ನರಗುಂದ: ಇದ್ದು ಇಲ್ಲದಂತಾದ ನರಗುಂದ ಗ್ರಾಮೀಣ ಬಸ್ ನಿಲ್ದಾಣ

ನರಗುಂದ: ಪಟ್ಟಣ ದಿನೇ ದಿನೇ ಬೆಳೆಯುತ್ತಿದೆ. ಜನಸಂಖ್ಯೆಯೂ ಏರುತ್ತಿದೆ. ಆದರೆ, ಅದಕ್ಕೆ ತಕ್ಕಂತೆ ಇಲ್ಲಿನ ಸಂಚಾರ ವ್ಯವಸ್ಥೆ ಸುಧಾರಿಸಿಲ್ಲ. ಇರುವ ಬಸ್ ನಿಲ್ದಾಣ ಹಲವಾರು ಸಮಸ್ಯೆಗಳಿಂದ ಬಳಲುತ್ತಿದೆ ಎಂದು ಸ್ಥಳೀಯರು ಬೇಸರ ವ್ಯಕ್ತಪಡಿಸಿದ್ದಾರೆ. 

ಪಟ್ಟಣವು ಹುಬ್ಬಳ್ಳಿ ವಿಜಯಪುರ ರಾಷ್ಟ್ರೀಯ ಹೆದ್ದಾರಿ ಮೇಲಿದೆ. ಇದಕ್ಕೆ ಹೊಂದಿಕೊಂಡೇ ಕೆಎಸ್ಆರ್‌ಟಿಸಿ ಬಸ್ ನಿಲ್ದಾಣವಿದೆ. ಬೇರೆ ತಾಲ್ಲೂಕು ಕೇಂದ್ರ ಹಾಗೂ ಪಟ್ಟಣಗಳಿಗೆ ಹೋಲಿಸಿದಾಗ ಇಲ್ಲಿ ಬಸ್‌ಗಳ ಸಂಚಾರ ಹೆಚ್ಚಿದೆ. ಹಾಗಾಗಿ, ಈ ಬಸ್ ನಿಲ್ದಾಣವನ್ನು ಮೇಲ್ದರ್ಜೆಗೆ ಏರಿಸಬೇಕು ಎಂಬ ಸಾರ್ವಜನಿಕರ ಒತ್ತಾಯಕ್ಕೆ ಈವರೆಗೆ ಸರ್ಕಾರ ಸ್ಪಂದಿಸಿಲ್ಲ.

ಬಹಿರ್ದೆಸೆಯ ತಾಣ: ಬಸ್ ನಿಲ್ದಾಣವು ಸುಮಾರು ಒಂದು ಎಕರೆಗಿಂತಲೂ ಹೆಚ್ಚು ವಿಸ್ತಾರ ಹೊಂದಿದೆ. ಇದರಲ್ಲಿ ಶೇ 50ರಷ್ಟು ಪ್ರದೇಶ ಬಳಕೆಯಾಗಿದ್ದು, ಅಲ್ಲಿ ಬಸ್ ನಿಲ್ದಾಣ ನಿರ್ಮಾಣವಾಗಿದೆ. ಉಳಿದ ಜಾಗದಲ್ಲಿ ಗಡಿಗಂಟಿಗಳು ಬೆಳೆದಿವೆ. ತ್ಯಾಜ್ಯ ವಸ್ತುಗಳನ್ನು ಸುರಿಯುವ ಜಾಗವಾಗಿಯೂ ಬಳಕೆ ಆಗುತ್ತಿದೆ. ಉಳಿದ ಅಲ್ಪ ಜಾಗದಲ್ಲಿ ಗ್ರಾಮೀಣ ಬಸ್‌ಗಳ ನಿಲುಗಡೆಗೆ ತಗಡಿನ ಶೆಲ್ಟರ್ ಮಾಡಲಾಗಿದೆ.

‘ಗ್ರಾಮೀಣ ಬಸ್ ನಿಲ್ದಾಣದ ಆವರಣ ಬಹಿರ್ದೆಸೆಯ ತಾಣವಾಗಿದೆ. ಮಳೆ ಬಂದರಂತೂ ಕೆಸರಿನ ಹೊಂಡ ನಿರ್ಮಾಣವಾಗಿ ಸೊಳ್ಳೆಗಳ ಉತ್ಪತ್ತಿ ತಾಣವಾಗಿ, ಇಡೀ ಬಸ್ ನಿಲ್ದಾಣ ದುರ್ವಾಸನೆಗೆ ಬೀರುತ್ತದೆ. ಅದರ ಅನತಿ ದೂರದಲ್ಲಿ ಗ್ರಾಮೀಣ ಬಸ್‌ಗಳು ನಿಲುಗಡೆಯಾಗುತ್ತವೆ. ಬಸ್ ಹೊರಡುವವರೆಗೂ ಅಲ್ಲಿ ನಿಲ್ಲುವುದು, ಬಸ್ ಹತ್ತುವುದು ನರಕಯಾತನೆ ಉಂಟು ಮಾಡುತ್ತದೆ. ಆದ್ದರಿಂದ ಗ್ರಾಮೀಣ ಬಸ್ ನಿಲ್ದಾಣವನ್ನು ಸುಸಜ್ಜಿತಗೊಳಿಸಬೇಕು. ಬಹಿರ್ದೆಸೆಗೆ ಕಡಿವಾಣ ಹಾಕಬೇಕು’ ಎಂದು ಪ್ರಯಾಣಿಕರು ಆಗ್ರಹಿಸಿದ್ದಾರೆ.

ಹೆಚ್ಚಿದ ಕಳ್ಳರ ಭಯ: ಶಕ್ತಿ ಯೋಜನೆ ಜಾರಿಯಾದಾಗಿನಿಂದ ಮಹಿಳಾ ಪ್ರಯಾಣಿಕರ ಸಂಖ್ಯೆ ಹೆಚ್ಚುತ್ತಿದೆ. ರಾಷ್ಟ್ರೀಯ ಹೆದ್ದಾರಿ ಮೇಲೆ ಇರುವುದರಿಂದ ಪಟ್ಟಣದ ಮೂಲಕ ಹಾಯ್ದು ಹೋಗುವ ಪ್ರಯಾಣಿಕರ ಸಂಖ್ಯೆ ಕೂಡ ಹೆಚ್ಚಿದೆ.

ಇದರಿಂದಾಗಿ ಕಿಡಿಗೇಡಿಗಳಿಗೆ, ಕಳ್ಳರಿಗೆ ಹೇಳಿ ಈ ಬಸ್‌ ನಿಲ್ದಾಣ ಪ್ರಿಯವಾಗಿದ್ದು ಪ್ರಯಾಣಿಕರು ಕಳ್ಳರ ಭಯದಿಂದ ನಲುಗುವಂತಾಗಿದೆ. ಈ ಬಸ್‌ ನಿಲ್ದಾಣದಲ್ಲಿ ಮೊಬೈಲ್‌ಗಳು, ಪರ್ಸ್‌ಗಳು, ಬ್ಯಾಗ್‌ಗಳು, ಬೈಕ್‌ಗಳು ಕಳುವಾದ ಸಾಕಷ್ಟು ಘಟನೆಗಳು ನಡೆದಿವೆ. ಸಿಸಿಟಿವಿ ಕಣ್ಗಾವಲಿನ ನಡುವೆಯೂ ಈ ರೀತಿ ಪ್ರಕರಣಗಳು ಆಗುತ್ತಿರುವ ಕಾರಣ ಬಸ್‌ ನಿಲ್ದಾಣದಲ್ಲಿ ಭದ್ರತೆ ಇಲ್ಲದಂತಾಗಿದೆ. ಇದರಿಂದಾಗಿ ಇಲ್ಲಿಗೆ ಪೊಲೀಸ್‌ ಸಿಬ್ಬಂದಿ  ಕಣ್ಗಾವಲು ಇಡುವಂತಾಗಬೇಕು ಎಂದು ಸ್ಥಳೀಯರು ಆಗ್ರಹಿಸಿದ್ದಾರೆ. 

ಪಾರ್ಕಿಂಗ್ ಅವ್ಯವಸ್ಥೆ: ಬಸ್ ನಿಲ್ದಾಣದ ಆವರಣದಲ್ಲಿ ಇತರೆ ವಾಹನಗಳ ಪಾರ್ಕಿಂಗ್‌ಗೆ ಸರಿಯಾದ ವ್ಯವಸ್ಥೆ ಇಲ್ಲ. ಆರು ತಿಂಗಳಿಂದ ಬೈಕ್‌ಗಳ ಪಾರ್ಕಿಂಗ್ ಅವ್ಯವಸ್ಥೆ ಹೇಳತೀರದಾಗಿದೆ. ಬಸ್ ನಿಲ್ದಾಣದ ಆವರಣದಲ್ಲಿ ಎಲ್ಲೆಂದರಲ್ಲಿ ಪ್ರಯಾಣಿಕರು, ಹೊರಗಿನವರು ಬೈಕ್ ನಿಲ್ಲಿಸುತ್ತಾರೆ. ಇದರಿಂದ ಬಸ್ ಸಂಚಾರಕ್ಕೆ ತೊಂದರೆ ಆಗುವುದರ ಮೂಲಕ ಪಾದಚಾರಿಗಳಿಗೂ ತೊಂದರೆ ಆಗುತ್ತಿದೆ.

ಆಗದ ಟೆಂಡರ್: ಬೈಕ್ ಪಾರ್ಕಿಂಗ್ ಮಾಡಿಸಿಕೊಂಡು ಅವುಗಳನ್ನು ವ್ಯವಸ್ಥಿತವಾಗಿ ನಿಲ್ಲಿಸಿ ರಕ್ಷಣೆ ಮಾಡುವ ಸಲುವಾಗಿ ಟೆಂಡರ್ ಕರೆಯಲಾಗುತ್ತಿತ್ತು. ಟೆಂಡರ್‌ದಾರರು ಹಣ ಪಡೆದು ಬೈಕ್ ರಕ್ಷಣೆ ಮಾಡುತ್ತಿದ್ದರು. ಇದರಿಂದ ಪ್ರಯಾಣಿಕರು ನಿರ್ಭಯವಾಗಿ ಬೈಕ್ ಬಿಟ್ಟು ಹೋಗುತ್ತಿದ್ದರು. ಟೆಂಡ್‌ ಆಗದ ಕಾರಣ ಹಲವಾರು ಬೈಕ್‌ಗಳು ಕಳುವಾಗಿವೆ ಎಂದು ಸಾರ್ವಜನಿಕರು ದೂರಿದ್ದಾರೆ.

ಶೌಚಾಲಯ ನಿರ್ಮಿಸಿ: ಪುರುಷ, ಮಹಿಳೆಯರಿಗೆ ಶೌಚಾಲಯಗಳಿದ್ದರೂ ಇಲ್ಲಿನ ಪ್ರಯಾಣಿಕರ ಸಂಖ್ಯೆಗೆ ಅವು ಸಾಲದಂತಾಗಿವೆ. ಆದ್ದರಿಂದ ಮಹಿಳೆಯರಿಗೆ ಹೆಚ್ಚಿನ ಪ್ರಮಾಣದ ಶೌಚಾಲಯಗಳು ನಿರ್ಮಾಣಗೊಳ್ಳಬೇಕಿದೆ. ಇದು ಮಹಿಳೆಯರ ಆಗ್ರಹವೂ ಆಗಿದೆ.

ವಾಣಿಜ್ಯ ಮಳಿಗೆಗಳ ತ್ಯಾಜ್ಯ: ಬಸ್ ನಿಲ್ದಾಣದ ಸುತ್ತಲೂ ಸಾರಿಗೆ ಸಂಸ್ಥೆ ಖಾಸಗಿಯವರ ಪಾಲುದಾರಿಕೆಯೊಂದಿಗೆ 40ಕ್ಕೂ ಹೆಚ್ಚು ವಾಣಿಜ್ಯ ಮಳಿಗೆಗಳು ನಿರ್ಮಾಣಗೊಂಡಿವೆ. ಆದರೆ ಅವುಗಳು ಬಹುತೇಕ ಎಗ್ ರೈಸ್, ಮಿರ್ಚಿ, ಗಿರ್ಮಿಟ್, ಚಹಾದಂಗಡಿಗಳೇ ಆಗಿವೆ. ರಾತ್ರಿ ಹೊತ್ತು ಅದರ ತ್ಯಾಜ್ಯ ಬಸ್ ನಿಲ್ದಾಣದ ಬಳಕೆಯಾಗದ ಜಾಗದಲ್ಲಿ ಸಂಗ್ರಹವಾಗಿ ಸ್ವಚ್ಛತೆ ಎಲ್ಲ ರೀತಿಯಿಂದಲೂ ಮರೀಚಿಕೆಯಾಗಿದೆ.

ಪೊಲೀಸ್‌ ಚೌಕಿ ಸ್ಥಾಪಿಸಿ

ನರಗುಂದ ಬಸ್‌ ನಿಲ್ದಾಣದಲ್ಲಿ ಪ್ರಯಾಣಿಕರ ಸಂಖ್ಯೆ ಹೆಚ್ಚಾಗಿರುವ ಕಾರಣ ಇಲ್ಲಿ ಪೊಲೀಸ್ ಚೌಕಿ ನಿರ್ಮಾಣವಾಗಬೇಕು ಎಂದು ಸ್ಥಳೀಯರು ಒತ್ತಾಯಿಸಿದ್ದಾರೆ. ಬಸ್‌ ನಿಲ್ದಾಣದಲ್ಲಿ ಪೊಲೀಸರು ಇದ್ದರೆ ಅವರ ಭಯದಿಂದಲಾದರೂ ಕಳ್ಳತನ ಪ್ರಕರಣಗಳು ಕಡಿಮೆ ಆಗಲು ಸಾಧ್ಯ ಎಂದು ಪ್ರಯಾಣಿಕರು ಅಭಿಪ್ರಾಯಪಟ್ಟಿದ್ದಾರೆ. ರಾತ್ರಿ ವೇಳೆ ಬಸ್ ತಪ್ಪಿಸಿಕೊಂಡ ಮಹಿಳಾ ಪ್ರಯಾಣಿಕರು ಅಲ್ಲಿಯೇ ಬೀಡು ಬಿಡುತ್ತಾರೆ. ಅವರ ರಕ್ಷಣೆಗೆ ಕೂಡ ಪೊಲೀಸ್‌ ಸಿಬ್ಬಂದಿಯ ಅಗತ್ಯವಿದೆ ಎಂದು ಸ್ಥಳೀಯರು ತಿಳಿಸಿದ್ದಾರೆ.

ಯಲ್ಲಮಗುಡ್ಡದ ಪ್ರಯಾಣಿಕರೇ ಜಾಸ್ತಿ

ಸೀಗೆ ಹುಣ್ಣಿಮೆಯಿಂದ ಭಾರತ ಹುಣ್ಣಿಮೆಯವರೆಗೆ ಸುಮಾರು ಐದಕ್ಕೂ ಹೆಚ್ಚು ತಿಂಗಳುಗಳ ಕಾಲ ಹಾಗೂ ಶಕ್ತಿ ಯೋಜನೆ ಆದಾಗಿನಿಂದ ಪಟ್ಟಣದಿಂದ 30 ಕಿ.ಮೀ. ದೂರದಲ್ಲಿ ಇರುವ ಸವದತ್ತಿ ಯಲ್ಲಮನ ಗುಡ್ಡಕ್ಕೆ ಸುತ್ತಮುತ್ತಲಿನ ಆರಕ್ಕೂ ಹೆಚ್ಚು ಜಿಲ್ಲೆಗಳ ಜನರು ನರಗುಂದ ಮಾರ್ಗವಾಗಿ ಯಲ್ಲಮನಗುಡ್ಡಕ್ಕೆ ತೆರಳುತ್ತಾರೆ. ಯಲಮ್ಮನಗುಡ್ಡಕ್ಕೆ ತೆರಳುವವರಿಗೆ ನರಗುಂದ ಸೆಂಟರ್ ಪಾಯಿಂಟ್ ಆಗಿದೆ. ಇದರಿಂದ ಇಲ್ಲಿನ ಪ್ರಯಾಣಿಕರಿಗೆ ಮೂಲಸೌಲಭ್ಯ ಅಗತ್ಯವಾಗಿ ಬೇಕಾಗಿದೆ. ವಿಜಯಪುರ ಬಾಗಲಕೋಟೆ ರಾಯಚೂರು ಕೊಪ್ಪಳ ಧಾರವಾಡ ಸೇರಿದಂತೆ ವಿವಿಧ ಜಿಲ್ಲೆಗಳ ಪ್ರಯಾಣಿಕರು ಇದೇ ಮಾರ್ಗ ಬಳಸಿ ಯಲ್ಲಮಗುಡ್ಡಕ್ಕೆ ತೆರಳುತ್ತಾರೆ.