ಮಲೇಬೆನ್ನೂರು: ಗ್ರಾಮದೇವತೆ ಉತ್ಸವಕ್ಕೆ ತೆರೆ: ಹುಲುಸು ವಿತರಣೆ

ಮಲೇಬೆನ್ನೂರು: ಗ್ರಾಮದ ದೇವತೆ ಹೊರಗಿನಮ್ಮನ ದೇವಾಲಯದ ಎದುರು ಶುಕ್ರವಾರ ಹುಲುಸು ಒಡೆಯುವ ಮೂಲಕ ಉತ್ಸವಕ್ಕೆ ಶುಕ್ರವಾರ ತೆರೆ ಬಿದ್ದಿತು.

ದೇವಾಲಯದಲ್ಲಿ ಸಾಂಪ್ರದಾಯಿಕ ಪೂಜಾವಿಧಿ ವಿಧಾನ ನೆರವೇರಿಸಿದ ನಂತರ ಮಹಿಳೆಯರು ಏಕನಾಥೇಶ್ವರಿ ಹಾಗೂ ಕೋಡಿ ಮಾರೇಶ್ವರಿಗೆ ಉಡಿ ತುಂಬಿದರು.

ಬಲಿ ನೀಡಿದ್ದ ಹಿಟ್ಟಿನ ಕೋಣದ ತಲೆ ಹಾಗೂ ಹುಲುಸು ರಾಶಿಗೆ ಪೂಜೆ ಸಲ್ಲಿಸಿ ಪರಾಕು ಹೇಳಿ, ಪ್ರಾರ್ಥಿಸಿದರು.

ಗ್ರಾಮದ ಶ್ಯಾನುಭೋಗ, ಗೌಡ, ಬಣಕಾರ, ಪಟೇಲ, ತೋಟಿ ತಳವಾರ ಸಮುದಾಯದ ಮುಖಂಡರಿಗೆ, ಸಾರ್ವಜನಿಕರಿಗೆ ಹುಲುಸು ಹಂಚಲಾಯಿತು.

ಹುಲುಸು ಧಾನ್ಯವನ್ನು ಬಿತ್ತನೆ ವೇಳೆ ಬಳಸಿದರೆ ಉತ್ತಮವಾದ ಬೆಳೆ ಬರುವುದು ಎಂಬುದು ನಂಬಿಕೆ. ಜನರು ಮುಗಿಬಿದ್ದು ಹುಲುಸು ಪಡೆದರು.

ಏಕನಾಥೇಶ್ವರಿ ಹಾಗೂ ಕೋಡಿ ಮಾರೇಶ್ವರಿ ಉತ್ಸವ ಮೂರ್ತಿಗಳನ್ನು ಮಂಗಳವಾದ್ಯ, ಡೊಳ್ಳು, ನಾಸಿಕ್ ಡೋಲಿನ ವಾದನದೊಂದಿಗೆ ದೇವಾಲಯಕ್ಕೆ ಕರೆತರುವ ಮೂಲಕ ಉತ್ಸವಕ್ಕೆ ತೆರೆ ಬಿದ್ದಿತು.