ತುಂತುರ ಮಳೆ: ರೈತರಲ್ಲಿ ಆತಂಕ

ಮುಳಗುಂದ: ಪಟ್ಟಣ ವ್ಯಾಪ್ತಿಯಲ್ಲಿ ಬುಧವಾರ ಬೆಳಿಗ್ಗೆಯಿಂದ ಮೋಡಕವಿದ ವಾತಾವರಣವಿತ್ತು. ಮಧ್ಯಾಹ್ನದ ಹೊತ್ತಿಗೆ ತುಂತುರು ಮಳೆ ಸುರಿಯಿತು. ಇದರಿಂದ ಹಿಂಗಾರು ಬೆಳೆಗೆ ಹಾನಿ ಆಗುವ ಆತಂಕ ರೈತರನ್ನು ಕಾಡುತ್ತಿದೆ.

ಸದ್ಯ ಕಡಲೆ, ಜೋಳ, ಕುಸಬಿ, ಗೋದಿ ಬೆಳೆ ಒಕ್ಕುವ ಹಂತದಲ್ಲಿದ್ದು, ಕೆಲ ರೈತರು ಫಸಲನ್ನು ಕಿತ್ತು ಒಕ್ಕಲಿಗೆ ಅಣಿಗೊಳಿಸುತ್ತಿದ್ದಾರೆ. ಈ ಹಂತದಲ್ಲಿ ಮಳೆಯಾದರೆ ಫಸಲು ಹಾನಿಯಾಗುತ್ತದೆ ಎಂಬ ಆತಂಕ ರೈತರನ್ನು ಕಾಡುತ್ತಿದೆ.

ನರೇಗಲ್‌ದಲ್ಲೂ ಮಳೆ: ಪಟ್ಟಣದಲ್ಲಿ ಬುಧವಾರ ಬೆಳಿಗ್ಗೆ 6 ಗಂಟೆಯಿಂದ ಮೋಡಕವಿದ ವಾತವರಣ ಇದ್ದು ಮಧ್ಯಾಹ್ನ 3 ಗಂಟೆಗೆ ಹಾಗೂ ಸಂಜೆ 6 ಗಂಟೆಗೆ ನರೇಗಲ್ ಸುತ್ತಮುತ್ತ ತುಂತುರು ಮಳೆ ಆಗಿದೆ. ಈ ಮಳೆಯಿಂದ ಕಟಾವಿಗೆ ಬಂದಿರುವ ಹಿಂಗಾರು ಬೆಳೆಗಳಾದ ಕಡಲೆ, ಜೋಳ, ಗೋಧಿ, ಕುಸುಬೆ ಕಪ್ಪಾಗುವ ಸಾಧ್ಯತೆ ಇದೆ. ಇದರಿಂದ ಮಾರುಕಟ್ಟೆಯಲ್ಲಿ ಯೋಗ್ಯ ಬೆಲೆ ಸಿಗುವುದಿಲ್ಲ ಎಂದು ರೈತರು ಬೇಸರ ವ್ಯಕ್ತಪಡಿಸಿದರು.