ಗದಗ: ಸರ್ಕಾರಿ ಶಾಲೆಗಳಿಗೆ ಬೇಕಿದೆ ಸ್ವಚ್ಛ ಶೌಚಾಲಯ

ಗದಗ: ಜಿಲ್ಲೆಯಲ್ಲಿರುವ ಬಹುತೇಕ ಸರ್ಕಾರಿ ಶಾಲೆಗಳಲ್ಲಿ ಶೌಚಾಲಯಗಳು ಹೆಸರಿಗಷ್ಟೇ ಎಂಬಂತೆ ಇದ್ದು, ವಿದ್ಯಾರ್ಥಿಗಳು ಶೌಚ ಹಾಗೂ ಮೂತ್ರ ವಿಸರ್ಜನೆಗೆ ಬಯಲನ್ನೇ ಆಶ್ರಯಿಸುವ ಪರಿಸ್ಥಿತಿ ಇದೆ. ಮಕ್ಕಳ ಆರೋಗ್ಯದ ದೃಷ್ಟಿಯಿಂದ ಶೌಚಾಲಯಗಳು ಸ್ವಚ್ಛವಾಗಿರುವುದು ಮುಖ್ಯ. ಹಾಗಾಗಿ, ಶಾಲೆಗಳಲ್ಲಿನ ಶೌಚಾಲಯಗಳನ್ನು ದುರಸ್ತಿ ಮಾಡುವುದರ ಜತೆಗೆ ಅವು ವಿದ್ಯಾರ್ಥಿಸ್ನೇಹಿ, ಬಳಕೆಸ್ನೇಹಿ ಆಗುವಂತೆ ಮಾಡುವಲ್ಲಿ ಶಿಕ್ಷಣ ಇಲಾಖೆ ಕ್ರಮವಹಿಸಬೇಕು ಎಂದು ಪೋಷಕರು ಆಗ್ರಹಿಸಿದ್ದಾರೆ.

ಈ ನಿಟ್ಟಿನಲ್ಲಿ ಗದಗ ಜಿಲ್ಲಾಡಳಿತ, ಜಿಲ್ಲಾ ಪಂಚಾಯಿತಿ ಮತ್ತು ಶಿಕ್ಷಣ ಇಲಾಖೆ ಉತ್ತಮ ಹೆಜ್ಜೆ ಇರಿಸಿರುವುದು ವಿದ್ಯಾರ್ಥಿ ಸಮುದಾಯದಲ್ಲಿ ಆಶಾಭಾವ ಮೂಡಿಸಿದೆ.

ಜಿಲ್ಲಾ ಉಸ್ತುವಾರಿ ಸಚಿವ ಎಚ್‌.ಕೆ.ಪಾಟೀಲ ಅವರು ಜಿಲ್ಲೆಯಲ್ಲಿನ ಪ್ರಾಥಮಿಕ ಹಾಗೂ ಪ್ರೌಢಶಾಲೆಗಳ ಶೌಚಾಲಯಗಳು ವ್ಯವಸ್ಥಿತವಾಗಿ ಇರಲು ಕ್ರಮ ವಹಿಸುವಂತೆ ಕಳೆದ ತಿಂಗಳು ಅಧಿಕಾರಿಗಳಿಗೆ ಕಟ್ಟುನಿಟ್ಟಿನ ಸೂಚನೆ ನೀಡಿದ್ದರು. ಅದರಂತೆ, ಶಿಕ್ಷಣ ಇಲಾಖೆಯು ಜಿಲ್ಲೆಯಲ್ಲಿರುವ ಸರ್ಕಾರಿ ಶಾಲೆಗಳ ಶೌಚಾಲಯಗಳ ಸದ್ಯದ ಸ್ಥಿತಿಗತಿ ಕುರಿತಂತೆ ಸಮಗ್ರ ಮಾಹಿತಿ ಸಂಗ್ರಹಿಸಿದೆ. ಅವುಗಳ ದುರಸ್ತಿಗೆ ವೆಚ್ಚವಾಗುವ ಹಣಕ್ಕೆ ಅನುಗುಣವಾಗಿ ಎ, ಬಿ, ಸಿ ಮತ್ತು ಡಿ ಕೆಟಗರಿ ಮಾಡಿ, ದುರಸ್ತಿಗೆ ಯೋಜನೆ ಸಿದ್ಧಪಡಿಸಿದೆ.

ಗದಗ ಜಿಲ್ಲೆಯಲ್ಲಿ ₹10 ಸಾವಿರದ ಒಳಗೆ ದುರಸ್ತಿ ಮಾಡಬಹುದಾದ 64 ಶೌಚಾಲಯಗಳನ್ನು ಶಿಕ್ಷಣ ಇಲಾಖೆ ಗುರುತಿಸಿದೆ. ಈ ಪೈಕಿ 27 ಶೌಚಾಲಯಗಳ ದುರಸ್ತಿ ಮಾಡಿಸಿದೆ. 27 ಶೌಚಾಲಯಗಳ ದುರಸ್ತಿ ಕಾಮಗಾರಿ ಪ್ರಗತಿಯಲ್ಲಿದೆ. ಗದಗ ನಗರ 7, ಗ್ರಾಮೀಣ 3 ಹಾಗೂ ರೋಣ ತಾಲ್ಲೂಕಿನಲ್ಲಿ 3 ಶೌಚಾಲಯಗಳು ಸೇರಿದಂತೆ ಒಟ್ಟು 10 ಶೌಚಾಲಯಗಳ ಕಾಮಗಾರಿ ಇನ್ನಷ್ಟೇ ಆರಂಭವಾಗಬೇಕಿದೆ.

ಅದೇರೀತಿ, ಬಿ ಕೆಟಗರಿಯಲ್ಲಿ ₹10 ಸಾವಿರದಿಂದ ₹50 ಸಾವಿರದ ಒಳಗಡೆ ದುರಸ್ತಿಗೊಳ್ಳಬಹುದಾದ 225 ಶೌಚಾಲಯಗಳನ್ನು ಗುರುತಿಸಿದೆ. ಈ ಪೈಕಿ ವಿವಿಧ ಅನುದಾನ ಬಳಸಿ 43 ಶೌಚಾಲಯಗಳ ದುರಸ್ತಿ ಪೂರ್ಣಗೊಳಿಸಿದೆ. 54 ಶೌಚಾಲಯಗಳ ದುರಸ್ತಿ ಪ್ರಗತಿಯಲ್ಲಿದೆ. ಸಿ ಕೆಟಗರಿಯಲ್ಲಿ ₹50 ಸಾವಿರದಿಂದ ₹70 ಸಾವಿರ ವೆಚ್ಚ ತಗಲುವ ಒಟ್ಟು 15 ಶೌಚಾಲಯಗಳನ್ನು ದುರಸ್ತಿಗೆ ಗುರುತಿಸಿದೆ. ಈ ಪೈಕಿ ಒಂದು ಶೌಚಾಲಯದ ದುರಸ್ತಿ ಮುಗಿದಿದ್ದು, ಉಳಿದವು ಆರಂಭವಾಗಬೇಕಿದೆ.

₹70 ಸಾವಿರದಿಂದ ₹1 ಲಕ್ಷಕ್ಕೂ ಅಧಿಕ ದುರಸ್ತಿ ವೆಚ್ಚ ಇರುವ 34 ಶಾಲಾ ಶೌಚಾಲಯಗಳು ಜಿಲ್ಲೆಯಲ್ಲಿವೆ. ಇದರಲ್ಲಿ ಏಳು ಶೌಚಾಲಯಗಳ ದುರಸ್ತಿ ಕಾರ್ಯ ಮುಗಿದಿದೆ. ಐದು ಶೌಚಾಲಯಗಳ ಕೆಲಸ ಪ್ರಗತಿಯಲ್ಲಿದೆ. 22 ಶೌಚಾಲಯಗಳ ದುರಸ್ತಿ ಇನ್ನಷ್ಟೇ ಪ್ರಾರಂಭಗೊಳ್ಳಬೇಕಿದೆ ಎಂದು ಶಿಕ್ಷಣ ಇಲಾಖೆ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.