‘ದೊರೆಯದ ಭೌತಿಕ ಅಂಕಪಟ್ಟಿ: ಸಮಸ್ಯೆ’

ಮಂಗಳೂರು: ಮಂಗಳೂರು ವಿಶ್ವವಿದ್ಯಾಲಯದಲ್ಲಿ ಭೌತಿಕ ಅಂಕಪಟ್ಟಿ ದೊರೆಯದ ಕಾರಣ ವಿದ್ಯಾರ್ಥಿಗಳಿಗೆ ತೀವ್ರ ಸಮಸ್ಯೆಯಾಗುತ್ತಿದೆ ಎಂದು ಎನ್‌ಎಸ್‌ಯುಐ ಮಂಗಳೂರು ವಿಧಾನಸಭಾ ಕ್ಷೇತ್ರ ಘಟಕದ ಪ್ರಮುಖ ಸಲ್ಮಾನ್ ಬಂಟ್ವಾಳ ಆರೋಪಿಸಿದರು.

ಮಂಗಳವಾರ ಇಲ್ಲಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ‘ಡಿಜಿ ಲಾಕರ್‌ ಮೂಲಕ ಅಂಕಪಟ್ಟಿ ಪಡೆಯಬಹುದು ಎಂದು ವಿವಿ ಹೇಳುತ್ತದೆ. ಆದರೆ, ಈ ಅಂಕಪಟ್ಟಿಯಲ್ಲಿ ಕೆಲವರಿಗೆ ಅಂಕವೇ ನಮೂದಾಗಿಲ್ಲ, ಕೆಲವರ ಭಾವಚಿತ್ರ ಇಲ್ಲ, ವಿದ್ಯಾರ್ಥಿಗಳು ಸಲ್ಲಿಸುವ ಪ್ರಾಜೆಕ್ಟ್‌ಗಳ ಮಾಹಿತಿ ಇಲ್ಲ. ಪ್ರತಿ ಸೆಮಿಸ್ಟರ್‌ಗೆ ಅಂಕಪಟ್ಟಿ ಶುಲ್ಕ ₹230 ಪಡೆಯುವ ವಿವಿ ಅಂಕಪಟ್ಟಿ ನೀಡದಿದ್ದರೆ ಹೇಗೆ? ಈ ಬಗ್ಗೆ ಕುಲಪತಿ ಬಳಿ ಐದು ಬಾರಿ ಚರ್ಚಿಸಲಾಗಿದೆ. ಡಿಜಿ ಲಾಕರ್ ಮೂಲಕ ಅಂಕಪಟ್ಟಿ ನೀಡುವಂತೆ ಸರ್ಕಾರ ಆದೇಶ ನೀಡಿದ್ದು, ಸರ್ಕಾರದಿಂದ ಬದಲಾದ ಆದೇಶ ಬಂದಲ್ಲಿ ವಿವಿ ಅದನ್ನು ಪೂರೈಸಲಿದೆ ಎನ್ನುತ್ತಾರೆ’ ಎಂದರು.

ಜಿಲ್ಲೆಯಲ್ಲಿರುವ ಖಾಸಗಿ ವಿವಿಗಳು, ಸ್ವಾಯತ್ತ ಕಾಲೇಜುಗಳು ಭೌತಿಕ ಅಂಕಪಟ್ಟಿ ನೀಡುತ್ತವೆ. ವಿವಿಯಿಂದ ಮಾತ್ರ ದೊರೆಯುತ್ತಿಲ್ಲ. ಇದರಿಂದ ಉದ್ಯೋಗ ಅರಸುತ್ತಿರುವವರಿಗೆ ಸಮಸ್ಯೆಯಾಗಿದೆ. ವಿದ್ಯಾರ್ಥಿಗಳು ಎದುರಿಸುವ ಸಮಸ್ಯೆ ಪರಿಹರಿಸಲು ಮೌಲ್ಯಮಾಪನ ಕುಲಸಚಿವರು ಪ್ರಯತ್ನಿಸಬೇಕು. ಇಲ್ಲವಾದಲ್ಲಿ ವಿಶ್ವವಿದ್ಯಾಲಯ ಚಲೊ ನಡೆಸಲಾಗುವುದು’ ಎಂದರು.

ಸಂಘಟನೆ ಪ್ರಮುಖರಾದ ಸಾಹಿಲ್ ಮಂಚಿಲ, ಝಯಾನ್ ದೇರಳಕಟ್ಟೆ, ಲೀನ ಮಡಿಕೇರಿ, ಮಹೇಂದ್ರ ಕಳಸ, ಸುಹೈಲ್ ಉಪ್ಪಿನಂಗಡಿ ಇದ್ದರು.