ಚಾಮರಾಜನಗರ | ತಾಯಿ ಹುಲಿಗಾಗಿ ಮುಂದುವರಿದ ಕೂಂಬಿಂಗ್: ಥರ್ಮಲ್‌ ಡ್ರೋನ್ ಬಳಕೆ

ಚಾಮರಾಜನಗರ: ಬಿಆರ್‌ಟಿ ಹುಲಿ ಸಂರಕ್ಷಿತ ಪ್ರದೇಶದ ಪುಣಜನೂರು–ಬೇಡಗುಳಿ ಸಮೀಪ ಮೂರು ಮರಿಗಳನ್ನು ಬಿಟ್ಟು ನಾಪತ್ತೆಯಾಗಿರುವ ತಾಯಿ ಹುಲಿಯ ಶೋಧ ಕಾರ್ಯ ಮುಂದುವರಿದಿದೆ.

ಗುರುವಾರವೂ ಮತ್ತಿಗೂಡು ಆನೆ ಶಿಬಿರದ ಭೀಮ ಹಾಗೂ ಬಳ್ಳೆ ಆನೆ ಶಿಬಿರದ ಮಹೇಂದ್ರ ಆನೆಗಳನ್ನು ಬಳಸಿಕೊಂಡು ಅರಣ್ಯದೊಳಗೆ ಹಗಲಿರುಳು ‌ಕೂಂಬಿಂಗ್ ನಡೆಸಲಾಯಿತು. 90ಕ್ಕೂ ಹೆಚ್ಚು ಅರಣ್ಯ ಇಲಾಖೆಯ ಅಧಿಕಾರಿಗಳು ಹಾಗೂ ಸಿಬ್ಬಂದಿ ಕಾರ್ಯಾಚರಣೆಯಲ್ಲಿ ಭಾಗಹಿವಹಿಸಿದ್ದಾರೆ.

ಧರ್ಮಲ್‌ ಡ್ರೋನ್ ಬಳಕೆ: ರಾತ್ರಿಯ ವೇಳೆ ಶೋಧ ಕಾರ್ಯಕ್ಕೆ ಥರ್ಮಲ್ ಸ್ಕ್ಯಾನಿಂಗ್ ತಂತ್ರಜ್ಞಾನದ ಡ್ರೋನ್‌ ಬಳಕೆ ಮಾಡಿಕೊಳ್ಳಲಾಗಿದೆ. ಶ್ವಾನದಳದ ನೆರವು ಪಡೆಯಲಾಗಿದೆ, ಕೂಂಬಿಂಗ್ ಕಾರ್ಯ ಮುಂದುವರಿಯಲಿದೆ ಎಂದು ಪುಣಜನೂರು ಎಸಿಎಫ್‌ ಮಂಜುನಾಥ್‌ ಮಾಹಿತಿ ನೀಡಿದರು.