ಸಾಮಾಜಿಕ, ಶೈಕ್ಷಣಿಕ ಸಮೀಕ್ಷೆ: ತಿಗಳ ಸಮೂಹದಡಿ 45 ಉಪ ಜಾತಿ ಪರಿಗಣಿಸಿ: ರಮೇಶ್‌

ಬೆಂಗಳೂರು: ‘ಸಾಮಾಜಿಕ ಮತ್ತು ಶೈಕ್ಷಣಿಕ ಸಮೀಕ್ಷೆಯಲ್ಲಿ ‘ತಿಗಳ ಸಮೂಹ’ದ ಅಡಿಯಲ್ಲಿ ಒಟ್ಟು 45 ಉಪ ಜಾತಿಗಳನ್ನ ಪರಿಗಣಿಸಬೇಕು’ ಆ ಸಮುದಾಯದ ಮುಖಂಡರೂ ಆಗಿರುವ ಎಂದು ವಿಧಾನ ಪರಿಷತ್‌ ಮಾಜಿ ಸದಸ್ಯ ಪಿ.ಆರ್‌. ರಮೇಶ್‌ ಆಗ್ರಹಿಸಿದ್ದಾರೆ.

ಹಿಂದುಳಿದ ವರ್ಗಗಳ ಆಯೋಗಕ್ಕೆ ಈ ಬಗ್ಗೆ ಮನವಿ ಸಲ್ಲಿಸಿರುವ ಅವರು, ‘ತಿಗಳ ಜಾತಿಯ ಅಡಿಯಲ್ಲಿ ಹಲವು ಉಪ ಜಾತಿಗಳಿವೆ. ನೂರಾರು ವರ್ಷಗಳಿಂದ ದ್ರಾವಿಡ ಪ್ರದೇಶವಾದ ಆಂಧ್ರ, ತೆಲಂಗಾಣ, ಕರ್ನಾಟಕ, ತಮಿಳುನಾಡು, ಕೇರಳ, ಪುದುಚೇರಿಯಲ್ಲಿ ಅವರ ಭಾಷೆಗಳಿಗೆ ಹಾಗೂ ಪ್ರದೇಶಗಳಿಗೆ ಅನುಗುಣವಾಗಿ ಕೆಲವು ಉಪ ಜಾತಿಗಳನ್ನು ಗುರುತಿಸಲಾಗಿದೆ. ಇನ್ನೂ ಹಲವು ತಿಗಳ ಸಮೂಹದ ಉಪ ಜಾತಿಗಳಿವೆ’ ಎಂದು ಅವರು ಹೇಳಿದ್ದಾರೆ.

‘ಮೈಸೂರು ಸರ್ಕಾರದ 1901ರ ಜಾತಿ ಮತ್ತು ಉಪ ಜಾತಿಗಳ ಜನಗಣತಿಯಂತೆ ತಿಗಳ ಅಡಿಯಲ್ಲಿ ಅಗ್ನಿ, ಅಗ್ರವಣ್ಣಿಯಾರ್, ಅರವ, ಬ್ರಹ್ಮರಿಷಿ,  ಧರ್ಮರಾಜು ಕಾಪು, ಯನ್ನೇರಿ, ಗೌಡ, ಗುಡನೋರು, ಹಳೇ ತಿಗಳ, ಹಳ್ಳಿ, ಕಂದಪಳ್ಳಿ, ಕನ್ನಡ, ಮಲರ್ಮಚತ್ರಿ, ಪಳ್ಳಿ, ಪಾಂಡ್ಯ, ರಾಜ, ರೆಡ್ಡಿ, ಸಾಂಬ, ತಿಗಳ, ತೋಟ, ಉಳ್ಳಿ, ವಣ್ಣೆ, ವಣ್ಣಿಕುಲ, ಯಾನಾದಿ ಹೀಗೆ ಒಟ್ಟ 24 ಉಪ ಜಾತಿಗಳನ್ನು ಗುರುತಿಸಲಾಗಿದೆ. ಕರ್ನಾಟಕಕ್ಕೆ ಸೀಮಿತವಾಗಿ ಕೇಂದ್ರ ಸರ್ಕಾರ 16 ತಿಗಳ ಉಪ ಜಾತಿಗಳನ್ನು ಪಟ್ಟಿ ಮಾಡಿದೆ. 2002ರಲ್ಲಿ ಕರ್ನಾಟಕ ಸರ್ಕಾರ ಹೊರಡಿಸಿರುವ ಅಧಿಸೂಚನೆಯಲ್ಲಿ ತಿಗಲ, ಅಗ್ನಿವಂಶ, ಅಗ್ನಿವನ್ನಿ, ಅಗ್ನಿಕುಲ‌ ಕ್ಷತ್ರಿಯ, ಧರ್ಮರಾಜ ಕಾಪು, ಪಳ್ಳಿ, ಶಂಭುಕುಲ ಕ್ಷತ್ರಿಯ, ತಿಗಳ, ವನ್ನಿಯಾರ್, ವನ್ನಿಕುಲ ಕ್ಷತ್ರಿಯ, ತಿಗ್ಲರ್‌, ಕುರೋವನ್ ಹೀಗೆ 12 ಉಪ ಜಾತಿಗಳನ್ನು ನಮೂದಿಸಲಾಗಿದೆ’ ಎಂದು ಅವರು ವಿವರಿಸಿದ್ದಾರೆ.

‘ಆದರೆ, ಹಿಂದುಳಿದ ವರ್ಗಗಳ ಆಯೋಗ ಸಮೀಕ್ಷೆಗೆ ಹೊರಡಿಸಿರುವ ಕೈಪಿಡಿಯಲ್ಲಿರುವ ‘ತಿಗಳ ಸಮೂಹದ’ ಉಪ ಜಾತಿಗಳ ಪಟ್ಟಿಯಲ್ಲಿ ಎಲೆ ತಿಗಳ, ತೋಟ ಗೌಡ, ಉಳ್ಳಿ ತಿಗಳ ಎಂಬ ಮೂರು ಉಪ ಜಾತಿಗಳನ್ನೂ ಸೇರಿಸಬೇಕು. ಆ ಮೂಲಕ, ಒಟ್ಟು 45 ಉಪ ಜಾತಿಗಳನ್ನು ‘ತಿಗಳ ಸಮೂಹ’ದ ಅಡಿಯಲ್ಲಿ ಸಮೀಕ್ಷೆಗೆ ಒಳಪಡಿಸಬೇಕು’ ಎಂದು ಅವರು ಮನವಿ ಮಾಡಿದ್ದಾರೆ.