ಕಾರ್ಯಗತವಾಗದ ಡಿಜಿಟಲ್ ಮೀಟರ್ ಅಳವಡಿಕೆ ಯೋಜನೆ: ಆಟೊ ಅಟಾಟೋಪಕ್ಕಿಲ್ಲ ಕಡಿವಾಣ

ಹುಬ್ಬಳ್ಳಿ: ಹುಬ್ಬಳ್ಳಿ–ಧಾರವಾಡ ಮಹಾನಗರ ಪಾಲಿಕೆ ವ್ಯಾಪ್ತಿಯಲ್ಲಿ ನಿತ್ಯ ಹತ್ತಾರು ಸಾವಿರ ಜನರು ಓಡಾಟಕ್ಕೆ ಆಟೊಗಳನ್ನು ಅವಲಂಬಿಸಿದ್ದಾರೆ. ಆದರೆ, ಬಾಡಿಗೆ ದರಕ್ಕಾಗಿ ಚಾಲಕರೊಂದಿಗೆ ಚೌಕಾಸಿ ಮಾಡುವುದು ಅವರಿಗೆ ಕಿರಿಕಿರಿ ಉಂಟುಮಾಡುತ್ತಿದೆ.

ವಾಣಿಜ್ಯ ಕೇಂದ್ರವಾದ ಕಾರಣ ಹುಬ್ಬಳ್ಳಿಗೆ ನಿತ್ಯವೂ ಸಾವಿರಾರು ಜನರು ಹೊರ ಊರು–ಜಿಲ್ಲೆಗಳಿಂದ ಬರುತ್ತಾರೆ. ಅವರು ರೈಲು ನಿಲ್ದಾಣ, ಬಸ್ ನಿಲ್ದಾಣಗಳಲ್ಲಿ ಇಳಿದು ಮತ್ತೊಂದು ಸ್ಥಳಕ್ಕೆ ಹೋಗಲು ಆಟೊಗಳನ್ನು ಆಶ್ರಯಿಸುವುದು ಅನಿವಾರ್ಯ. ಆದರೆ, ಆಟೊಗಳ ಬಾಡಿಗೆ ದರ ಕೇಳಿ, ಇವರ ಸಹವಾಸವೇ ಬೇಡ ಎನ್ನುವಂತಾಗುತ್ತದೆ.

ಹೊರಗಿನಿಂದ ಬಂದವರು ಎಂಬುದು ಗೊತ್ತಾಗುತ್ತಿದ್ದಂತೆ ಆಟೊದವರು ದುಪ್ಪಟ್ಟು ಬಾಡಿಗೆ ಕೇಳುತ್ತಾರೆ. ಪ್ರಯಾಣಿಕರ ತುರ್ತು ಅಗತ್ಯವನ್ನು ಅರಿತು, ಶೋಷಣೆ ಮಾಡುತ್ತಾರೆ. ಕೆಲವೊಮ್ಮೆ ಹೇಳಿದ ಜಾಗಕ್ಕೆ ಬರುವುದೇ ಇಲ್ಲ. ಆ ಸ್ಥಳಕ್ಕೆ ಯಾರೂ ಹೋಗುವುದಿಲ್ಲ, ವಾಪಸ್ ಬರುವಾಗ ಬಾಡಿಗೆ ಸಿಗುವುದಿಲ್ಲ ಎಂಬ ಕಾರಣ ನೀಡಿ ಹೆಚ್ಚಿನ ಹಣ ಕೊಟ್ಟಾದರೂ ಹೋಗುವ ಅನಿವಾರ್ಯವನ್ನು ಸೃಷ್ಟಿಸುತ್ತಾರೆ.

ಆಟೊ ಚಾಲಕರ ಈ ಆಟಾಟೋಪವನ್ನು ಹತೋಟಿಗೆ ತರಲು ಡಿಜಿಟಲ್ ಮೀಟರ್ ಅಳವಡಿಕೆಯೊಂದೇ ದಾರಿ. ಈ ನಿಟ್ಟಿನಲ್ಲಿ ಹತ್ತಾರು ವರ್ಷಗಳಿಂದ ಬೆರಳೆಣಿಕೆಯಷ್ಟು ಪ್ರಯತ್ನಗಳು ನಡೆದಿದ್ದರೂ ಆಟೊ ಚಾಲಕರು ಅದಕ್ಕೆ ವ್ಯವಸ್ಥಿತ ಅಸಹಕಾರ ತೋರಿ ಯಶಸ್ವಿಯಾಗಿದ್ದಾರೆ.

‘ಮೀಟರ್ ಅಳವಡಿಕೆ ಸಾಧ್ಯವಾದರೆ ಮೀಟರ್‌ನಲ್ಲಿ ತೋರಿಸಿದಷ್ಟು ಹಣ ಕೊಟ್ಟು ನಮಗೆ ಬೇಕಾದ ಸ್ಥಳಕ್ಕೆ ಹೋಗಬಹುದು. ಈಗ ಆಟೊ ಚಾಲಕರು ಹೇಳಿದ್ದೇ ದರ. ನಮಗೆ ಅನಿವಾರ್ಯವಾಗಿದೆ. ಅಧಿಕಾರಿಗಳು ಈ ಕುರಿತು ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳಬೇಕು’ ಎಂದು ವೆಂಕಟೇಶ ಉಪಾಧ್ಯ ಆಗ್ರಹಿಸಿದರು.

ಅರ್ಧದಷ್ಟು ಅಕ್ರಮ?: ಅವಳಿ ನಗರ ವ್ಯಾಪ್ತಿಯಲ್ಲಿ 25 ಸಾವಿರಕ್ಕೂ ಅಧಿಕ ಆಟೊಗಳು ಕಾರ್ಯನಿರ್ವಹಿಸುತ್ತಿವೆ ಎಂಬುದು ಆಟೊ ಚಾಲಕ, ಮಾಲೀಕರ ಸಂಘದ ಅಂದಾಜು. ಆದರೆ ಪ್ರಾದೇಶಿಕ ಸಾರಿಗೆ ಅಧಿಕಾರಿಗಳ ಮಾಹಿತಿ ಪ್ರಕಾರ ಈ ಸಂಖ್ಯೆ 13 ಸಾವಿರ. ಅಂದರೆ 12 ಸಾವಿರದಷ್ಟು ಆಟೊಗಳು ನೋಂದಣಿ, ಸಮರ್ಪಕ ದಾಖಲೆ ಇಲ್ಲದೇ ಕಾರ್ಯನಿರ್ವಹಿಸುತ್ತಿವೆ ಅಥವಾ ಬೇರೆ ತಾಲ್ಲೂಕುಗಳಲ್ಲಿ ನೋಂದಣಿ ಆಗಿ, ಪಾಲಿಕೆ ವ್ಯಾಪ್ತಿಯಲ್ಲಿ ಕಾರ್ಯಾಚರಿಸುತ್ತಿವೆ. ಸಾರಿಗೆ ಇಲಾಖೆ ನಿಯಮದ ಪ್ರಕಾರ ಇವೆಲ್ಲ ಅಕ್ರಮ.

‘ಆಟೊ ಮಾಲೀಕರ ಸಂಘದ ಮನವಿಯಂತೆ ಕೆಲವು ವರ್ಷಗಳಿಂದ ಹೊಸ ಆಟೊಗಳ ನೋಂದಣಿಗೆ ಅವಕಾಶ ನೀಡುತ್ತಿಲ್ಲ. ಆದರೆ ಕೆಲವರು ನಿಯಮ ಮೀರಿ ಕಾರ್ಯಾಚರಣೆ ನಡೆಸುತ್ತಿದ್ದಾರೆ. ಈವರೆಗೆ ನೂರಕ್ಕೂ ಹೆಚ್ಚು ಆಟೊಗಳನ್ನು ವಶಪಡಿಸಿಕೊಂಡು ಗುಜರಿಗೆ ಹಾಕಲಾಗಿದೆ. ಕೆಲವೊಮ್ಮೆ ಪ್ರಕರಣ ದಾಖಲಿಸಿದರೂ ಆಟೊಗಳನ್ನು ಅಲ್ಲೇ ಬಿಟ್ಟು ಹೋಗಿಬಿಡುತ್ತಾರೆ. ಅವುಗಳನ್ನು ಬಿಡಿಸಿಕೊಳ್ಳಲೂ ಬರುವುದಿಲ್ಲ. ಅಂಥವನ್ನು ವಿಲೇವಾರಿ ಮಾಡುವುದೇ ತಲೆನೋವಾಗುತ್ತದೆ’ ಎಂದು ಧಾರವಾಡ ಪೂರ್ವ ಪ್ರಾದೇಶಿಕ ಸಾರಿಗೆ ಅಧಿಕಾರಿ ಶ್ರೀಕಾಂತ ಬಡಿಗೇರ ತಿಳಿಸಿದರು.

ಮೀಟರ್ ಅಳವಡಿಕೆ ಕಡ್ಡಾಯ ಎಂಬ ನಿಯಮವಿದ್ದರೂ ‘ಅವೈಜ್ಞಾನಿಕ ಬೆಲೆ ನಿಗದಿ’, ‘ಮೀಟರ್ ದುರಸ್ತಿಗೆ ಹೆಚ್ಚಿನ ದರ ಕೇಳುವುದು’ ಹೀಗೆ ವಿವಿಧ ಆರೋಪಗಳು ಮುನ್ನೆಲೆಗೆ ಬಂದು, ಮೀಟರ್ ಅಳವಡಿಕೆ ವಿಚಾರ ಹಿನ್ನೆಲೆಗೆ ಸರಿದಿದೆ.