ಎಂದು ಸದಸ್ಯರೊಬ್ಬರು ತಿಳಿಸಿದರು.

‘ಇನೋವಾ ಕಾರುಗಳನ್ನು ಖರೀದಿಸುವುದಾಗಿ ಕಾರ್ಯಸೂಚಿಯಲ್ಲಿ ತಿಳಿಸಿದ್ದರು. ಎರಡು ಕಾರಿನಿಂದ ಸುಮಾರು 28 ಲಕ್ಷ ವೆಚ್ಚವಾಗಬಹುದು. ಅಲ್ಲದೆ, ಈಗಿರುವ ಕಾರುಗಳನ್ನು ವಿಶ್ವವಿದ್ಯಾಲಯದ ಇತರೆ ಕೆಲಸಗಳಿಗೆ ಬಳಸಿಕೊಳ್ಳಲಾಗುತ್ತದೆ ಎಂದು ಹಂಗಾಮಿ ಕುಲಪತಿ ಸಭೆಗೆ ತಿಳಿಸಿದರು’ ಎಂದು ಮಾಹಿತಿ ನೀಡಿದರು.