ಶಿರಹಟ್ಟಿ | ವಿಷ ಮಿಶ್ರಣದ ಶಂಕೆ: 5 ಸಾವಿರ ಮೀನು ಮರಿ ಸಾವು

ಶಿರಹಟ್ಟಿ: ತಾಲ್ಲೂಕಿನ ಸುಗನಹಳ್ಳಿ ಗ್ರಾಮದ ತೋಟವೊಂದರ ಮೀನು ಸಾಕಾಣಿಕೆ ತೊಟ್ಟಿಗೆ ವಿಷ ಮಿಶ್ರಣದ ಶಂಕೆ ಇದ್ದು,ಕಾಟ್ಲಾ ಸೇರಿದಂತೆ ವಿವಿಧ ತಳಿಯ 5 ಸಾವಿರಕ್ಕೂ ಹೆಚ್ಚು ಮೀನುಗಳು ಸತ್ತಿವೆ.

ಗ್ರಾಮದ ರೈತ ಪ್ರಸಾದ ಆಡಿನ ಅವರಿಗೆ ಸೇರಿದ ಮೀನು ಸಾಕಾಣಿಕೆ ಕೇಂದ್ರ ಇದಾಗಿದ್ದು, ಸಮಗ್ರ ಕೃಷಿಯೊಂದಿಗೆ ಮೀನು ಸಾಕಾಣಿಕೆ ಮಾಡುತ್ತಿದ್ದರು. ತೋಟದಲ್ಲಿ 2 ದೊಡ್ಡ ತೊಟ್ಟಿ ನಿರ್ಮಿಸಿ ಅದರಲ್ಲಿ 5 ಸಾವಿರ ಮೀನು ಮರಿಗಳನ್ನು ಬಿಡಲಾಗಿತ್ತು. ಸದ್ಯ ಮೀನು ಮರಿಗಳ ನಿಗೂಢ ಸಾವಿನಿಂದ ಆತಂಕಗೊಂಡಿದ್ದಾರೆ.

ಹೊಸಪೇಟೆಯಲ್ಲಿ ಒಂದು ಮೀನು ಮರಿಗೆ ₹2 ಕೊಟ್ಟು ಖರೀದಿಸಿ ಸುಮಾರು 4 ತಿಂಗಳಿನಿಂದ ಅದಕ್ಕೆ ನಿತ್ಯ ಆಹಾರ ಹಾಕಿ  ಸಾಕಾಣಿಕೆ ಮಾಡುತ್ತಿದ್ದರು. ಮೀನು ಕೃಷಿಯಿಂದ ಉತ್ತಮ ಆದಾಯ ಗಳಿಕೆಯ ನಿರೀಕ್ಷೆಯಲ್ಲಿದ್ದ ರೈತ ಪ್ರಸಾದ ಆಡಿನ ಈಗ ಸಂಕಷ್ಟದಲ್ಲಿದ್ದಾರೆ.

‘ನಮ್ಮ ಏಳಿಗೆ ಸಹಿಸದ ಕೆಲ ಕಿಡಿಗೇಡಿಗಳು ಈ ಕೆಲಸ ಮಾಡಿದ್ದು, ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಿಸುತ್ತೇನೆ. ಮೀನು ಇಲಾಖೆ ಅಧಿಕಾರಿಗಳಿಗೆ ಮಾಹಿತಿ ನೀಡಿದ್ದು, ನಷ್ಟ ಪರಿಹಾರಕ್ಕೆ ಮನವಿ ಮಾಡುತ್ತೇನೆ’ ಎಂದು ರೈತ ಪ್ರಸಾದ ತಿಳಿಸಿದರು.