ಪಾತ್ರೆ ಅಂಗಡಿಯಲ್ಲಿ ಅಫೀಮು ಮಾರುತ್ತಿದ್ದ!

ಬೆಂಗಳೂರು: ಪಂತರಪಾಳ್ಯದ ಟೆಲಿಕಾಂ ಲೇಔಟ್‌ನಲ್ಲಿ ಪಾತ್ರೆ ಅಂಗಡಿ ಇಟ್ಟುಕೊಂಡು, ಮಾದಕ ವಸ್ತು ಮಾರುತ್ತಿದ್ದ ರಾಜಸ್ಥಾನದ ಬೇರಾರಾಮ್ (32) ಎಂಬಾತ ಕೆಂಪಾಪುರ ಪೊಲೀಸರ ಅತಿಥಿಯಾಗಿದ್ದಾನೆ.

ಹತ್ತು ವರ್ಷಗಳಿಂದ ನಗರದಲ್ಲಿ ನೆಲೆಸಿರುವ ಬೇರಾರಾಮ್, ರಾಜಸ್ಥಾನದಿಂದ ಅಫೀಮು ತರಿಸಿಕೊಂಡು ಪರಿಚಿತ ಯುವಕರಿಗೆ ಮಾರುತ್ತಿದ್ದ. ಆತನಿಂದ ₹ 3 ಲಕ್ಷ ಮೌಲ್ಯದ 750 ಗ್ರಾಂ ಅಫೀಮು ಜಪ್ತಿ ಮಾಡಲಾಗಿದೆ ಎಂದು ಪೊಲೀಸರು ಹೇಳಿದ್ದಾರೆ.

‘ಡ್ರಗ್ಸ್ ಬಗ್ಗೆ ಜಾಗೃತಿ ಮೂಡಿಸಲು ಇತ್ತೀಚೆಗೆ ಮೈಸೂರು ರಸ್ತೆಯ ಕೆಲ ಶಾಲಾ–ಕಾಲೇಜುಗಳು ಹಾಗೂ ಸಾರ್ವಜನಿಕ ಸ್ಥಳಗಳಲ್ಲಿ ಸಭೆಗಳನ್ನು ನಡೆಸಲಾಗಿತ್ತು. ಈ ಸಂಬಂಧ ಕಿರುಹೊತ್ತಿಗೆಗಳನ್ನೂ ಹಂಚಲಾಗಿತ್ತು. ‘ಟೆಲಿಕಾಂ ಬಡಾವಣೆಯಲ್ಲಿ ವ್ಯಕ್ತಿಯೊಬ್ಬ ಪಾತ್ರೆ ಅಂಗಡಿಯಲ್ಲೇ ಅಫೀಮು ಮಾರುತ್ತಿದ್ದಾನೆ’ ಎಂದು ಯುವಕನೊಬ್ಬ ಸಭೆಯಲ್ಲೇ ದೂರು ಕೊಟ್ಟ. ಅದನ್ನು ಗಂಭೀರವಾಗಿ ಪರಿಗಣಿಸಿ ಕಾರ್ಯಾಚರಣೆ ಪ್ರಾರಂಭಿಸಿದೆವು’ ಎಂದು ಅಧಿಕಾರಿಯೊಬ್ಬರು ಹೇಳಿದರು.

‘ಅ.14ರ ರಾತ್ರಿ 8 ಗಂಟೆ ಸುಮಾರಿಗೆ ಬೇರಾರಾಮ್‌, ಬಿ.ಎಂ.ವ್ಯಾಲಿ ಹೈಸ್ಕೂಲ್ ಹತ್ತಿರ ನಿಂತಿದ್ದ. ಸಿಬ್ಬಂದಿ ಆತನನ್ನು ವಶಕ್ಕೆ ಪಡೆದಾಗ ಜೇಬಿನಲ್ಲಿ 50 ಗ್ರಾಂ ಅಫೀಮು ಸಿಕ್ಕಿತು. ಬಳಿಕ ಅಂಗಡಿ ಕರೆದೊಯ್ದು ಪರಿಶೀಲನೆ ನಡೆಸಿದಾಗ ಇನ್ನೂ 700 ಗ್ರಾಂ ಅಫೀಮು ಪತ್ತೆಯಾಯಿತು’ ಎಂದು ಮಾಹಿತಿ ನೀಡಿದರು.