ಚಿಂತಾಮಣಿ: ಭಾರತ್ ಬ್ರಾಂಡ್ ಅಕ್ಕಿಗೆ ಮುಗಿಬಿದ್ದ ಜನ

ಚಿಂತಾಮಣಿ: ಕೇಂದ್ರ ಸರ್ಕಾರ ವಿತರಿಸುವ ಭಾರತ್ ಬ್ರಾಂಡ್ ಅಕ್ಕಿಯನ್ನು ನಗರದಲ್ಲಿ ಭಾನುವಾರ ವಿತರಿಸಲಾಯಿತು. ನಗರದ ಕೋಲಾರ ರಸ್ತೆಯ ಕೆಎಂಡಿ ಕಲ್ಯಾಣ ಮಂಟಪದ ಮುಂದೆ ಭಾರತ್ ಬ್ರಾಂಡ್ ಅಕ್ಕಿಗಾಗಿ ಜನರು ತಾ ಮುಂದು ತಾಮುಂದು ಎಂದು ಮುಗಿಬಿದ್ದರು.

ಒಂದು ಕೆ.ಜಿ ಅಕ್ಕಿಗೆ ₹29ರಂತೆ 10 ಕೆ.ಜಿ ಅಕ್ಕಿಯ ಚೀಲವನ್ನು ₹290ಕ್ಕೆ ಮಾರಾಟ ಮಾಡಲಾಯಿತು. ನಗರದ ಜನರು ಬೈಕ್ ಮತ್ತು ಆಟೊದಲ್ಲಿ ಆಗಮಿಸಿ ಅಕ್ಕಿಯ ಚೀಲಗಳನ್ನು ತೆಗೆದುಕೊಂಡು ಹೋದರು. 10 ಕೆ.ಜಿಯ 3 ಸಾವಿರ ಚೀಲಗಳು ಕೇವಲ 2-3 ಗಂಟೆಯಲ್ಲಿ ಖಾಲಿಯಾಯಿತು. ಹಲವು ಜನರು ಬಂದ ದಾರಿಗೆ ಸುಂಕವಿಲ್ಲ ಎಂಬಂತೆ ಗೊಣಗುತ್ತಾ ಬರಿಗೈಲಿ ವಾಪಸ್ ತೆರಳಿದರು.

ಬಿಜೆಪಿ ಮುಖಂಡ ಮಾಡಿಕೆರೆ ಅರುಣ್ ಮಾತನಾಡಿ, ಸಮಗ್ರ ಭಾರತದಲ್ಲಿ ಒಂದೇ ಬ್ರಾಂಡ್‌ನ ಅಡಿಯಲ್ಲಿ ಯೋಜನೆ ಜಾರಿಗೊಳಿಸಿರುವುದು ಬಡವರಿಗೆ ಅನುಕೂಲವಾಗಿದೆ ಎಂದರು.