ಚಲಿಸುತ್ತಿದ್ದ ಟೆಂಪೊದ ಆ್ಯಕ್ಸೆಲ್ ತುಂಡು: ಚಾಲಕ ಪಾರು

ಬೆಂಗಳೂರು: ವಿಮಾನನಿಲ್ದಾಣ ರಸ್ತೆಯಲ್ಲಿ (ಎತ್ತರಿಸಿದ ರಸ್ತೆ) ಯಲಹಂಕದ ಹುಣಸಮಾರನಹಳ್ಳಿ ಬಳಿ ಮಂಗಳವಾರ ಮಧ್ಯಾಹ್ನ ಚಲಿಸುತ್ತಿದ್ದ ಟೆಂಪೊದ ಆ್ಯಕ್ಸೆಲ್ ತುಂಡಾಗಿ ಹಿಂಬದಿಯ ಚಕ್ರಗಳು ಕಳಚಿಕೊಂಡವು.

ಟೆಂಪೊ ಅಡ್ಡಾದಿಡ್ಡಿಯಾಗಿ ಚಲಿಸಿತು. ಚಕ್ರಗಳು ವಾಹನದಿಂದ ಬೇರ್ಪಟ್ಟು ಅಕ್ಕಪಕ್ಕದಲ್ಲಿ ಸಾಗುತ್ತಿದ್ದ ವಾಹನಗಳತ್ತ ನುಗ್ಗಿದವು. ಈ ಅನಿರೀಕ್ಷಿತ ಘಟನೆಯಿಂದಾಗಿ ವಾಹನ ಸವಾರರು ಆತಂಕಗೊಂಡರು ಎಂದು ಪ್ರತ್ಯಕ್ಷದರ್ಶಿಗಳು ತಿಳಿಸಿದರು.

ಚಾಲಕ ಉಮೇಶ್, ಟೆಂಪೊದಲ್ಲಿ (ಕೆ.ಎ–03 3514 ವಾಹನದ ನೋಂದಣಿ ಸಂಖ್ಯೆ) ಕಲ್ಲುಗಳನ್ನು ತುಂಬಿಕೊಂಡು ನಗರದ ಕಡೆಗೆ ಬರುತ್ತಿದ್ದಾಗ ಈ ಅನಾಹುತ ಸಂಭವಿಸಿದೆ.

‘ಚಕ್ರಗಳು ಕಳಚಿದ್ದರಿಂದ ವಾಹನದ ಹಿಂಭಾಗವು ನೆಲವನ್ನು ಸ್ಪರ್ಶಿಸಿತು. ಈ ವೇಳೆ ಅದರಲ್ಲಿದ್ದ ಕಲ್ಲುಗಳು ಚೆಲ್ಲಾಪಿಲ್ಲಿಯಾಗಿ ಕೆಳಗೆ ಬಿದ್ದವು. ಅವಘಡದಲ್ಲಿ ಚಾಲಕ ಸೇರಿದಂತೆ ಯಾರಿಗೂ ಅಪಾಯವಾಗಿಲ್ಲ. ಬಳಿಕ ಕ್ರೇನ್ ತರಿಸಿಕೊಂಡು ಟೆಂಪೊವನ್ನು ಸ್ಥಳಾಂತರ ಮಾಡಿ ರಸ್ತೆಯಲ್ಲಿ ಸುಗಮ ಸಂಚಾರಕ್ಕೆ ಅನುವು ಮಾಡಿಕೊಟ್ಟೆವು’ ಎಂದು ಚಿಕ್ಕಜಾಲ ಪೊಲೀಸರು ತಿಳಿಸಿದರು.