ವಿಮಾನ ನಿಲ್ದಾಣಕ್ಕೆ ನೆರವು

ಬೆಂಗಳೂರು: ಕೆಂಪೇಗೌಡ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದ (ಕೆಐಎ) ಎರಡನೇ ಟರ್ಮಿನಲ್‌ನಲ್ಲಿ (ಟಿ2) ಮಾಹಿತಿ ತಂತ್ರಜ್ಞಾನ ಮತ್ತು ಮೂಲಸೌಕರ್ಯ ವ್ಯವಸ್ಥೆ ನಿರ್ವಹಣೆಗೆ ಯುನಿಸಿಸ್‌ ಸಂಸ್ಥೆ ಆಯ್ಕೆಯಾಗಿದೆ.

ದೇಶದ ಮೂರನೇ ಅತೀ ಹೆಚ್ಚು ಒತ್ತಡದ ವಿಮಾನ ನಿಲ್ದಾಣ ಎನಿಸಿಕೊಂಡಿರುವ ಕೆಐಎ, 2018–19ರಲ್ಲಿ 3.3 ಕೋಟಿ ಪ್ರಯಾಣಿಕರನ್ನು ನಿಭಾಯಿಸಿದೆ. ಹೆಚ್ಚುವರಿಯಾಗಿ ವರ್ಷಕ್ಕೆ 2.5 ಕೋಟಿ ಪ್ರಯಾಣಿಕರನ್ನು ನಿಭಾಯಿಸಬಹುದಾದ ಎರಡನೇ ಟರ್ಮಿನಲ್ ನಿರ್ಮಾಣವಾಗುತ್ತಿದೆ. ಇದು 2021ರ ಮಾರ್ಚ್‌ನಲ್ಲಿ ಸೇವೆಗೆ ಲಭ್ಯವಾಗಲಿದೆ.

ಮಾಹಿತಿ ತಂತ್ರಜ್ಞಾನ ಮತ್ತು ಮೂಲಸೌಕರ್ಯ ವ್ಯವಸ್ಥೆ ನಿರ್ವಹಿಸಲು ಮೂರು ವರ್ಷದ ಗುತ್ತಿಗೆಗೆ ಬುಧವಾರ ಸಹಿ ಹಾಕಲಾಯಿತು. 2ನೇ ಟರ್ಮಿನಲ್‍ನ ಮೊದಲನೇ ಹಂತಕ್ಕಾಗಿ ಬಿಐಎಎಲ್ ಪಡೆದುಕೊಂಡಿರುವ 20ಕ್ಕೂ ಹೆಚ್ಚಿನ ಮಾಹಿತಿ ತಂತ್ರಜ್ಞಾನ ವ್ಯವಸ್ಥೆಗಳನ್ನು ಇದು ಅನುಷ್ಠಾನಗೊಳಿಸಲಿದೆ.