ಹೆಬ್ಬಗೋಡಿ ಎಎಸ್ಐಗೆ ಸೋಂಕು

ಬೆಂಗಳೂರು: ಬುಧವಾರ ಒಂದೇ ದಿನ ಆರು ಮಂದಿಗೆ ಸೋಂಕು ತಗುಲಿದ್ದು, ನಗರದಲ್ಲಿ ಸೋಂಕಿತರ ಸಂಖ್ಯೆ 282ಕ್ಕೆ ತಲುಪಿದೆ.

ಹೊಸದಾಗಿ ವರದಿಯಾದ ಆರು ಪ್ರಕರಣಗಳಲ್ಲಿ 5 ಮಂದಿ ಅನ್ಯ ರಾಜ್ಯ ಹಾಗೂ ದೇಶದವರಾಗಿದ್ದಾರೆ. ಅವರೊಂದಿಗೆ ಸಂಪರ್ಕ ಹೊಂದಿರುವವರನ್ನು ಪತ್ತೆ ಮಾಡುವುದು ಆರೋಗ್ಯ ಇಲಾಖೆಯ ಅಧಿಕಾರಿಗಳಿಗೂ ತಲೆನೋವಾಗಿ ಪರಿಣಮಿಸಿದೆ.

ಮಧ್ಯಪ್ರದೇಶದಿಂದ ಬಂದು ಕ್ವಾರಂಟೈನ್‌ಗೆಒಳಗಾಗಿದ್ದ 25 ವರ್ಷದ ಯುವತಿಗೆ ಸೋಂಕು ಖಚಿತವಾಗಿದೆ. ಹೆಬ್ಬಗೋಡಿ ಠಾಣೆಯ ಎಎಸ್‌ಐಗೆ ಸೋಂಕು ತಗುಲಿದೆ. ಅವರು ಬೇಗೂರು ನಿವಾಸಿಯಾಗಿದ್ದು, ರಜೆಯಲ್ಲಿದ್ದರು. ಕೆಲ ದಿನಗಳ ಹಿಂದಷ್ಟೇ ಹೆಬ್ಬಗೋಡಿ ಠಾಣೆಯಲ್ಲಿ ಇಬ್ಬರು ಬಂಧಿತರಿಗೆ ಸೋಂಕು ತಗುಲಿತ್ತು.

ಯುಎಇಯಿಂದ ನಗರಕ್ಕೆ ಬಂದಿದ್ದ 28 ವರ್ಷದ ಮಹಿಳೆ ಹಾಗೂ ನೇಪಾಳದಿಂದ ವಾಪಸ್ ಆಗಿದ್ದ 22 ವರ್ಷದ ಯುವತಿಗೆ ಸೋಂಕು ತಗುಲಿದೆ. ಈ ಇಬ್ಬರೂ ಹೋಟೆಲ್‌ ಕ್ವಾರಂಟೈನ್‌ನಲ್ಲಿ ಇದ್ದರು.