Vidhana Soudha Book Fair: ಪುಸ್ತಕ ಖರೀದಿಗೆ ಶಾಸಕರ ನಿರಾಸಕ್ತಿ

ಬೆಂಗಳೂರು: ವಿಧಾನಸೌಧ ಆವರಣದಲ್ಲಿ ನಡೆಯುತ್ತಿರುವ ‘ಪುಸ್ತಕ ಮೇಳ’ಕ್ಕೆ ಸಾಹಿತ್ಯ ಪ್ರೇಮಿಗಳಿಂದ ಉತ್ತಮ ಸ್ಪಂದನೆ ವ್ಯಕ್ತವಾಗಿದೆ. ಆದರೆ, ಬೆರಳೆಣಿಕೆಯಷ್ಟು ಶಾಸಕರು ಮಾತ್ರ ಮಳಿಗೆಗಳಿಗೆ ಭೇಟಿ ನೀಡಿದ್ದು, ಪುಸ್ತಕ ಖರೀದಿಸಲು ಆಸಕ್ತಿ ತೋರುತ್ತಿಲ್ಲ.

ಪುಸ್ತಕ ಜಾತ್ರೆಯ ಮೂರನೇ ದಿನವಾದ ಶನಿವಾರ ನಗರ ಮಾತ್ರವಲ್ಲದೇ, ಹೊರ ಜಿಲ್ಲೆಗಳಿಂದಲೂ ಹೆಚ್ಚಿನ ಸಂಖ್ಯೆಯಲ್ಲಿ ಜನರು ಬಂದಿದ್ದರು. ಕಾಲೇಜು ವಿದ್ಯಾರ್ಥಿಗಳು, ಮಹಿಳೆಯರು, ಅಧಿಕಾರಿಗಳು, ನೌಕರರು ವಿಧಾನಸೌಧಕ್ಕೆ ಭೇಟಿ ನೀಡಿದರು. 15 ಸಾವಿರಕ್ಕೂ ಹೆಚ್ಚು ಜನರು ಶಕ್ತಿಸೌಧದ ಆವರಣ ತುಂಬ ಕಿಕ್ಕಿರಿದು ನೆರೆದಿದ್ದರು. ಪುಸ್ತಕ ಮಳಿಗೆಗಳಲ್ಲಿ ಜನವೋ ಜನ.

ಮೇಳಕ್ಕೆ ಅನೇಕರು ಕುಟುಂಬ ಸಮೇತ ಬಂದಿದ್ದರು. ಮಳಿಗೆಗಳಲ್ಲಿ ಪ್ರಕಾಶಕರು, ಮಾಲೀಕರ ಜತೆ ಚರ್ಚೆ ನಡೆಸಿ, ತಮ್ಮಿಷ್ಟದ ಪುಸ್ತಕಗಳನ್ನು ಕೊಂಡುಕೊಂಡರು. ಕೆಲವರು ಕುವೆಂಪು, ಪೂರ್ಣಚಂದ್ರ ತೇಜಸ್ವಿ, ಶಿವರಾಮ ಕಾರಂತ, ಚಂದ್ರಶೇಖರ ಕಂಬಾರ, ಎಸ್‌.ಎಲ್. ಭೈರಪ್ಪ ಸೇರಿದಂತೆ ತಮ್ಮ ನೆಚ್ಚಿನ ಕಾದಂಬರಿಕಾರ ಮತ್ತು ಕವಿಗಳ ಪುಸ್ತಕಗಳಿಗಾಗಿ ಮಳಿಗೆಗಳಿಗೆ ಎಡತಾಕಿದರು. ಹಿರಿಯ ಅಧಿಕಾರಿಗಳು ಕೂಡ ಮೇಳದಲ್ಲಿ ಸುತ್ತು ಹಾಕಿದರು.

ಬೆಳಿಗ್ಗೆಯಿಂದಲೇ ಹೆಚ್ಚಿನ ಸಂಖ್ಯೆಯಲ್ಲಿ ಸಾಹಿತ್ಯಾಸಕ್ತರು ಮೇಳಕ್ಕೆ ಬಂದಿದ್ದರು. ಮಧ್ಯಾಹ್ನದ ವೇಳೆಗೆ ಮಳಿಗೆಗಳಲ್ಲಿ ಜನದಟ್ಟಣೆ ಉಂಟಾಗಿತ್ತು. ಸಂಜೆಯ ಹೊತ್ತಿಗೆ ಮಳಿಗೆಗಳು ಮಾತ್ರವಲ್ಲದೆ, ವಿಧಾನಸೌಧದ ಆವರಣ ಜನರಿಂದ ತುಂಬಿತ್ತು. ಸಂಭ್ರಮದಿಂದ ಮಳಿಗೆಗಳಿಗೆ ಓಡಾಡಿ, ನೆಚ್ಚಿನ ಲೇಖಕರ ಪುಸ್ತಕಗಳೊಂದಿಗೆ ಮನೆಗೆ ತೆರಳಿದರು.

‘ಬಹುತೇಕ ಮಳಿಗೆಗಳು ಶೇಕಡ 25ರಷ್ಟು ರಿಯಾಯಿತಿ ನೀಡಿರುವುದರಿಂದ ಓದುಗರಿಂದ ಪುಸ್ತಕ ಮೇಳಕ್ಕೆ ಉತ್ತಮ ಪ್ರತ್ರಿಕ್ರಿಯೆ ದೊರೆತಿದೆ. ಕನ್ನಡ, ಇಂಗ್ಲಿಷ್, ಹಿಂದಿ ಭಾಷೆಯ ಪುಸ್ತಕಗಳು ಲಭ್ಯ ಇವೆ. ಎರಡು ದಿನಗಳಿಂದ ಪುಸ್ತಕ ಪ್ರೇಮಿಗಳು ಭೇಟಿ ನೀಡುತ್ತಿದ್ದಾರೆ’ ಎಂದು ಪ್ರಕಾಶಕ ಪ್ರವೀಣ್ ತಿಳಿಸಿದರು.

ಮೊಗಸಾಲೆ ವೀಕ್ಷಣೆಗೆ ಜನಸಾಗರ

ಬೆಂಗಳೂರು: ಪುಸ್ತಕ ಮೇಳದ ನೆಪದಲ್ಲಿ ವಿಧಾನಸೌಧವನ್ನು ವೀಕ್ಷಿಸಲು ಜನಸಾಗರವೇ ಹರಿದು ಬಂದಿತ್ತು. ಭದ್ರತೆಯ ಕಾರಣಕ್ಕೆ ಮಧ್ಯಾಹ್ನ 3 ಗಂಟೆವರೆಗೆ ಮೊಗಸಾಲೆ ವೀಕ್ಷಣೆಗೆ ಅವಕಾಶ ನೀಡಿರಲಿಲ್ಲ. ಬಳಿಕ ಅವಕಾಶ ನೀಡಲಾಯಿತು.

ಅಲ್ಲಿಯವರೆಗೂ ಪುಸ್ತಕ ಪ್ರೇಮಿಗಳು ಹಾಗೂ ಜನ ಸಾಮಾನ್ಯರು ವಿಧಾನಸೌಧದ ಆವರಣದಲ್ಲಿ ಸರದಿ ಸಾಲಿನಲ್ಲಿ ಬಿಸಿಲಿನಲ್ಲಿಯೇ ನಿಂತಿದ್ದರು. ಪುಸ್ತಕ ಮೇಳದ ಪೂರ್ವ ಭಾಗದಿಂದ ಒಳಗೆ ಬಂದವರು ಮೊದಲ ಮಹಡಿ ಪ್ರವೇಶಿಸಿ ಅಲ್ಲಿಂದ ವಿಧಾನಸಭೆ ಅಧಿವೇಶನದ ಮೊಗಸಾಲೆಗೆ ಪ್ರವೇಶಿಸಿ ವೀಕ್ಷಿಸಿದರು. ಅಧಿವೇಶನ ಹೇಗೆ ನಡೆಯುತ್ತದೆ ಎನ್ನುವ ಮಾಹಿತಿಯನ್ನು ಕೇಳಿ ಪಡೆದರು. ಬಳಿಕ ವಿಧಾನಸೌಧ ಒಂದು ಸುತ್ತು ಹಾಕಿ ಫೋಟೊ ತೆಗೆಸಿಕೊಂಡರು.