ಬೆಂಗಳೂರು: ಉಪನಗರಗಳಿಗೆ ಮೆಮು ರೈಲು

ಬೆಂಗಳೂರು: ಪ್ರಧಾನಿ ನರೇಂದ್ರ ಮೋದಿ ನಗರಕ್ಕೆ ಭೇಟಿ ನೀಡುವ ದಿನವೇ(ಜೂನ್ 20) ನಗರದ ಸುತ್ತಲಿನ ಉಪನಗರಗಳಿಗೆ ರೈಲುಗಳನ್ನು ಪುನರಾರಂಭಿಸಲು ನೈರುತ್ಯ ರೈಲ್ವೆ ನಿರ್ಧರಿಸಿದೆ.

ಕ್ರಾಂತಿವೀರ ಸಂಗೊಳ್ಳಿ ರಾಯಣ್ಣ(ಕೆಎಸ್‌ಆರ್) ರೈಲು ನಿಲ್ದಾಣದಿಂದ ರಾಮನಗರಕ್ಕೆ(01763/01764) ನಿತ್ಯ ಮೆಮು ಎಕ್ಸ್‌ಪ್ರೆಸ್ ಪರಿಚಯಿಸಿದ್ದು, ಬೋಗಿಗಳ ಸಂಖ್ಯೆಯನ್ನು 8ರಿಂದ 16ಕ್ಕೆ ಹೆಚ್ಚಿಸಲಾಗಿದೆ. ಭಾನುವಾರ ಕೂಡ ಈ ರೈಲು ಸೇವೆ ಇರಲಿದೆ.

ಕೆಎಸ್‌ಆರ್‌ನಿಂದ ವೈಟ್‌ಫೀಲ್ಡ್‌ (01765/01766), ಕೆಎಸ್‌ಆರ್-ಕುಪ್ಪಂ (06529/06530), ಬಂಗಾರಪೇಟೆ-ಸರ್ ಎಂ. ವಿಶ್ವೇಶ್ವರಯ್ಯ ಟರ್ಮಿನಲ್ (06527/ 06528), ಯಶವಂತಪುರ-ತುಮಕೂರು (06579), ತುಮಕೂರು-ಯಶವಂತಪುರ (06574) ಹಾಗೂ ಕೆಎಸ್‌ಆರ್‌ನಿಂದ ಮೈಸೂರಿಗೆ (06525/ 06526) ನಿತ್ಯ 16 ಬೋಗಿಗಳ ಮೆಮು ರೈಲು ಸೇವೆ ಆರಂಭಿಸಲು ನಿರ್ಧರಿಸಿದೆ.

ಕೆಎಸ್‌ಆರ್‌ನಿಂದ ಬಂಗಾರಪೇಟೆ (01769/ 01770) ಹಾಗೂ ಕಂಟೋನ್ಮೆಂಟ್‌ನಿಂದ ಬಂಗಾರಪೇಟೆಗೆ (06389/ 06390) ಎಂಟು ಬೋಗಿಗಳ ಡೆಮು ರೈಲು ವಾರದ ಆರು ದಿನಗಳು ಲಭ್ಯ ಇರಲಿದೆ. ಧರ್ಮಪುರಿ- ಕೆಎಸ್‌ಆರ್ (06278) ನಡುವಿನ ಡೆಮು ರೈಲಿನ ವೇಳಾಪಟ್ಟಿಯನ್ನು ಪರಿಷ್ಕರಿಸಲಾಗಿದ್ದು, ಜೂನ್ 20ರಿಂದ ಅನ್ವಯವಾಗಲಿದೆ ಎಂದು ನೈರುತ್ಯ ರೈಲ್ವೆ ಪ್ರಕಟಣೆ ತಿಳಿಸಿದೆ.

‘ಎಲ್ಲಾ ನಿಲ್ದಾಣಗಳಲ್ಲೂ ನಿಲುಗಡೆ ಆಗುವ ಈ ರೈಲುಗಳಿಗೆ ಮೆಮು ಎಕ್ಸ್‌ಪ್ರೆಸ್ ಎಂದು ಹೆಸರಿಸಲಾಗಿದೆ. ಹಿಂದಿದ್ದ ರೈಲುಗಳ ಸೇವೆಯನ್ನೇ ಪುನರ್ ಆರಂಭಿಸಿ ಅದಕ್ಕೆ ಎಕ್ಸ್‌ಪ್ರೆಸ್‌ ಎಂದು ನಾಮಕರಣ ಮಾಡಿ ಪ್ರಯಾಣಿಕರು ದುಪ್ಪಟ್ಟು ದರ ತೆರುವಂತೆ ಮಾಡಲಾಗಿದೆ. ಇದು ಸರಿಯಲ್ಲ’ ಎಂದು ರೈಲ್ವೆ ಹೋರಾಟಗಾರರು ಆಕ್ಷೇಪ ವ್ಯಕ್ತಪಡಿಸಿದ್ದಾರೆ.