ಅಳ್ನಾವರ: ಮಹಾದ್ವಾರ ನಿರ್ಮಾಣಕ್ಕೆ ಚಾಲನೆ

ಅಳ್ನಾವರ: ತಾಲ್ಲೂಕಿನ ಶ್ರೀ ಕ್ಷೇತ್ರ ಹೊನ್ನಾಪೂರ ಗ್ರಾಮದ ಆರಾಧ್ಯ ದೈವ ಅಲ್ಲಮಪ್ರಭು ದೇವಸ್ಥಾನಕ್ಕೆ ಸ್ವಾಗತ ಕೋರುವ ಮಹಾದ್ವಾರ ನಿರ್ಮಾಣ ಕಾರ್ಯಕ್ಕೆ ಮಾಜಿ ಶಾಸಕ ನಾಗರಾಜ ಛಬ್ಬಿ ಭೂಮಿಪೂಜೆ ನೇರವೇರಿಸಿದರು.

ನಂತರ ಮಾತನಾಡಿ, ಅಲ್ಲಮಪ್ರಭು ದೇವಸ್ಥಾನ ಈ ಭಾಗದ ಜಾಗೃತ ಸ್ಥಳ, ಗ್ರಾಮಸ್ಥರು ನಿತ್ಯ ಪೂಜಿಸುವ ಭಕ್ತಿ ದೇಗುಲಕ್ಕೆ ಭಕ್ತರು ಆಗಮಿಸಲು ಸ್ವಾಗತ ಗೋಪುರ ನಿರ್ಮಾಣ ಕಾರ್ಯ ಕೈಗೊಂಡಿರುವುದು ಉತ್ತಮ ಕಾರ್ಯ. ದೇವಸ್ಥಾನದ ಸಮಗ್ರ ಅಭಿವೃದ್ಧಿಗೆ ಕೈಜೋಡಿಸುವೆ ಎಂದರು.

ಹಿರಿಯರಾದ ಮಹಾವೀರ ಧರೆಣ್ಣವರ ಮಾತನಾಡಿ, ಸುಮಾರು ₹ 25 ಲಕ್ಷ ವೆಚ್ಚದಲ್ಲಿ ಕಮಾನು ಕಟ್ಟಲಾಗುವುದು. ಸುಂದರ ಗೋಪುರದಲ್ಲಿ ಅಲ್ಲಮಪ್ರಭು, ಬಸವಣ್ಣ ಹಾಗೂ ನಂದಿ ಮೂರ್ತಿ ಪ್ರತಿಷ್ಠಾಪಿಸಲಾಗುವದು ಎಂದರು.
ಹಿರಿಯರಾದ ಎಚ್.ಆರ್. ಸನದಿ, ಮರುತಿ ಕಲಾಜ, ರಮೇಶ ಹೂಗಾರ, ಮಲ್ಲಯ್ಯ ಮಠಪತಿ. ಕಿರಣ ಪಾಟೀಲ, ಕುಲಕರ್ಣಿ, ಪರಪ್ಪ ಹುದ್ದಾರ, ಶಂಕರ ಮುಗಳಿ ಇದ್ದರು.