ಟೆಂಪೊ– ಕಾರು ಡಿಕ್ಕಿ: ರಸ್ತೆಯಲ್ಲೆಲ್ಲ ಮದ್ಯದ ಬಾಟಲಿ

ಬೆಂಗಳೂರು: ಇನ್ಫೆಂಟ್ರಿ ರಸ್ತೆ ಬಳಿಯ ಕಾಫಿ ಬೋರ್ಡ್ ಎದುರಿನ ರಸ್ತೆಯಲ್ಲಿ ಟೆಂಪೊ ಹಾಗೂ ಕಾರು ನಡುವೆ ಸೋಮವಾರ ನಸುಕಿನಲ್ಲಿ ಅಪಘಾತ ಸಂಭವಿಸಿದ್ದು, ಚಾಲಕರು ಸೇರಿ ಮೂವರು ಗಾಯಗೊಂಡಿದ್ದಾರೆ.

‘ಅತಿ ವೇಗ ಹಾಗೂ ನಿರ್ಲಕ್ಷ್ಯದಿಂದಾಗಿ ಅಪಘಾತ ಸಂಭವಿಸಿದೆ. ಇದರಿಂದಾಗಿ ಟೆಂಪೊ ಹಾಗೂ ಕಾರಿನ ಮುಂಭಾಗ ಭಾಗಶಃ ಜಖಂಗೊಂಡಿದೆ. ಎರಡೂ ವಾಹನಗಳನ್ನು ಜಪ್ತಿ ಮಾಡಲಾಗಿದೆ’ ಎಂದು ಕಬ್ಬನ್ ಪಾರ್ಕ್ ಸಂಚಾರ ಪೊಲೀಸರು ಹೇಳಿದರು.

‘ಬಾರ್ ಹಾಗೂ ಪಬ್‌ಗಳಲ್ಲಿ ಸಂಗ್ರಹವಾಗಿದ್ದ ಕಸವನ್ನು ಟೆಂಪೊದಲ್ಲಿ ಸಾಗಿಸಲಾಗುತ್ತಿತ್ತು. ಎರಡೂ ವಾಹನಗಳ ಚಾಲಕರು ಹಾಗೂ ಕಾರಿನಲ್ಲಿದ್ದ ವ್ಯಕ್ತಿಯೊಬ್ಬರಿಗೆ ಗಾಯವಾಗಿದೆ’ ಎಂದರು.

ಟೆಂಪೊದಲ್ಲಿದ್ದ ಕಸವೆಲ್ಲ ರಸ್ತೆಯಲ್ಲಿ ಬಿದ್ದಿತ್ತು. ಕಸದಲ್ಲಿ ಮದ್ಯದ ಬಾಟಲಿಗಳು ಹೆಚ್ಚಿದ್ದವು. ಇದರಿಂದಾಗಿ ಇತರೆ ವಾಹನಗಳ ಸಂಚಾರಕ್ಕೆ ತೊಂದರೆಯಾಯಿತು. ಪೊಲೀಸರು, ಸ್ವಚ್ಛತೆ ಕೆಲಸಗಾರರ ಸಹಾಯದಿಂದ ಬೇರೊಂದು ವಾಹನದಲ್ಲಿ ಕಸವನ್ನು ತುಂಬಿ ಸ್ಥಳದಿಂದ ಸಾಗಿಸಿದರು.