ಗುಂಡ್ಲುಪೇಟೆ: ತಾಯಿಯಿಂದ ಬೇರ್ಪಟ್ಟು ಶಾಲೆಗೆ ಬಂದ ಮರಿಯಾನೆ

ಗುಂಡ್ಲುಪೇಟೆ (ಚಾಮರಾಜನಗರ): ತಾಯಿಯಿಂದ ಬೇರ್ಪಟ್ಟ ಮರಿಯಾನೆಯು ಕೇರಳದ ಸುಲ್ತಾನ್ ಬತ್ತೇರಿ ತಾಲ್ಲೂಕಿನ ಕಾಡಂಚಿನ ಪುಲುಪಳ್ಳಿಯ ಶಾಲಾ ಆವರಣಕ್ಕೆ ಸೋಮವಾರ ನುಗ್ಗಿ ಕೆಲಕಾಲ ಗೊಂದಲ ಸೃಷ್ಟಿಸಿತ್ತು.

ದಾರಿತಪ್ಪಿ ಶಾಲೆಗೆ ಬಂದ ಮರಿಯಾನೆ ಆವರಣದ ತುಂಬೆಲ್ಲ ಅಡ್ಡಾಡಿ ತರಗತಿ ಕೊಠಡಿಯೊಳಗೆ ಪ್ರವೇಶಿಸಲು ಯತ್ನಿಸಿತು. ಅದರ ತುಂಟಾಟ ನೋಡಿ ಮಕ್ಕಳು ದೂರದಿಂದ ಕೇಕೆ ಹಾಕುತ್ತಾ ಖುಷಿಪಟ್ಟ ದೃಶ್ಯಗಳು ಸಾಮಾಜಿಕ ಮಾಧ್ಯಮಗಳಲ್ಲಿ ಹರಿದಾಡಿದ್ದವು. ಅದೃಷ್ಟವಶಾತ್ ಯಾರಿಗೂ ಗಾಯವಾಗಿಲ್ಲ. ಶಿಕ್ಷಕರಿಂದ ಮಾಹಿತಿ ಪಡೆದ ಅರಣ್ಯ ಸಿಬ್ಬಂದಿ ಮರೆಯಾನೆಯನ್ನು ರಕ್ಷಿಸಿದ್ದು, ತಾಯಿಯ ಜೊತೆ ಸೇರಿಸುವ ಯತ್ನದಲ್ಲಿದ್ದಾರೆ.