ದಾವಣಗೆರೆ | ಡಿಜೆ ವಶ: ನಾಲ್ವರ ವಿರುದ್ಧ ಪ್ರಕರಣ

ದಾವಣಗೆರೆ: ತಾಲ್ಲೂಕಿನ ಬಸವನಾಳು ಗೊಲ್ಲರಹಟ್ಟಿಯ ಗಣೇಶಮೂರ್ತಿ ವಿಸರ್ಜನಾ ಮೆರವಣಿಗೆಯಲ್ಲಿ ಜಿಲ್ಲಾಧಿಕಾರಿ ಆದೇಶ ಉಲ್ಲಂಘಿಸಿ ಹಾಕಿದ್ದ ಡಿಸ್ಕ್‌ ಜಾಕಿಯನ್ನು (ಡಿಜೆ) ಗ್ರಾಮಾಂತರ ಠಾಣೆಯ ಪೊಲೀಸರು ವಶಪಡಿಸಿಕೊಂಡಿದ್ದು, ನಾಲ್ವರ ವಿರುದ್ಧ ಪ್ರಕರಣ ದಾಖಲಿಸಿದ್ದಾರೆ.

ತಾಲ್ಲೂಕಿನ ಬಸವನಾಳು ಗೊಲ್ಲರಹಟ್ಟಿಯ ಸುನೀಲ್‌ ನಾಯ್ಕ, ಸುದೀಪ್‌ ನಾಯ್ಕ, ಗಗನ್‌ ನಾಯ್ಕ ಹಾಗೂ ಡಿಜೆ ವಾಹನ ಚಾಲಕ ಸುರಪುರ ತಾಲ್ಲೂಕಿನ ಶ್ರೀಶೈಲ ವಿರುದ್ಧ ಪ್ರಕರಣ ದಾಖಲಾಗಿದೆ.

ಬಂಜಾರ ಯುವ ಮಂಡಳಿ ಸದಸ್ಯರು ಗ್ರಾಮದಲ್ಲಿ ಪ್ರತಿಷ್ಠಾಪನೆ ಮಾಡಿದ್ದ ಗಣೇಶಮೂರ್ತಿಯ ವಿಸರ್ಜನಾ ಮೆರವಣಿಗೆ ಶನಿವಾರ ರಾತ್ರಿ ನಡೆಯುತ್ತಿತ್ತು. ಈ ಮೆರವಣಿಗೆಯಲ್ಲಿ ಕಿವಿಗಡಚಿಕ್ಕುವ ಶಬ್ದ ಹೊಂದಿರುವ ಡಿಜೆ ಹಾಕಿ ಸಾರ್ವಜನಿಕರಿಗೆ ತೊಂದರೆ ಉಂಟಾಗುತ್ತಿರುವ ಮಾಹಿತಿ ತಿಳಿದು ಪೊಲೀಸರು ಸ್ಥಳಕ್ಕೆ ಧಾವಿಸಿದ್ದರು. ಡಿಜೆ ನಿಷೇಧಿಸಿ ಜಿಲ್ಲಾಧಿಕಾರಿ ಹೊರಡಿಸಿದ್ದ ಆದೇಶವನ್ನು ಉಲ್ಲಂಘಿಸಿದ್ದು ಖಚಿತವಾಗಿದ್ದರಿಂದ ಪ್ರಕರಣ ದಾಖಲಿಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.