ಬೀದರ್: ಟನ್‍ ಕಬ್ಬಿಗೆ ₹ 3,150 ಬೆಲೆ ನಿಗದಿ

ಭಾಲ್ಕಿ: ತಾಲ್ಲೂಕಿನ ಬಾಜೋಳಗಾ ಸಮೀಪದ ಗೌರಿ ಸಕ್ಕರೆ ಹಾಗೂ ಡಿಸ್ಟಲರಿ ಕಾರ್ಖಾನೆ ಪ್ರಸಕ್ತ ಹಂಗಾಮಿನಲ್ಲಿ ಪ್ರತಿ ಟನ್ ಕಬ್ಬಿಗೆ ₹3,150 ಬೆಲೆ ಕೊಡಲಿದೆ’ ಎಂದು ಕಾರ್ಖಾನೆಯ ಮಾಲೀಕ ಬಾಬುರಾವ್ ಬೋತ್ರೆ ಪಾಟೀಲ ತಿಳಿಸಿದ್ದಾರೆ.

ಆರಂಭಿಕ ಹಂತದಲ್ಲಿ ಕಾರ್ಖಾನೆಗೆ ಕಬ್ಬು ಸರಬರಾಜು ಮಾಡುವ ರೈತರಿಗೆ ಮೊದಲ ಕಂತಾಗಿ ಪ್ರತಿ ಟನ್‍ಗೆ ₹ 2,900, ದೀಪಾವಳಿಗೆ ₹100 ಸಂದಾಯ ಮಾಡಲಾಗುವುದು. ರಾಜ್ಯ ಸರ್ಕಾರ ₹50 ಪ್ರೋತ್ಸಾಹ ಧನ ನೀಡಲಿದ್ದು, ಒಟ್ಟು ₹ 3,050 ಬೆಲೆ ಪಾವತಿಸಿದಂತೆ ಆಗಲಿದೆ. ಏಪ್ರಿಲ್ ನಂತರ ಕಬ್ಬು ಪೂರೈಸುವವರಿಗೆ ₹100 ಹೆಚ್ಚುವರಿಯಾಗಿ ಅಂದರೆ ಟನ್‍ಗೆ ₹3,150 ಬೆಲೆ ನೀಡಲಾಗುವುದು ಎಂದು ತಿಳಿಸಿದ್ದಾರೆ.

‘ಕಾರ್ಖಾನೆಯಲ್ಲಿ ತೂಕ ಸೇರಿದಂತೆ ಎಲ್ಲ ವ್ಯವಸ್ಥೆ ಪಾರದರ್ಶಕವಾಗಿದೆ. ಸಕಾಲಕ್ಕೆ ಕಬ್ಬು ಹಣ ಪಾವತಿಯಾಗಲಿದೆ. ಕಾರಣ, ರೈತರು ಕಾರ್ಖಾನೆಗೆ ಕಬ್ಬು ಪೂರೈಸಿ ಸಹಕರಿಸಬೇಕು’ ಎಂದು ಕಾರ್ಖಾನೆಯ ಪ್ರಧಾನ ವ್ಯವಸ್ಥಾಪಕ ಮಹಾವೀರ ಘೋಡ್ಕೆ ಮನವಿ ಮಾಡಿದ್ದಾರೆ.