ಮಾವು, ಪೇರಲಕ್ಕೆ ಕೀಟ ಬಾಧೆ: ರೈತರಿಗೆ ಸಲಹೆ

ಬೀದರ್: ಹವಾಮಾನ ಬದಲಾವಣೆ­ಯಿಂದಾಗಿ ಜಿಲ್ಲೆಯ ವಿವಿಧೆಡೆ ತೋಟಗಾರಿಕೆ ಬೆಳೆಗಳಲ್ಲಿ ಕೀಟ ಹಾಗೂ ರೋಗ ಬಾಧೆ ಕಂಡು ಬಂದಿದ್ದು, ರೈತರು ನಿರ್ವಹಣಾ ಕ್ರಮಗಳನ್ನು ಅನುಸರಿಸಬೇಕು ಎಂದು ತೋಟಗಾರಿಕೆ ಇಲಾಖೆ ಉಪ ನಿರ್ದೇಶಕ ಡಾ. ಪಿ.ಎಸ್. ಕುಲಕರ್ಣಿ ತಿಳಿಸಿದ್ದಾರೆ.

ಮಾವಿನ ಹೂಗಳಲ್ಲಿ ಬೂದಿ ರೋಗ, ­ರಸ ಹೀರುವ ಕೀಟಗಳ ಬಾಧೆ ಕಾಣಿಸಿದೆ. ಹೂ, ಕಾಯಿ ದೇಟುಗಳ ಮೇಲೆ ಮೊಸರಿನಂತೆ ಬಿಳಿ ಬಣ್ಣ ಕಾಣಿಸಿಕೊಳ್ಳುವುದು ಈ ರೋಗದ ಲಕ್ಷಣ. ರಸ ಹೀರುವ ಕೀಟಗಳ ಬಾಧೆಯಿಂದ ಹೂಗಳು, ಮಿಡಿಗಳು ಕಂದು ಬಣ್ಣಕ್ಕೆ ತಿರುಗಿ ಉದುರುತ್ತವೆ ಎಂದು ಹೇಳಿದ್ದಾರೆ.

ಬೂದಿ ರೋಗ ಹಾಗೂ ರಸ ಹೀರುವ ಕೀಟಗಳ ಬಾಧೆ ಕಂಡು ಬಂದಲ್ಲಿ ಲ್ಯಾಮಡಾ ಸೈಲೋಥ್ರಿನ್ 0.5 ಮಿ.ಲೀ. ಅಥವಾ ಕ್ವಿನಾಲ್‍ಫಾಸ್ 2 ಮಿ.ಲೀ., 1 ಗ್ರಾಂ. ಕಾರ್ಬನ್‌ ಡೆಜಿಮ್ ಪುಡಿ, ಅರ್ಧ ಮಿ.ಲೀ. ಅಚಿಟಿನ್ ದ್ರಾವಣವನ್ನು ಲೀಟರ್ ನೀರಿಗೆ ಬೆರೆಸಿ ಎಲೆ, ಹೂ, ಕಾಯಿ, ರೆಂಬೆ, ಕೊಂಬೆ, ಬುಡಕ್ಕೆ ಸಿಂಪಡಿಸಬೇಕು.

ಕಾಯಿಗಳು ಲಿಂಬೆಹಣ್ಣಿನಷ್ಟು ಗಾತ್ರ­ವಾದಾಗ  1 ಗ್ರಾಂ. ಅಸಿಫೇಟ್ ಅಥವಾ 1 ಮಿ.ಲೀ. ಡೆಕಾಮೈಥಿನ್ ಔಷಧಿ, ಅರ್ಧ ಮಿ.ಲೀ. ಮಾಕ್ಸವೆಟ್ ಅಚಿಟ್‍ನ್ನು 1 ಲೀ. ನೀರಿಗೆ ಬೆರೆಸಿ ಸಿಂಪಡಿಸಬೇಕು. ಹಣ್ಣು ಕೊಯ್ಯುವ 1 ತಿಂಗಳ ಮೊದಲು ಕಾರ್ಬನ್‍ಡೆಜಿಮ್ 1 ಗ್ರಾಂ. 1 ಲೀಟರ್ ನೀರಿಗೆ ಬೆರೆಸಿ ಸಿಂಪಡಿಸಬೇಕು.

ಪೇರಲ ಗಿಡಗಳಲ್ಲಿ  ಬಿಳಿ ಬಿಳಿ ಉಣ್ಣೆ ಹುಳುಗಳು ಕಂಡು ಬಂದಿದ್ದು, ಇವುಗಳನ್ನು ನಿಯಂತ್ರಿಸಲು 3 ಮಿ.ಲೀ. ಬೇವಿನ ಎಣ್ಣೆ ಅಥವಾ 10 ಗ್ರಾಂ. ಬೇವಿನ ಸಾಬೂನು ಪುಡಿ ಅಥವಾ 250 ಮಿ.ಲೀ. ಹಸುವಿನ ಗಂಜಲ 15 ದಿನಗಳಿಗೊಮ್ಮೆ ಎರಡು- ಮೂರು ಬಾರಿ ಎಲೆಗಳ ಮೇಲೆ ಮತ್ತು ಕೆಳಗೆ ಸಿಂಪಡಿಸಬೇಕು ಎಂದು ತಿಳಿಸಿದ್ದಾರೆ.

ಹೆಚ್ಚಿನ ಮಾಹಿತಿಗೆ  ಜಿಲ್ಲಾ ಹಾರ್ಟಿ ಕ್ಲಿನಿಕ್‌ನ ತೋಟಗಾರಿಕೆ ವಿಷಯ ತಜ್ಞ ಡಾ. ವಿಜಯಕುಮಾರ್ ರೇವಣ್ಣ (9482053985) ಅವರನ್ನು ಸಂಪರ್ಕಿಸಬಹುದು ಎಂದು ತಿಳಿಸಿದ್ದಾರೆ.