ಮತದಾನ ಬಹಿಷ್ಕರಿಸಿದ ಕಾಶೆಂಪುರಗೆ ಬಂಡೆಪ್ಪ ಭೇಟಿ

ಔರಾದ್‌: ಮಾಜಿ ಸಚಿವ ಬಂಡೆಪ್ಪ ಕಾಶೆಂಪುರ ಬುಧವಾರ ಕಾಶೆಂಪುರ (ಬಿ) ಗ್ರಾಮಕ್ಕೆ ಭೇಟಿ ನೀಡಿದರು.

ಮೂಲ ಸೌಲಭ್ಯಕ್ಕೆ ಆಗ್ರಹಿಸಿ ಗ್ರಾಮಸ್ಥರು ಈಚೆಗೆ ನಡೆದ ಲೋಕಸಭೆ ಚುನಾವಣೆಯಲ್ಲಿ ಮತದಾನದಿಂದ ದೂರ ಉಳಿದಿದ್ದರು. ಅಂತಹ ಗ್ರಾಮ­ಗಳಿಗೆ ಭೇಟಿ ನೀಡಿ ಅವರ ಸಮಸ್ಯೆ ಏನು ಎಂಬುದನ್ನು ಕಲೆ ಹಾಕುತ್ತಿದ್ದು, ಗ್ರಾಮಕ್ಕೆ ಇಲ್ಲಿಯವರೆಗೆ ರಸ್ತೆ ಸೌಲಭ್ಯ ದಕ್ಕದಿರುವುದು ವಿಷಾದ. ಈ ಕ್ಷೇತ್ರ ಪ್ರತಿನಿಧಿಸುವ ಶಾಸಕ ಪ್ರಭು ಚವಾಣ್‌ ಜೊತೆ ಸಮಾಲೋಚಿಸಿ ಸಮಸ್ಯೆಗೆ ಪರಿಹಾರ ಹುಡುಕುವುದಾಗಿ  ಗ್ರಾಮಸ್ಥರಿಗೆ ಭರವಸೆ ನೀಡಿದರು.

ಮೂರು ವರ್ಷದ ಹಿಂದೆ ಶಾಸಕ ಚವಾಣ್ ರಸ್ತೆ ಅಭಿವೃದ್ಧಿಗೆ ₨25 ಲಕ್ಷ ಅನುದಾನ ಇಟ್ಟಿದ್ದರು. ಆದರೆ ಯಾರೋ ಒಬ್ಬರು ಆಕ್ಷೇಪ ಎತ್ತಿದ್ದಾರೆ ಎಂದು ನೆಪಹೇಳಿ ಹಣ ಕಬಳಿಕೆ­ಯಾಗಿದೆ.

20 ವರ್ಷಗಳಿಂದ ರಸ್ತೆ ಮಾಡಿಸುವುದಾಗಿ ಹಲವರು ಹೇಳಿ­ದರೂ ಸಮಸ್ಯೆ ಬಗೆಹರಿದಿಲ್ಲ ಎಂದು ಗ್ರಾಮಸ್ಥರು ಮಾಜಿ ಸಚಿವರ ಎದುರು

ದೂರಿದರು.

ರಸ್ತೆ ಕಾಮಗಾರಿ  ನನೆ­ಗುದಿಗೆ ಬೀಳಲು ಕಾರಣ ಹಾಗೂ ಪರಿ­ಹಾರ ಸಂಬಂಧ  ಜಿಲ್ಲಾಧಿಕಾರಿ  ಜೊತೆ ಚರ್ಚಿ­ಸು­ವುದಾಗಿ ಕಾಶೆಂಪುರ ಹೇಳಿದರು.

ಜಿಲ್ಲಾ ಪಂಚಾಯಿತಿ ಸದಸ್ಯ ವಸಂತ ಬಿರಾದಾರ, ಶಿವರಾಜ, ರಾಮಶೆಟ್ಟಿ ಪಾಟೀಲ, ಮಾದರಾವ ಪಾಟೀಲ, ಅಂಕುಶ ಮುಳೆ, ಗುಂಡಪ್ಪ ಬಿರಾದಾರ ಇದ್ದರು.

‘ಮತದಾನ ಬಹಿಷ್ಕರಿಸಿದರೂ ಸಿಗದ ಸ್ಪಂದನೆ’ ಎಂಬ ಶೀರ್ಷಿಕೆಯಡಿ ‘ಪ್ರಜಾವಾಣಿ’ ಮಂಗಳವಾರ ವರದಿ ಪ್ರಕಟಿಸಿತ್ತು.