World Environment Day | ಅರಣ್ಯೀಕರಣ: 34 ಸಾವಿರ ಸಸಿ ನೆಡಲು ಸಿದ್ಧತೆ

ನವಲಗುಂದ: ತಾಲ್ಲೂಕಿನಲ್ಲಿ ಹಸಿರೀಕರಣ ಹೆಚ್ಚಿಸಲು ಇಲ್ಲಿನ ನವಲಗುಂದ ಗುಡ್ಡದ ನರ್ಸರಿಯಲ್ಲಿ 34 ಸಾವಿರ ಸಸಿಗಳನ್ನು ಬೆಳೆಸಲಾಗಿದ್ದು, ರೈತರಿಗೆ ಹಂಚಲು ಅರಣ್ಯ ಇಲಾಖೆ ಸಿದ್ಧತೆ ಮಾಡಿಕೊಂಡಿದೆ.

ಮುಂಗಾರು ಆರಂಭವಾಗಿದ್ದು, ತಾಲ್ಲೂಕಿನ ವಿವಿಧೆಡೆ ವರುಣ ಕೃಪೆ ತೋರಿದ್ದಾನೆ. ಭೂಮಿ ಹದವಾಗಿದ್ದು, ಸಸಿ ನೆಡಲು ವಾತಾವರಣ ಪ್ರಶಸ್ತವಾಗಿದೆ. ತಾಲ್ಲೂಕನ್ನು ಮತ್ತಷ್ಟು ಹಸಿರಾಗಿ ಕಂಗೊಳಿಸಬೇಕು ಎನ್ನುವ ಉದ್ದೇಶದಿಂದ ಈ ವರ್ಷ ನವಲಗುಂದ ನರ್ಸರಿಯಲ್ಲಿ ವಿವಿಧ ಬಗೆಯ ಸಸಿಗಳನ್ನು ಮುತುವರ್ಜಿ ವಹಿಸಿ ಬೆಳೆಸಲಾಗಿದೆ.

ಸಸಿಗಳನ್ನು ಬೆಳೆಸುವ ಬಗ್ಗೆ ರೈತರು ಹಾಗೂ ಸಾರ್ವಜನಿಕರಲ್ಲಿ ಜಾಗೃತಿ ಮೂಡಿಸಲಾಗಿದೆ. ಆಸಕ್ತ ಹೊಂದಿದ ಹಲವು  ರೈತರಿಗೆ ಸಸಿಗಳನ್ನು ವಿತರಿಸುವ ಉದ್ದೇಶವನ್ನು ಇಲಾಖೆ ಹೊಂದಿದೆ. ಈಗಾಗಲೇ ಶಲವಡಿ, ಪಡೆಸೂರ, ಇಬ್ರಾಹಿಂಪುರ ಹಾಗೂ ಜಾವೂರ ರಸ್ತೆ ಬದಿಯಲ್ಲಿ ಸಾವಿರ ಸಸಿಗಳನ್ನು ನೆಡುವ ಕಾರ್ಯವನ್ನು ಅರಣ್ಯ ಇಲಾಖೆ ಆರಂಭಿಸಿದೆ ಎಂದು ವಲಯ ಅರಣ್ಯ ಅಧಿಕಾರಿ ಕಿರಣಕುಮಾರ ಕರತಂಗಿ ಹೇಳಿದರು. 

ಸಾರ್ವಜನಿಕವಾಗಿ ಅರಳಿ, ಬಸರಿ ಆಲ, ಅತ್ತಿ, ನೇರಲೆ, ಹೊಂಗೆ, ನಲ್ಲಿ, ಭದ್ರಾಕ್ಷ, ಹೊಳೆಮತ್ತಿ, ಶಿವನಿ, ಸಿಹಿಹುಣಸೆ ಮುಂತಾದ ನಮೂನೆಯ ಸಸಿಗಳನ್ನು ಬೆಳಸಲಾಗಿದ್ದು, ಅನೇಕ ಹೂವಿನ ಸಸಿಗಳನ್ನು ಸಹ ಬೆಳೆಸಲಾಗಿದೆ ಎಂದರು. 

ರೈತರ ಸಸಿಗಳು: ಆರ್.ಕೆ.ವಿ.ವೈ. ಮತ್ತು ಆರ್.ಎಸ್.ಪಿ.ಡಿ ಯೋಜನೆ ಅಡಿ ರೈತರಿಗೆ ವಿತರಿಸಲು 12,500 ಸಸಿಗಳು ಸಿದ್ಧವಾಗಿವೆ. ಮುಖ್ಯವಾಗಿ ಮಹಾಗನಿ, ಕರಬೇವು, ನುಗ್ಗೆ, ಬಿದಿರು, ನೇರಳೆ, ನೆಲ್ಲಿ, ಬೇವು, ಹುಣಸೆ ಮುಂತಾದ ಸಸಿಗಳು ಸಿದ್ದವಾಗಿವೆ. ರೈತರಿಗೆ ಕಡಿಮೆ ದರದಲ್ಲಿ ಈ ಸಸಿಗಳನ್ನು ಮಾರಾಟ ಮಾಡಲಾಗುತ್ತದೆ. ಇದರಲ್ಲಿ 6×9 ಸೈಜಿನ ಸಸಿಗೆ ₹3  ಮತ್ತು 8×12 ಸೈಜಿನ ಒಂದು ಸಸಿಗೆ ₹6 ದರ ನಿಗದಿಪಡಿಸಲಾಗಿದೆ. ರೈತರು ಅಥವಾ ಆಸಕ್ತ ಸಾರ್ವಜನಿಕರು ಈಗ ಈ  ಸಸಿಗಳನ್ನು  ಇಲಾಖೆಯಿಂದ ಪಡೆದುಕೊಳ್ಳಬಹುದಾಗಿದೆ.

ಸಸಿಗಳಿಗಾಗಿ ಭರಮಪ್ಪ ಸರವಾರಿ ( 8105182705) ಸಂಪರ್ಕಿಸಬಹುದು ಎಂದು ತಿಳಿಸಿದರು.