ಮೊಬೈಲ್ ವ್ಯಸನಕ್ಕೆ ನಾಟಕ ಮದ್ದು: ರಂಗ ನಿರ್ದೇಶಕ ಪ್ರಸನ್ನ ಹೆಗ್ಗೋಡು

ಕೊಳ್ಳೇಗಾಲ: 21ನೇ ಶತಮಾನದಲ್ಲಿ ಎದುರಾಗುವ ದ್ವಂದ್ವವನ್ನು ಇಂದಿನ ಯುವಜನತೆಯೇ ಪರಿಹರಿಸಬೇಕು ಎಂದು ರಂಗ ನಿರ್ದೇಶಕ ಪ್ರಸನ್ನ ಹೆಗ್ಗೋಡು ಹೇಳಿದರು.

ನಗರದ ಮಾನಸ ಶಿಕ್ಷಣ ಸಂಸ್ಥೆಯಲ್ಲಿ ಮೂರು ದಿನ ನಡೆಯುವ ‘ಮಾನಸೋತ್ಸವ’ಕ್ಕೆ ಶುಕ್ರವಾರ ಚಾಲನೆ ನೀಡಿ ಅವರು ಮಾತನಾಡಿದರು.

ಯುವಜನತೆ ತಮ್ಮ ಶಕ್ತಿ, ಧೈರ್ಯದಿಂದ  ಎಲ್ಲಾ ವಯೋವೃದ್ಧರನ್ನು ರಕ್ಷಿಸಬೇಕು. ಬಂಗಾರ ಸಂಪತ್ತನ್ನು ಜನರ ಕಲ್ಯಾಣಕ್ಕೆ ಬಳಸಬೇಕು  ಸಾಮಾಜಿಕ ಬಂಗಾರ ಮಾಡಿದರೆ ಸಂಪತ್ತು ಹೆಚ್ಚುತ್ತದೆ. ಸಮಾಜ ಆರ್ಥಿಕ ಗಳಿಕೆಯತ್ತ ಗಮನ ಕೊಡಬಾರದು, ಸಾಮಾಜಿಕ ಗಳಿಕೆಯ ಕಡೆ ಗಮನ ಕೊಡಬೇಕು, ಆಗ ನಿಮ್ಮ ಶಿಕ್ಷಣ ಮತ್ತು ತಜ್ಞತೆಗೆ ಬೆಲೆ ದೊರಕುತ್ತದೆ ಎಂದರು.

 ನಾನು ಶೈಕ್ಷಣಿಕ ಕ್ಷೇತ್ರದಲ್ಲಿ ಮಗುವಿನ ಮಗುತನವನ್ನು ರಕ್ಷಿಸಲು ತೀರ್ಮಾನಿಸಿದ್ದೇನೆ. ಮಕ್ಕಳ ಸ್ವಚ್ಛಂದತೆ, ನಾಟ್ಯ,  ಹಾಡುವ ಗುಣದ ಸಹಜತೆ ದೊಡ್ಡವರಾದ ಮೇಲೆ ಉಳಿಯುವುದಿಲ್ಲ. ಮಕ್ಕಳ ಸಹಜತೆಯನ್ನು ಉಳಿಸುವುದೇ ನನ್ನ ಧ್ಯೇಯ. ಮೊಬೈಲ್ ಫೋನ್‌  ಚಟದಿಂದ ಹೊರಬರಲು ನಾಟಕ ಪ್ರಮುಖ ಔಷಧಿ ಎಂದರು.   ರವೀಂದ್ರನಾಥ ಠಾಗೋರರ 'ಒಂಟಿಯಾಗಿ ನಡೆ' ಕವಿತೆಯನ್ನು ವಿಶ್ಲೇಷಿಸಿ ವಿದ್ಯಾರ್ಥಿಗಳಲ್ಲಿ ಆತ್ಮಸ್ಥೆರ್ಯವನ್ನು ತುಂಬಿದರು.

ಬೆಂಗಳೂರು ಕೆಂಗೇರಿ ವಿಶ್ವ ಒಕ್ಕಲಿಗ ಮಹಾಸಂಸ್ಥಾನ ಮಠದ  ನಿಶ್ಚಲಾನಂದ ನಾಥ ಸ್ವಾಮೀಜಿ ಮಾತನಾಡಿ, ನಂಜುಂಡಯ್ಯನವರ ವರದಿ ಪ್ರಕಾರ ಚಾಮರಾಜನಗರ  ಆರ್ಥಿಕವಾಗಿ , ಸಾಮಾಜಿಕವಾಗಿ ಹಿಂದುಳಿದ ಜಿಲ್ಲೆ. ಇಲ್ಲಿ ಗ್ರಾಮೀಣ ಮಕ್ಕಳಿಗೆ ನೈತಿಕ, ಸ್ಪರ್ಧಾತ್ಮಕ ಶಿಕ್ಷಣವನ್ನು ನೀಡುತ್ತಿರುವ ಡಾ. ಎಸ್ ದತ್ತೇಶ್ ಕುಮಾರ್‌ ಅಗ್ರ ಸಾಲಿನಲ್ಲಿ ನಿಲ್ಲುತ್ತಾರೆ. ಭೌತಿಕ ದೃಷ್ಟಿಯಿಂದ ವ್ಯವಹಾರಿಕ ದೃಷ್ಟಿಯಿಂದ ಸ್ಪರ್ಧಾತ್ಮಕ ದೃಷ್ಟಿಯಿಂದ ಮಾನಸ ಶಿಕ್ಷಣ ಸಂಸ್ಥೆಯ ವಿದ್ಯಾರ್ಥಿಗಳು ಮುಂದೆ ಬರಬೇಕು.  ಜನ ಸಮುದಾಯ ಎತ್ತರಕ್ಕೆ ಬೆಳೆಯಬೇಕಾದರೆ ವೈಜ್ಞಾನಿಕವಾಗಿ ತಾಂತ್ರಿಕವಾಗಿ ಭೌತಿಕವಾಗಿ ಬೌದ್ಧಿಕವಾಗಿ  ತೊಡಗಿಸಿಕೊಳ್ಳಬೇಕು. ರಾಷ್ಟ್ರ ನಾಯಕರ ಆದರ್ಶಗಳನ್ನು ಪಾಲಿಸಬೇಕಾದ ಯುವ ಸಮುದಾಯ ದೇಶದ್ರೋಹ ಕೆಲಸದಲ್ಲಿತೊಡಗಿರುವುದು ಆತಂಕಕಾರಿಯಾಗಿದೆ. ದೇಶಕ್ಕೆ ಒಳಿತಾಗುವ ಆಲೋಚನೆಗಳನ್ನು ತೆರೆಯುವುದೇ ಶಿಕ್ಷಣದ ಘನ ಉದ್ದೇಶವಾಗಬೇಕು ಎಂದರು.

  ಪತ್ರಕರ್ತ ಸತ್ಯನಾರಾಯಣ, ಪ್ರಾಚ್ಯ ವಿದ್ಯಾ ಸಂಶೋಧನಾಲಯ ನಿರ್ದೇಶಕ  ಡಾ. ಶಿವರಾಜಪ್ಪ, ಮಾನಸ ಶಿಕ್ಷಣ ಸಂಸ್ಥೆಯ ಕಾರ್ಯದರ್ಶಿ ಡಾ.ದತ್ತೇಶ್ ಕುಮಾರ್, ಅಧ್ಯಕ್ಷ ನಾಗಣ್ಣ , ವಿದ್ಯಾರ್ಥಿಗಳು ಉಪನ್ಯಾಸಕರು, ಪೋಷಕರು ಪಾಲ್ಗೊಂಡಿದ್ದರು.