ಹೊರನಾಡು: ಸಾಮೂಹಿಕ ವಿವಾಹದಲ್ಲಿ ಹಸೆಮಣೆ ಏರಿದ 12 ಜೋಡಿ

ಕಳಸ: ಹೊರನಾಡಿನ ಅನ್ನಪೂರ್ಣೇಶ್ವರಿ ದೇವಸ್ಥಾನದ ವತಿಯಿಂದ ಭಾನುವಾರ ನಡೆದ ಸಾಮೂಹಿಕ ವಿವಾಹದಲ್ಲಿ 12 ಜೋಡಿಗಳು ದಾಂಪತ್ಯ ಜೀವನಕ್ಕೆ ಕಾಲಿರಿಸಿದರು.

ದೇವಸ್ಥಾನದಿಂದ ವಧುವಿಗೆ ಚಿನ್ನದ ತಾಳಿ, ಸೀರೆ, ವರನಿಗೆ ಪಂಚೆ, ಶಲ್ಯ ನೀಡಲಾಗಿತ್ತು. ಅರ್ಚಕರು ಧ್ವನಿವರ್ಧಕದ ಮೂಲಕ ನೀಡಿದ ಸೂಚನೆಯಂತೆ ವಧೂವರರು ಪರಸ್ಪರ ಕೆನ್ನೆಗೆ ಎಳ್ಳು – ಜೀರಿಗೆ ಸವರಿದರು. ಭೀಮೇಶ್ವರ ಜೋಷಿ ದಂಪತಿ ವರರಿಗೂ ತಾಳಿಯನ್ನು ನೀಡಿದರು. ವೇದ ಮಂತ್ರ ಪಠಣೆ ನಡುವೆ ಮಾಂಗಲ್ಯಧಾರಣೆ ನಡೆಯಿತು. ತಮ್ಮ ಪೋಷಕರ ಸಾಕ್ಷಿಯಾಗಿ ವಧೂ ವರರು ಹಾರ ಬದಲಿಸಿಕೊಂಡು ಸತಿಪತಿಗಳಾದರು.

ವಧುವರರನ್ನು ಉದ್ದೇಶಿಸಿ ಮಾತನಾಡಿದ ಜಿ.ಭೀಮೇಶ್ವರ ಜೋಷಿ, ‘ಹೊರನಾಡಿನಲ್ಲಿ ಸರಳವಾಗಿ ವಿವಾಹವಾಗಿ ಉಳಿಸಿದ ಮೊತ್ತವನ್ನು ಬ್ಯಾಂಕಿನಲ್ಲಿ ಠೇವಣಿ ಇರಿಸಿ ಮುಂದಿನ ಜೀವನಕ್ಕೆ ಬಳಸಿಕೊಳ್ಳಿ’ ಎಂದರು. ಸರಳ, ಸಾಮೂಹಿಕ ವಿವಾಹದಿಂದ ಜನರು ಸಾಲಗಾರರು ಆಗುವ ಸಂದರ್ಭ ತಪ್ಪುತ್ತದೆ’ ಎಂದರು.

ರಾಮನಾರಾಯಣ ಜೋಷಿ, ರಾಜಗೋಪಾಲ ಜೋಷಿ, ರಾಜಲಕ್ಷ್ಮಿ ಜೋಷಿ, ಕೆ.ಕೆ.ಬಾಲಕೃಷ್ಣ ಭಟ್ ಭಾಗವಹಿಸಿದ್ದರು.