ಚಿತ್ರದುರ್ಗ: ಶಾಸಕರ ವಿರುದ್ಧ ‘ಮಗ್ಗಲು ಮುಳ್ಳು’ ಭಿತ್ತಿಪತ್ರ

ಚಿತ್ರದುರ್ಗ: ಶಾಸಕ ಜಿ.ಎಚ್‌.ತಿಪ್ಪಾರೆಡ್ಡಿ ಅವರಿಗೆ ‘ಮಗ್ಗಲು ಮುಳ್ಳು’ ಬಿರುದು ನೀಡಲಾಗಿದೆ ಎಂಬ ಭಿತ್ತಿಪತ್ರ ನಗರದ ಹಲವೆಡೆ ಕಾಣಿಸಿಕೊಂಡಿದೆ. ಅಪರಿಚಿತರು ಅಂಟಿಸಿದ ಈ ಭಿತ್ತಿಪತ್ರದಲ್ಲಿ ಶಾಸಕರ ವಿರುದ್ಧ ಹಲವು ಆರೋಪಗಳನ್ನು ಮಾಡಲಾಗಿದೆ.

ಭಿತ್ತಿಪತ್ರದಲ್ಲಿ ಎಂ.ಕೆ.ಹಟ್ಟಿಯ ನೊಂದ ಗ್ರಾಮಸ್ಥರು, ಅನ್ಯಾಯಕ್ಕೆ ಒಳಗಾದವರು ಎಂಬ ವಿವರವಿದೆ. ಫೇಸ್‌ಬುಕ್‌, ವಾಟ್ಸ್‌ಆ್ಯಪ್‌ ಸೇರಿ ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿದ್ದ ಈ ಭಿತ್ತಿಪತ್ರವನ್ನು ನಗರದ ಹಲವೆಡೆ ಅಂಟಿಸಲಾಗಿದೆ.

‘ಲಾಕ್‌ಡೌನ್‌ ಸಂದರ್ಭದಲ್ಲಿ ಆಹಾರದ ಕಿಟ್‌ ಕೇಳಲು ಮನೆ ಬಳಿಗೆ ಬಂದಿದ್ದ ಗ್ರಾಮದ ಮಹಿಳೆಯರನ್ನು ಗದರಿಸಿ ಅವಮಾನಿಸಿದ ಪರಿಣಾಮವಾಗಿ ಈ ಬಿರುದು ನೀಡುತ್ತಿದ್ದೇವೆ’ ಎಂಬ ಒಕ್ಕಣೆ ಭಿತ್ತಿಪತ್ರದಲ್ಲಿದೆ. ಎಂ.ಕೆ.ಹಟ್ಟಿ ಹೆದ್ದಾರಿ ಕೆಳ ಸೇತುವೆಯಲ್ಲಿನ ನೀರಿನ ಸಮಸ್ಯೆಗೆ ಪರಿಹಾರ ಒದಗಿಸದಿರುವುದು, ಯುವಕರು ಹಾಗೂ ಮಹಿಳೆಯರ ಬಗ್ಗೆ ಆಡಿದ ಮಾತು ಹಾಗೂ ಗ್ರಾಮಕ್ಕೆ ಮೂರು ವರ್ಷಗಳಿಂದ ಅನುದಾನ ನೀಡಿಲ್ಲ ಎಂಬ ಅಂಶಗಳನ್ನು ಉಲ್ಲೇಖಿಸಲಾಗಿದೆ