ಹುತಾತ್ಮ ಯೋಧರ ಕುಟುಂಬಕ್ಕೆ ಗೌರವ

ಬೆಂಗಳೂರು: ದೇಶಕ್ಕಾಗಿ ಗಡಿಯಲ್ಲಿ ಹೋರಾಡಿ, ಹುತಾತ್ಮರಾದ ವೀರ ಯೋಧರ ಕುಟುಂಬದ ಸದಸ್ಯರಿಗೆ ಇಲ್ಲಿನ ಪಿಇಎಸ್ ವಿಶ್ವವಿದ್ಯಾಲಯದ ವಿದ್ಯಾರ್ಥಿಗಳು ಗೌರವ ಸಮರ್ಪಿಸಿದರು.

ನಗರದಲ್ಲಿ ವಿಶ್ವವಿದ್ಯಾಲಯ ಮಂಗಳವಾರ ಹಮ್ಮಿಕೊಂಡ ‘ಸಮರ್ಪಣ–2022’ ಕಾರ್ಯಕ್ರಮದಲ್ಲಿ ಅಗಲಿದ ಯೋಧರನ್ನು ಸ್ಮರಿಸಿಕೊಳ್ಳಲಾಯಿತು. ವಿದ್ಯಾರ್ಥಿಗಳು ಚಿತ್ರೀಕರಿಸಿದ ವಿಶೇಷ ಗೀತೆಯನ್ನು ಸೈನಿಕರ ಕುಟುಂಬದ ಸದಸ್ಯರ ಸಮ್ಮುಖದಲ್ಲಿ ಪ್ರಸ್ತುತಪಡಿಸಲಾಯಿತು. ಗೌರವ ಸ್ವೀಕರಿಸಿದ ಯೋಧರ ಕುಟುಂಬದ ಸದಸ್ಯರು, ಭಾವುಕರಾಗಿದ್ದರು. ಅಗಲಿದ ಪತಿ, ಪುತ್ರ, ಸಹೋದರನ ಹೆಸರು ಎಲ್‌ಇಡಿ ಪರದೆಯ ಮೇಲೆ ಮೂಡುತ್ತಿದ್ದಂತೆ ನೆರೆದಿದ್ದ ಕುಟುಂಬಗಳ ಸದಸ್ಯರ ಕಣ್ಣು ಒದ್ದೆಯಾಗಿದ್ದವು.

ಕೆ.ಪಿ. ಬೆಳ್ಳಿಯಪ್ಪ,ಚಾಂದ್ ಪಾಷಾ, ವೀರೇಶ ಕುರಹಟ್ಟಿ,ಉಮೇಶಪ್ಪ ಕೆ.,ಹುಸೇನ್ ಸಾಬ್ ಎಫ್., ವರುಣ್ ಮನೋಹರ್, ಸದಾಶಿವ ಪಡಲೆ, ಅಥಾವುಲ್ಲಾ ಪಾರಾ, ಈರಪ್ಪ ನಂದಿಹಳ್ಳಿ, ನಾಗೇಶ್ ಟಿ.ಟಿ., ಉಮೇಶ್ ಎಂ., ಕೆ. ತಿಮ್ಮಯ್ಯ, ಯಶವಂತ್ ಡಿ., ಚಂದ್ರಕಾಂತ್ ಪಾಟೀಲ, ಶಿವಬಸಯ್ಯ ಕುಲಕರ್ಣಿ, ಭರ್ಮಾ ಕುತಾಲೆ, ಸಂದೀ‍ಪ್ ನಾಯ್ಕ್, ಮಹಾದೇವ್ ಪಾಟೀಲ, ಪ್ರಶಾಂತ್ ಎ.ಪಿ., ಡಿ. ಡೇವಿಡ್, ಮಲ್ಲಪ್ಪ ಹುಲ್ಹಲೈ, ಡಿ.ಬಿ.ಗಾಯಕ್ವಾಡ್ ಹಾಗೂ ಅಮೀರ್ ಮಿಯಾನ್ ಅವರ ಕುಟುಂಬದ ಸದಸ್ಯರನ್ನು ಗೌರವಿಸಲಾಯಿತು.

ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆಯ (ಇಸ್ರೊ) ಮಾಜಿ ಅಧ್ಯಕ್ಷ ಎ.ಎಸ್. ಕಿರಣ್ ಕುಮಾರ್, ‘ನಾವು ಸಮಾಜದಲ್ಲಿ ಶಾಂತಿಯುತ ಜೀವನ ನಡೆಸಲು ಹಾಗೂವಿವಿಧ ಕ್ಷೇತ್ರಗಳಲ್ಲಿ ಕಾರ್ಯಪ್ರವೃತ್ತರಾಗಲು ಯೋಧರು ತಮ್ಮ ಜೀವನವನ್ನು ಸಮರ್ಪಣೆ ಮಾಡುತ್ತಾರೆ. ಕೆಲವು ವೇಳೆ ದೇಶಕ್ಕಾಗಿ ಜೀವವನ್ನೂ ಅರ್ಪಿಸಬೇಕಾಗುತ್ತದೆ. ಇಂತಹ ವೀರ ಯೋಧರ ಕುಟುಂಬದ ದುಃಖವನ್ನು ಯಾರಿಂದಲೂ ನಿವಾರಿಸಲು ಸಾಧ್ಯವಿಲ್ಲ’ ಎಂದು ಹೇಳಿದರು.

‘ಈ ಮೊದಲು ದೇಶದ ಮೇಲೆ ಹೊರಗಡೆಯವರು ದಾಳಿ ನಡೆಸುವ ಸಾಧ್ಯತೆಗಳಿರುತ್ತಿದ್ದವು. ಇತ್ತೀಚಿನ ವರ್ಷಗಳಲ್ಲಿ ದೇಶದಲ್ಲಿನ ಕೆಲವರು ದೇಶ ವಿರೋಧಿ ಕೃತ್ಯದಲ್ಲಿ ತಮ್ಮನ್ನು ತೊಡಗಿಸಿಕೊಂಡು, ವಿವಿಧ ಕಾರ್ಯಚಟುವಟಿಕೆಯಲ್ಲಿ ನಿರತರಾಗುತ್ತಿದ್ದಾರೆ. ಹೀಗಾಗಿ, ದೇಶದ ಒಳಗಡೆಯೂ ವಿವಿಧ ಸಮಸ್ಯೆಗಳು ಕಾಣಿಸಿಕೊಳ್ಳುತ್ತಿವೆ. ವಿಜ್ಞಾನ ಮತ್ತು ತಂತ್ರಜ್ಞಾನದ ನೆರವಿನಿಂದ ಜಾಗತಿಕ ಹಾಗೂ ದೇಶೀಯ ಸಮಸ್ಯೆಗಳಿಗೆ ಪರಿಹಾರ ಕಂಡುಕೊಳ್ಳಬೇಕು.ಕೃತಕ ಬುದ್ಧಿಮತ್ತೆ ಸೇರಿ ವಿವಿಧ ಅತ್ಯಾಧುನಿಕ ತಂತ್ರಜ್ಞಾನಗಳನ್ನು ಸಮರ್ಪಕವಾಗಿ ಬಳಸಿಕೊಳ್ಳಬೇಕು’ ಎಂದು ಹೇಳಿದರು.