ಅಂತರರಾಜ್ಯ ಕಳ್ಳರ ಬಂಧನ: ನಗದು ಸೇರಿದಂತೆ 7 ಲಕ್ಷ ಮೌಲ್ಯದ ಸ್ವತ್ತು ಜಪ್ತಿ

ಭಾಲ್ಕಿ: ತಾಲ್ಲೂಕಿನ ಭಾತಂಬ್ರಾ ಗ್ರಾಮ ಸಮೀಪದ ಲಕ್ಷ್ಮೀ ಭಾಂಡೆ ಸ್ಟೋರ್‌ನಲ್ಲಿ ಈಚೆಗೆ ಕಳ್ಳತನ ಮಾಡಿ 10 ಲಕ್ಷ ರೂಪಾಯಿ ಮೌಲ್ಯದ ಬೆಲೆ ಬಾಳುವ ಭಾಂಡೆ ಸಾಮಾನುಗಳನ್ನು ಕಳವು ಮಾಡಿದ್ದ ಆರೋಪಿಗಳನ್ನು ಗ್ರಾಮೀಣ ಪೊಲೀಸ್ ಠಾಣೆ ಪೊಲೀಸರು ಬಂಧಿಸಿದ್ದಾರೆ.

ಬಂಧಿತರಿಂದ ₹3 ಲಕ್ಷ ನಗದು, 1ಲಕ್ಷ ಮೌಲ್ಯದ ಸ್ಯಾಂಟ್ರೊ ಕಾರು, 3 ಲಕ್ಷ ರೂಪಾಯಿ ಬೆಲೆಬಾಳುವ ಬೊಲೆರೊ ಪಿಕ್ ಅಪ್ ವಾಹನ ಸೇರಿದಂತೆ ಒಟ್ಟು 7 ಲಕ್ಷ ಮೌಲ್ಯದ ಸ್ವತ್ತು ಜಪ್ತಿ ಮಾಡಲಾಗಿದೆ.

ಜನವರಿ 30ರ ರಾತ್ರಿ ಕಳ್ಳರು ಭಾಂಡೆ ಸ್ಟೋರ್‌ನ ಹಿಂಭಾಗದ ನಟ್ ಬೋಲ್ಟ್ ತೆಗೆದು ಅಂಗಡಿಯಲ್ಲಿನ ವಿವಿಧ ತಾಮ್ರ, ಹಿತ್ತಾಳೆ, ಸ್ಟೀಲ್ ಸೇರಿದಂತೆ ಇತರ ನಮೂನೆಯ ಸುಮಾರು ₹10 ಲಕ್ಷ ರೂಪಾಯಿ ಮೌಲ್ಯದ ಸಾಮಾನುಗಳನ್ನು ಕಳವು ಮಾಡಿದ್ದರು.

ಸಿಪಿಐ ಹನುಮರೆಡ್ಡೆಪ್ಪ, ಪಿಎಸ್‌ಐಗಳಾದ ಅಶೋಕ, ರಮೇಶ ನೇತೃತ್ವದ ತಂಡವು ಭಾನುವಾರ ಮಹಾರಾಷ್ಟ್ರ ರಾಜ್ಯದ ಲಾತೂರಿನ ರಫೀಕ್ (30), ನರಸಿಂಗ (30), ಪ್ರಕಾಶ (30)ನನ್ನು ಬಂಧಿಸಿ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಿದೆ.

ಇಬ್ಬರು ತಲೆ ಮರೆಸಿಕೊಂಡಿದ್ದು, ಅವರ ಬಂಧನಕ್ಕಾಗಿ ಶೋಧ ಮುಂದುವರಿದಿದೆ. ಕಳ್ಳರ ಬಂಧನ ತಂಡದಲ್ಲಿ ಕಾನ್‌ಸ್ಟೆಬಲ್‌ಗಳಾದ ಗುರುನಾಥ, ಶಾಮರಾಯ, ಶಿವರಾಜ, ಉಮಾಕಾಂತ ದಾನಾ, ಭಗವಾನ, ರಾಜೇಂದ್ರ, ಮಹಾದೇವ ಹಿರೇಮಠ, ಜಗದೀಶ ಇದ್ದರು.